རྒྱ་ནག་གཞུང་གིས་བོད་མི་ངོ་རྒོལ་བར་ཁྲིམས་ཐག་བཅད་སྐོར།

༄༅༎ན་ནིང་བོད་མདོ་དབུས་ཁམས་གསུམ་དུ་བོད་མི་ཚོས་རྒྱ་ནག་གཞུང་གི་དབང་བསྒྱུར་ལ་ཞི་བའི་ངོ་རྒོལ་གྱི་ལས་འགུལ་ནང་ཞུགས་མཁན་གྲས་ཡིན་ལུགས་རྒྱ་ནག་གཞུང་གིས་ཉེས་བཙུགས་ཐོག་ནས་འཛིན་བཟུང་བྱས་པའི་ཁམས་དཀར་མཛེས་པང་རི་ན་བཙུན་དགོན་གྱི་བཙུན་མ་རང་ལོ་སུམ་ཅུ་སོ་ལྔར་ཕེབས་པའི་སོ་ལྷ་མཚོ་ལ་བཙོན་འཇུག་ལོ་བཅུའི་ལོ་ཚད་བཟོས་ཡོད་པ་དང་རང་ལོ་སུམ་ཅུ་སོ་དྲུག་ལ་ཕེབས་པའི་བོུ་ལ་བཙོན་འཇུག་ལོ་དགུའི་ལོ་ཚད་བཟོས་ཡོད་པའི་སྐོར་རེས་གཟའ་པ་སངས་ཉིན་བཞུགས་སྒར་རྡ་རམ་ས་ལར་རྟེན་གཞི་བྱས་པའི་བོད་ཀྱི་དམངས་གཙོ་དང་འགྲོ་བ་མིའི་ཐོབ་ཐང་ཚོགས་པས་གནས་ཚུལ་སྤེལ་བཞག

དཀར་མཛེས་ཁུལ་གྱི་བོད་མི་རང་ལོ་བཅོ་བརྒྱད་ལ་སོན་པ་ངག་དབང་བཀྲིས་དང་རྡོ་རྗེ་བཀྲིས་གཉིས་ཀྱིས་ན་ནིང་སྤྱི་ཟླ་གསུམ་པའི་ཚེས་བཅོ་བརྒྱད་ཉིན་དཀར་མཛས་ཁུལ་དུ་ངོ་རྒོལ་སྐད་འབོད་བྱས་པའི་རྐྱེན་གྱིས་འཛིན་བཟུང་བྱས་ནས་ཉེ་ཆར་ཁོང་གཉིས་པོར་བཙོན་འཇུག་ལོ་གསུམ་གྱི་ལོ་ཚད་བཟོས་ཡོད་པ་དང་དཀར་མཛེས་ས་གནས་ཁྲིམས་ཁང་གིས་ཉེ་བའི་ཆར་ཁྲིམས་ཁང་དེ་ནས་ཁྲིམས་ཐག་བཅད་པའི་གྱོད་དོན་མང་ཆེ་བ་ན་ནིང་གི་ངོ་རྒོལ་དང་འབྲེལ་བ་ཡོད་པའི་རིགས་ཤ་ཏག་ཡིན་པ་གསལ་སྟོན་བྱས་ཡོད་པ་དང་ཡིན་ནའང་ད་རེས་ཉེ་ཆར་དཀར་མཛེས་ཁུལ་དུ་སླར་ཡང་གཞི་རྒྱ་ཆེ་བའི་ངོ་རྒོལ་གྱི་ལས་འགུལ་སྤེལ་བའི་ནང་འཇུ་བཟུང་བྱས་པའི་གནས་ཚུལ་སྐོར་ལ་ལན་འདེབས་གང་ཡང་བྱེད་ཀྱི་མེད་པ་ཨེ་པི་གསར་འགྱུར་བརྒྱུད་ལམ་གྱིས་སྤེལ་བའི་གནས་ཚུལ་ནང་འཁོད་འདུག རྒྱ་ནག་གཞུང་འབྲེལ་གསར་འགྱུར་བརྒྱུད་ལམ་ཐོག་གནས་ཚུལ་སྤེལ་བའི་ནང་ན་ནིང་སྤྱི་ཟླ་གསུམ་པའི་ནང་གི་ངོ་རྒོལ་ལས་འགུལ་ནང་ཞུགས་མཁན་བོད་མི་དགུ་རྒྱ་ལྔ་བཅུ་ཙམ་འཛིན་བཟུང་བྱས་ཡོད་པ་དང་དེའི་ནང་ནས་མི་གྲངས་བདུན་ཅུ་དོན་དྲུག་ཙམ་ལ་བཙོན་འཇུག་ལོ་ཚད་ཁྲིམས་ཐག་བཅད་ཡོད་པའི་སྐོར་འཁོད་ཡོད་འདུག།