ཡུ་གུར་མི་སྲོག་ཐོག་བཏང་བ་ནི་ཁྲིམས་གཞིར་བཟུང་ཡིན་སྐོར།

༄༅༎ཁ་སྔོན་ཕྱི་ཟླ་བདུན་པའི་ནང་ཤར་ཏུར་ཀི་སི་ཐན་གྱི་རྒྱལ་ས་ཨུ་རུམ་ཆི་ནང་དུ་རྒྱ་ནག་གཞུང་ལ་ངོ་རྒོལ་ལས་འགུལ་གྱི་དུས་ཟིང་བྱུང་བའི་སྐབས་འཛིན་བཟུང་བྱས་པའི་ཡུ་གུར་མི་རིགས་དགུ་སྲོག་ཐོག་བཏང་བ་དེ་རྣམས་རྒྱ་ནག་གཞུང་གིས་རྒྱ་ནག་རྒྱལ་ཁབ་ཀྱི་ཁྲིམས་ལུགས་གཞིར་བཟུང་ཐག་གཅོད་བྱས་པ་ཡིན་ཚུལ་འགྲེལ་བརྗོད་བྱེད་ཀྱི་ཡོད་པ་རེད།

ཕྱི་ཟླ་བདུན་པའི་ནང་ཡུ་གུར་མི་རིགས་ཚོས་སྤེལ་བའི་ངོ་རྒོལ་གྱི་དུས་ཟིང་དེའི་ནང་རྒྱ་ནག་གཞུང་གིས་ཁྱོན་མི་དམངས་༡༨༧རྐྱེན་ལམ་དུ་ཕྱིན་པའི་བསྡོམས་རྩིས་ཤོད་ཀྱི་ཡོད་པ་ལྟར་ད་ལྟ་བར་རྒྱ་ནག་གཞུང་གིས་དོན་རྐྱེན་དེའི་ནང་ཐེ་ཇུས་ཡོད་པའི་ཡུ་གུར་མི་རིགས་ཉི་ཤུ་རྩ་གཅིག་ལ་ནག་ཉེས་ཉེས་འཛུགས་བྱས་པ་དང་མི་གྲངས་བཅུ་གཉིས་ལ་སྲོག་ཐོག་གི་ཉེས་ཆད་ཐག་གཅོད་བྱས་ཏེ་དེའི་ནང་ནས་མི་གསུམ་ལ་དུས་ཚོད་ངེས་མེད་ནང་སྲོག་ཐོག་གཏོང་རྒྱུའི་ཐག་གཅོད་བྱས་ཡོད་པ་རེད། དེར་བརྟེན་ཨ་མི་རི་ཀ་གཞུང་གིས་རྒྱ་ནག་ལ་ཡུ་གུར་མི་རིགས་དེ་དག་ལ་ནག་ཉེས་ཉེས་འཛུགས་ཀྱིས་སྲོག་ཐོག་གི་ཐག་གཅོད་བྱས་པ་དྲང་བདེན་དང་ཕྱི་གསལ་ནང་གསལ་ཡོང་བ་བྱེད་དགོས་པའི་ཛ་དྲག་གི་འབོད་སྐུལ་བྱས་ཏེ་ཨ་མི་རི་ཀའི་སྲིད་འཛིན་ཨོ་སྦ་མ་མཆོག་ཐེངས་དང་པོ་རྒྱ་ནག་ཏུ་འཚམས་འདྲིར་ཕེབས་རྒྱུའི་སྔ་རོལ་དེར་རྒྱ་ནག་གི་འགྲོ་བ་མིའི་ཐོབ་ཐང་སྐོར་ལ་གླེང་གཞི་བཟོས་ཡོད་པ་རེད། ཡིན་ནའང་དེ་རིང་རྒྱལ་ས་པེ་ཅིང་དུ་རྒྱ་ནག་གཞུང་གི་གསར་འགོད་ལྷན་ཚོགས་ཐོག་ལ་གསར་འགོད་པའི་ཁྲོདནས་རྒྱ་ནག་གཞུང་གིས་ཡུ་གུར་མི་རིགས་སྲོག་ཐོག་གི་ཉེས་ཆད་ཐག་གཅོད་བྱས་པའི་གནད་དོན་སྐོར་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཆིན་ཀང་ལ་འདྲི་བ་བྱེད་པར་ལན་འདེབས་བྱས་དོན་ལ་ཁྱེད་ཚོས་བཤད་པའི་མི་དེ་དག་ནི་ཁ་སྔོན་ཕྱི་ཟླ་བདུན་པའི་ཚེས་ལྔ་ཉིན་ཨུ་རུམ་ཆི་ནང་དུ་མི་གསོད་ཀྱི་བྱ་སྤྱོད་ནང་ཐེ་ཇུས་ཡོད་པ་ཞིག་ཡིན་པ་དང་ཁོང་ཚོར་རྒྱ་ནག་གཞུང་གིས་ཁྲིམས་ལུགས་གཞི་བཟུང་སྐབས་བབ་ཀྱི་གྱོད་དོན་དང་འབྲེལ་བའི་ཐག་གཅོད་བྱས་པ་རེད་ཅེས་ལན་འདེབས་བྱས་ཡོད་པ་དེ་ནི་རྒྱ་ནག་གཞུང་གིས་ཨུ་རུམ་ཆི་ནང་གི་ཟིང་ཆའི་དོན་རྐྱེན་དང་འབྲེལ་བའི་གནད་དོན་སྐོར་ལ་ཐེངས་དང་པོ་ལན་འདེབས་བྱས་པ་ཞིག་ཡིན་པ་རེད།