བོད་མི་རྩོམ་པ་པོ་སྐལ་བཟང་ཚུལ་ཁྲིམས་སླར་ཡང་བཀག་ཉར།

༄༅༎བོད་ལ་རང་དབང་མེད་པའི་སྙན་ཞུ་ཞེས་པའི་འོད་སྡེར་བཟོ་མཁན་གྱི་བོད་རིགས་རྩོམ་པ་པོ་སྐལ་བཟང་ཚུལ་ཁྲིམས་ལགས་སླར་ཡང་རྒྱ་ནག་ཉེན་རྟོག་པས་བཀག་ཉར་བྱས་ཡོད་འདུག 

དེ་ཡང་བཞུགས་སྒར་རྡ་རམ་ས་ལར་རྟེན་གཞི་བྱས་པའི་བོད་ཀྱི་དམངས་གཙོ་དང་འགྲོ་བ་མིའི་ཐོབ་ཐང་ཚོགས་པས་ཕྱི་ཚེས་༤ཉིན་གསལ་བསྒྲགས་སྤེལ་ཡོད་པའི་ནང་ རྩོམ་པ་པོ་སྐལ་བཟང་ཚུལ་ཁྲིམས་ལགས་ནི་བོད་མདོ་སྨད་ཀན་ལྷོ་ཁུལ་གསང་ཆུ་རྫོང་ནས་ཡིན་པ་དང་   ཁོང་གིས་བོད་ལ་རང་དབང་མེད་པའི་སྙན་ཞུ་ཞེས་པའི་འོད་སྡེར་ཞིག་ཕྱི་ལོ་ཉིས་སྟོང་དགུ་ལོའི་ཕྱི་ཟླ་བརྒྱད་པའི་ནང་འགྲེམས་སྤེལ་གྱིས་ འོད་སྡེར་དེ་རིགས་ཉེ་འགྲམ་ས་ཁུལ་ཁག་ནང་ཉིས་སྟོང་ལྷག་ཙམ་འགྲེམས་སྤེལ་གནང་ཡོད་ཅིང་ འོད་སྡེར་དེའི་ནང་གཙོ་བོ་ཁོང་གིས་བོད་ནང་ཆོས་དང་རིག་གཞུང་རང་མི་རིགས་ཚོས་མི་ཉམས་གོང་འཕེལ་བྱ་རྒྱུའི་རང་དབང་མེད་པའི་སྐོར་སོགས་འཁོད་ཡོད་པའི་སྐོར་གསུང་ཡོད་པ་དང་དེ་བཞིན་ཁོང་གིས་མི་ཡུལ་ལ་ཕུལ་བའི་སེམས་པ་ཞེས་པའི་དེབ་ཅིག་ཀྱང་རྩོམ་སྒྲིག་གནང་ཡོད་པ་སོགས་ཀྱིས་རྐྱེན་པས་ཕྱི་ལོ་ཉིས་སྟོང་བཅུ་ལོའི་ཕྱི་ཟླ་བདུན་པའི་ནང་ཁོང་འཛིན་བཟུང་བཀག་ཉར་བྱས་ཡོད་པ་དང་ ཕྱི་ཟླ་བརྒྱད་པའི་ནང་རྒྱ་ནག་ཉེན་རྟོག་པས་ཁོང་གང་བྱུང་དུ་སྐྱོད་མི་ཆོག་པ་དང་ ཁ་པར་ཨང་གྲངས་རྗེ་པོ་རྒྱབ་མི་ཆོག་པ་སོགས་ཀྱི་ཡིག་ཆའི་ཐོག་ས་རྟགས་བཀོད་བཅུག་ཏེ་ཁོང་གློད་བཀྲོལ་བཏང་ཡོད་ཅིང་  ཡིན་ནའི་ད་རེས་ཕྱི་ལོ་ཉིས་སྟོང་བཅུ་ལོའི་ཕྱི་ཟླ་བཅུ་གཉིས་པའི་ཚེས་༡༦ཉིན་རྩོམ་པ་པོ་སྐལ་བཟང་ཚུལ་ཁྲིམས་ལགས་ཡོངས་གྲགས་སྙུག་མིང་དུ་སྟག་སྨིག་ཅེས་ཞུ་བ་ཁོང་ཀན་ལྷོ་གཙོད་གྲོང་ཁྱེར་གྱི་སྤྱི་བདེ་ལས་ཁུང་གིས་ཉེན་རྟོག་ལས་ཁང་དེར་དྲི་ཞིབ་བྱེད་པར་བཀའ་བཀུགས་བྱས་པའི་རྗེས་ གཙོད་གྲོང་ཁྱེར་ལྟ་སྲུང་ཁང་དུ་བཀག་ཉར་བྱ་མུས་ཡིན་པ་དང་ད་ལྟའི་ཆར་ད་རེས་ཁོང་འཛིན་བཟུང་བཀག་ཉར་བྱེད་དགོས་པའི་རྒྱུ་མཚན་གང་ཡང་འགྲེལ་བརྗོད་བྱས་མེད་པ་རེད་