རྒྱ་ནག་གིས་འབྲས་ལྗོངས་ས་མཚམས་བར་ལྕགས་ལམ་བཟོ་བསྐྲུན།

༄༅༎རྒྱ་ནག་གིས་རྒྱ་གར་གྱི་འབྲས་ལྗོངས་ས་མཚམས་བར་རི་ལིའི་ལམ་འཛུགས་རྒྱུ་ཡིན་པ་རྒྱ་གར་གྱི་ཨིན་ཌིཡེན་ཨེསི་པེ་རེ་སི་ཞེས་པའི་གསར་ཤོག་དེས་གནས་ཚུལ་བཏོན་ཡོད་པ་རེད་ རྒྱ་གར་གྱི་གསར་ཤོག་དེས་གནས་ཚུལ་དེ་དངོས་འབྲེལ་ཡིན་སྐོར་རྒྱ་ནག་གི་རི་ལིའི་ལས་དོན་ལྷན་ཁང་གིས་ཟླ་བ་སྔོན་མ་དེར་རྒྱ་ནག་གི་རི་ལིའི་ལས་འཆར་གྱི་ས་བཀྲའི་ནང་དེ་ལྟར་བཏོན་ཡོད་སྐོར་གསུང་འདུག ད་བར་ཕྱི་ཁག་ནས་རྒྱ་ནག་གཞུང་གི་རི་ལིའི་ལས་འཆར་དེ་དག་ཡོད་ཚོད་ཀྱི་ཚོད་དཔག་གནང་ཡང་དཆ་གནས་ཚུལ་དེ་དངོས་འབྲེལ་ཆགས་ཀྱི་ཡོད་པ་མ་ཟད་རི་ལིའི་ལས་འཆར་དེའི་ཁོངས་རི་ལིའི་ལམ་གཞན་ཞིག་བལ་ཡུལ་གྱི་ས་མཚམས་བར་འཁྲིད་རྒྱུའི་འཆར་གཞི་ཡང་ཡོད་པ་རེད་ གོང་ཞུས་བལ་ཡུལ་གྱི་ས་མཚམས་བར་འཁྲིད་རྒྱུའི་རི་ལི་ལམ་དེ་གཞིས་ཀ་རྩེ་ནས་ལམ་གཞན་ཞིག་ཐོག་བོད་ཀྱི་གྲོ་མོ་གྲོང་ཁྱེར་བར་འཁྲིད་རྒྱུའི་འཆར་གཞི་སྒྲིག་ཡོད་པ་རེད་བོད་ཀྱི་གྲོ་མོ་གྲོང་ཁྱེར་དེ་བཞིན་རྒྱ་གར་གྱི་ས་མཚམས་སུ་ཆགས་པའི་རྣ་ཐོས་ལ་བརྒྱུད་འབྲས་ལྗོངས་དང་ས་འབྲེལ་འཁེལ་གྱི་ཡོད་པ་དང་ས་ཁུལ་དེ་རྒྱ་གར་དང་རྒྱ་ནག་འབྲུག་ཡུལ་བཅས་པའི་ཡུལ་ཁག་གསུམ་ས་འབྲེལ་ཞིག་ཀྱང་ཆགས་ཀྱི་ཡོད་པ་རེད་ ས་ཁུལ་འདིའི་ས་མཚམས་ཐོག་རྒྱ་ནག་དང་འབྲུག་ཡུལ་བར་རྩོད་རྙོག་ཡོད་པ་མ་ཟད་ཕྱི་ལོ་༡༩༦༢ལོར་རྒྱ་གར་གྱི་རྣ་ཐོས་ལའི་མཚམས་འདི་སྲུང་སྐྱོབ་བྱེད་རྒྱུར་རྒྱ་ནག་དང་དམག་འཁྲུག་ཅིག་ཀྱང་བྱུང་ཡོད་པ་རེད་ གོང་ཞུས་རྒྱ་ནག་གིས་རྒྱ་གར་གྱི་རྣ་ཐོས་ལའི་ས་མཚམས་སུ་འཁྲིད་རྒྱུའི་རི་ལིའི་ལས་འཆར་དེ་དངོས་སུ་འགོ་འཛུགས་གནང་མེད་ཀྱང་ལག་བསྟར་འབྱུང་མིན་གྱི་ཚོད་བལྟའི་ལས་འཆར་དེ་འགོ་འཛུགས་ཟིན་ཡོད་པ་རེད་ རྒྱ་ནག་གི་རི་ལིའི་ལས་འཆར་དེ་དངོས་སུ་འགོ་འཛུགས་གནང་ན་ལས་འཆར་འདི་ཕྱི་ལོ་༢༠༡༧ལོར་མཇུག་བསྒྲིལ་ཟིན་པ་གནང་རྒྱུ་ཡིན་པ་རེད་ རྒྱ་ནག་གི་རི་ལིའི་ལས་འཆར་གཞན་ཞིག་རྒྱ་ནག་གི་ཡུ་ནན་གྱི་ཀུན་མིང་གྲོང་ཁྱེར་ནས་སིང་ག་པོར་བར་འཁྲིད་རྒྱུའི་ལས་འཆར་ཞིག་ཀྱང་ཡོད་པའི་གནས་ཚུལ་ཐོན་བཞག།