བལ་ཡུལ་དུ་བོད་མིར་དམ་བསྒྲགས་བྱེད་ཤུགས་ཆེ་རུ་བཏང་བ།

༄༅༎རྒྱ་ནག་གཞུང་གིས་གནོན་ཤུགས་འོག་བལ་ཡུལ་ནང་ཡོད་པའི་བོད་མི་བཙན་བྱོལ་བ་ཚོའི་ཐོག་བལ་ཡུལ་གཞུང་གིས་དམ་བསྒྲགས་བྱེད་ཤུགས་ཆེ་རུ་བཏང་ཡོད་པ་རེད་ཅེས་ཨ་མི་རི་ཀའི་རྒྱལ་ས་ལྦ་ཤིང་ཊོན་ནང་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་དེ་རིང་གསལ་སྟོན་གནང་བཞག

དེ་ཡང་གོང་ཞུས་རྒྱལ་སྤྱིའི་བོད་དོན་ལས་འགུལ་ཁང་གིས་གསལ་སྟོན་གནང་བར་གཞིགས་ན་བལ་ཡུལ་གཞུང་གིས་དེ་སྔ་བོད་དང་བལ་ཡུལ་གཉིས་བར་ལོ་རྒྱུས་ཀྱི་རང་བཞིན་ལྡན་པའི་འབྲེལ་བའི་གནད་དོན་ལ་རྩིས་མེད་བཏང་སྟེ་ད་ཆ་རྒྱ་ནག་གཞུང་གིས་བལ་ཡུལ་ནང་དཔལ་འབྱོར་རོགས་རམ་དང་ཆབ་སྲིད་ཀྱི་གནོན་ཤུགས་འོག་བལ་ཡུལ་ནང་བཙན་བྱོལ་དུ་འབྱོར་བའི་བོད་མི་ཚོའི་ཐོག་དམ་བསྒྲགས་བྱེད་ཤུགས་ཆེ་རུ་གཏོང་བཞིན་ཡོད་པ་དང་བོད་མི་ཚོས་རྒྱ་ནག་གཞུང་ལ་ངོ་རྒོལ་གྱི་ལས་འགུལ་སྤེལ་བ་ཁག་དྲག་རྩུབ་ཅན་གྱི་ལས་འགུལ་སྤེལ་བ་ཞིག་ཡིན་པ་རྒྱལ་སྤྱིའི་ཐོག་ཁྱབ་བསྒྲགས་བྱེད་པ་དང་ལྷག་པར་དུ་བོད་མི་ཚོས་ལས་འགུལ་གང་རུང་ཞིག་སྤེལ་རྒྱུའི་འཆར་གཞིའི་སྔོན་ཚུད་ནས་གསང་བའི་ཐོག་ནས་བོད་མི་འཛིན་བཟུང་བྱེད་པ་དང་བོད་མིའི་ཁང་པ་བསྔོགས་བཤེར་བྱེད་པ།ལག་འཁྱེར་ཞིབ་བཤེར་བྱེད་པ་སོགས་བལ་ཡུལ་ནང་ཡོད་པའི་བཙན་བྱོལ་བོད་མི་ཚོ་བརྟན་ལྷིང་མེད་པར་ཞེད་སྣང་ངང་གནས་དགོས་ཡོད་པ་རེད་ཅེས་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་མེ་རི་སྦེཐ་ཡིས་རོའུ་ཀྲར་གསར་ལས་ཁང་དུ་དེ་རིང་གསལ་སྟོན་གནང་བཞག གནད་དོན་དེའི་ཐད་བལ་ཡུལ་གཞུང་ཕྱོགས་ཀྱིས་འཕྲལ་མར་གནས་ཚུལ་གང་ཡང་འགྲེལ་བརྗོད་བྱས་མེད་ཀྱང་དབུལ་ཞིང་ཕོངས་བའི་བལ་ཡུལ་རྒྱལ་ཁབ་དེ་རྒྱ་ནག་དང་ཚོང་དོན་གྱི་འབྲེལ་ལམ་ཡག་ཤོས་ཡིན་པ་མ་ཟད་རྒྱ་ནག་དེ་བཞིན་བལ་ཡུལ་ནང་དཔལ་འབྱོར་གྱི་རོགས་སྐྱོར་བྱེད་མཁན་ཤུགས་ཆེ་ཤོས་ཤིག་ཡིན་པའི་ཆ་ནས་བལ་ཡུལ་གཞུང་གིས་བོད་དེ་རྒྱ་ནག་གི་ཆ་ཤས་ཤིག་ཡིན་པར་ངོས་འཛིན་བྱེད་ཀྱི་ཡོད་པ་རེད། སྤྱིར་བཏང་ནས་བལ་ཡུལ་ནང་བཙན་བྱོལ་བོད་མི་ཚོས་རྒྱ་ནག་གཞུང་ལ་ངོ་རྒོལ་གྱི་ལས་འགུལ་གང་འདྲ་ཞིག་སྤེལ་ཀྱང་དེའི་ཐད་རྒྱུན་དུ་ནས་དམ་བསྒྲགས་ཤུགས་ཆེ་བྱེད་བཞིན་ཡོད་པ་རེད།