རྒྱ་ནག་ནང་མུ་མཐུད་ས་ཡོམ་ཐེངས་མང་རྒྱབ་ཡོད་འདུག

༄༅༎ཉེ་ཆར་རྒྱ་ནག་གི་ལྷོ་ནུབ་ཟི་ཁྲོན་ཞིང་ཆེན་ཝེན་ཁྲོན་གྲོང་ཁྱེར་ནང་ས་ཡོམ་ཤུགས་ཆེ་ཞིག་རྒྱབ་པའི་རྗེས་ས་ཁུལ་དེའི་ནང་མུ་མཐུད་ས་ཡོམ་ཤུགས་ཚད་༥ཙམ་བྱས་པ་ཐེངས་བཅོ་བརྒྱད་ཙམ་རྒྱབ་ཡོད་པའི་གནས་ཚུལ་ཐོན་བཞག་

བདུན་ཕྲག་དེའི་རེས་གཟའ་ཟླ་བའི་ཉིན་རྒྱ་ནག་གི་ལྷོ་ནུབ་ཟི་ཁྲོན་ཞིང་ཆེན་ཝེན་ཁྲོན་གྲོང་ཁྱེར་ནང་ས་ཡོམ་ཤུགས་ཚད་༧ཚགས་༨ཙམ་བརྒྱབས་པའི་རྗེས་མུ་མཐུད་ས་ཁུལ་དེའི་ནང་ས་ཡོམ་ཤུགས་ཚད་༥ཙམ་བྱས་པ་ཐེངས་བཅོ་བརྒྱད་ཙམ་རྒྱབ་ཡོད་ལུགས་རྒྱ་ནག་གཞུང་འབྲེལ་ཤིང་ཧྭ་གསར་འགྱུར་བརྒྱུད་ལམ་ནང་དེ་རིང་རེས་གཟའ་ལྷག་པའི་ཉིན་གནས་ཚུལ་སྤེལ་འདུག་

ད་རེས་ས་ཁུལ་དེའི་ནང་ས་ཡོམ་བྱུང་འཕྲལ་རྒྱ་ནག་གི་སྲིད་བློན་ཝེན་ཅ་བའོ་ཡིས་གོད་ཆགས་ཕོག་པའི་མི་སྣ་ཚོའི་ཐོག་ཐུགས་གསོས་གནང་བ་སྦྲགས་ས་ཡོམ་བྱུང་སའི་ས་ཁུལ་ནང་མྱུར་སྐྱོབས་ངལ་སེལ་གྱི་ལས་དོན་ལ་གཟིགས་སྐོར་གནང་ཡོད་པ་རེད་

ས་ཡོམ་བྱུང་ཡུལ་གཙོ་བོ་ཟི་ཁྲོན་ཞིང་ཆེན་རྔ་པ་བོད་རིགས་རང་སྐྱོང་ཁུལ་ལུང་དགུ་རྫོང་དུ་འཁེལ་ཡོད་པ་དང་ དེ་མིན་བཀྲིས་གླིང་རྫོང་དང་ ཟུང་ཆུ་རྫོང་མའོ་ཡོན་རྫོང་སོགས་གཙོ་གྱུར་བྱས་པའི་བོད་མི་གནས་ཡུལ་མང་པོར་ཡང་རིམ་པ་མི་འདྲ་བའི་ས་ཡོམ་བྱུང་སྟེ་འགྲིམས་འགྲུལ་ཆད་ནས་ད་ཆ་དངོས་ཡོད་གནས་སྟངས་ཇི་ཆགས་ཤེས་རྟོགས་ཧ་ཅང་ཁག་པར་གནས་ཡོད་པ་རེད་