རྒྱ་ནག་གི་བརྒྱུད་ལམ་ཐོག་ཨི་ཇིབཏ་གནས་ཚུལ་ཆུང་ངུར་བརྩིས།

༄༅༎ཉེ་ཆར་ཨི་ཇིབཏ་ནང་མི་དམངས་ཀྱིས་ཡུལ་དེའི་འདས་པའི་ལོ་གསུམ་བཅའི་རིང་སྲིད་འཛིན་གནང་མཁན་ཧོ་སི་ནི་མུ་སྦ་རཀ་དགོངས་ཞུ་དགོས་རྒྱུར་སྒེར་ལངས་ཀྱི་ལས་འགུལ་ཤུགས་ཆེ་སྤེལ་བའི་འཛམ་གླིང་ཡོངས་གྲགས་ཀྱི་གནས་ཚུལ་ཁག་རྒྱ་ནག་གི་བརྒྱུད་ལམ་ཁག་གི་ནང་གནས་ཚུལ་ཆུང་ངུའི་རྣམ་པ་ཞིག་གི་ཐོག་ནས་མ་གཏོགས་བཀོད་སྤེལ་བྱུང་མེད་ཅིང་ དེ་ནི་རྒྱ་ནག་གི་འགོ་འཁྲིད་ཚོས་རྒྱ་ནག་དམར་ཤོག་ཚོགས་པའི་སྲིད་དབང་ལ་དོ་ཕོག་འབྱུང་སྲིད་པའི་ཉེན་ཁ་ཡོད་པའི་འཇིགས་སྣང་གི་འོག་ཆེད་མངགས་བཀོད་སྤེལ་མ་བྱས་པ་ཞིག་ཡིན་པ་གནད་དོན་དབྱེ་ཞིབ་པ་ཚོས་ངོས་འཛིན་བྱེད་བཞིན་ཡོད་པ་རེད།

རྒྱ་ནག་གི་གསར་ཤོག་ཁག་གི་ནང་ཨི་ཇིབཏ་གྱི་སྲིད་འཛིན་དགོངས་ཞུ་བྱས་པའི་སྐོར་དང་གཞན་ཡང་མི་དམངས་ཀྱི་ངོ་རྒོལ་བྱས་པའི་སྐོར་རྒྱ་ནག་གཞུང་འབྲེལ་ཤིན་ཧྭ་གསར་ལས་ཁང་གིས་བཀོད་སྤེལ་བྱས་པ་ནས་གཅེས་བཏུད་ཀྱིས་ཧ་ཅང་བསྡུས་པོ་ཞིག་ལས་བཀོད་སྤེལ་བྱེད་ཀྱི་མེད་པར་མ་ཟད་གཟའ་སྤེན་པའི་བརྙན་འཕྲིན་ལས་རིམ་ཁག་གི་ནང་ཨི་ཇིབཏ་གྱི་གནས་ཚུལ་དེ་གལ་ཆེའི་གནས་ཚུལ་གྱི་ངོ་བོའི་ཐོག་མིན་པར་གསར་འགྱུར་གཞན་མང་པོའི་དཀྱིལ་ཙམ་ལ་བཤད་ཡོད་འདུག།