རྒྱ་ནག་གི་ཡེ་ཤུའི་ཆོས་དད་པ་ཁག་ཅིག་འཛིན་བཟུང་བྱས་པ།

༄༅༎དེ་རིང་རེས་གཟའ་ཉི་མའི་ཉིན་པེ་ཅིང་གི་ཉེན་རྟོག་པས་ཡེ་ཤུའི་ཆོས་དད་པ་ཁག་ཅིག་འཛིན་བཟུང་བྱས་ཡོད་པ་དང༌། ཁོང་ཚོའི་ཆོས་ཁང་དེ་ནི་རྒྱ་ནག་གཞུང་གིས་ངོས་ལེན་མེད་པ་དང་ཆོག་ཆན་མེད་པ་ཞིག་ཡིན་པར་བརྟེན་ཁོང་ཚོས་ཆོས་ཁང་གི་ཕྱི་ལོག་ཏུ་སྨོན་ལམ་འདོན་རྒྱུའི་གོ་སྒྲིག་བྱེད་པའི་སྐབས་འཛིན་བཟུང་བྱས་ཡོད་པ་རེད།

དེ་ཡང་ཨ་མི་རི་ཀར་ཡོད་པའི་ཡེ་ཤུའི་ཆོས་ལུགས་ཐོབ་ཐང་ཚོགས་པས་དོན་རྐྱེན་དེ་དངོས་སུ་མཐོང་མཁན་གྱི་འགྲེལ་བརྗོད་བྱས་པའི་གནས་ཚུལ་ལུང་འདྲེན་བྱས་ཏེ་གསལ་བསྒྲགས་ཤིག་སྤེལ་བའི་ནང༌། ཆོས་དད་པ་རྣམས་པེ་ཅིང་གི་ལྷོ་ཕྱོགས་ཧའེ་ཏན་རྫོང་གི་ཕྱོགས་སུ་སྒུག་སྡོད་བྱེད་པའི་ཉེན་རྟོག་པའི་མོ་ཊའི་ནང་བླུགས་ཏེ་ཁྲིད་ཕྱིན་པ་དང༌། ཉེན་རྟོག་པས་འཛིན་བཟུང་བྱས་པ་མི་གྲངས་༡༠༠ལྷག་བྱུང་ཡོད་པ་གསུང་ཡོད་ཀྱང་གསར་ཤོག་ཐོག་ལ་མི་བཅུ་གྲངས་ཤིག་བཀག་ཉར་དོ་དམ་བྱས་པའི་གནས་ཚུལ་བཀོད་ཡོད་པ་རེད། ཨ་རིའི་ནེའུ་ཡོག་གསར་འགྱུར་ལས་ཁང་གི་གནས་ཚུལ་སྤེལ་བའི་ནང༌། ཁོང་ཚོ་གསར་འགྱུར་ལས་ཁང་གི་པར་རྒྱབ་མཁན་ལས་བྱེད་པ་ཞིག་མཉམ་དུ་འཛིན་བཟུང་བྱས་ཡོད་ཀྱང་རྗེས་སུ་གློད་བགྲོལ་བཏང་ཡོད་པའི་གནས་ཚུལ་བཀོད་ཡོད་པ་རེད།།