རྒྱ་མིའི་གཞུབ་ཚབ་ནས་བོད་མི་ཚོས་ངོ་རྒོལ་བྱེད་པར་སྐྱོན་བརྗོད།

༄༅༎བལ་ཡུལ་ནང་གི་རྒྱ་ནག་གཞུང་ཚབ་ཁང་ནས། བོད་མི་ཚོས་རྒྱ་ནག་ནང་བྱུང་བའི་གནོད་འཚེ་ཕོག་པའི་སྐབས་འདིར་ཡང་མུ་མཐུད་ནས་ངོ་རྒོལ་བྱེད་ཀྱི་ཡོད་པར་སྐྱོན་བརྗོད་བྱས་འདུག།

དེ་ཡང་བལ་ཡུལ་ནང་ཡོད་པའི་རྒྱ་ནག་གཞུང་ཚབ་ཁང་ནས། ཁ་ས་ཚེས་བཅུ་བཞི་ཉིན་གསར་འགོད་གསལ་བསྒྲགས་ཤིག་སྤེལ་ཡོད་དེའི་ནང༌། ཉེ་ཆར་རྒྱ་ནག་ནང་ས་ཡོམ་ཤུགས་ཆེ་རྒྱབ་ནས་མི་རྒྱུ་གཉིས་ལ་དོ་ཕོག་ཆེན་པོ་ཐེབས་པའི་སྐབས་འདིར་བལ་ཡུལ་གཞུང་དང་། མི་མང་གཉིས་ཀའི་ངོས་ནས་ཐུགས་གསོའི་འཚམས་འཕྲིན་དང་རྒྱབ་སྐྱོར་གནང་གི་ཡོད་པ་རེད། འོན་ཀྱང་དེ་ལས་བཟློག་ཏེ་བོད་རིགས་རྣམས་རྒྱ་ཁོངས་ཡིན་བཞིན་དུ་སོ་སོའི་རྒྱལ་ཁབ་ནང་རྐྱེན་ངན་བྱུང་བར་གདུང་སེམས་མཉམ་སྐྱེད་དང་། མྱ་ངན་བྱེད་རྒྱུའི་ཚབ་ཏུ་ངོ་རྒོལ་གྱི་ལས་འགུལ་བསྟུད་མར་སྤེལ་བཞིན་པ་འདི་ནི་གཞུང་ཚབ་ལས་བྱེད་ཚོའི་ལས་ཀའི་ཐོག་དོ་ཕོག་ཧ་ཅང་ཆེན་པོ་ཐེབས་ཀྱི་འདུག་ཅེས་སྐྱོན་བརྗོད་ཤུགས་ཆེ་བྱས་ཡོད་པ་རེད།

དེ་དང་ཕྱོགས་མཚུངས་གསར་འགོད་གསལ་བསྒྲགས་དེའི་ནང་། རྒྱལ་སྤྱིའི་ཚོགས་པ་ཁག་ནས་ཀྱང་བོད་མི་ཚོའི་མི་སྤྱོད་ལས་འདས་པའི་བྱ་ སྤྱོད་དེར་མུ་མཐུད་ནས་རྒྱབ་སྐྱོར་བྱེད་ཀྱི་ཡོད་པར་ཡང་སྐྱོན་བརྗོད་ཞུས་ཡོད་པ་རེད།

འདས་པའི་ཟླ་བ་གཉིས་ཙམ་གོང་ནས་བོད་ནང་དོན་རྐྱེན་བྱུང་བ་ནས་བཟུང་བལ་ཡུལ་ནང་གནས་སྡོད་བོད་མི་ཚོས་རྒྱ་ནག་གཞུང་ཚབ་དང་། མཉམ་འབྲེལ་རྒྱལ་ཚོགས་ཀྱི་ལས་ཁུངས་སོགས་ཀྱི་མདུན་ངོ་རྒོལ་གྱི་ལས་འགུལ་མུ་མཐུད་སྤེལ་དང་སྤེལ་བཞིན་ཡོད་རེད།