རྒྱ་ནག་གི་རྡོ་སྣུམ་ལས་ཁང་གི་དེ་སྔའི་འགོ་ཁྲིད་བཙོན་འཇུག་བྱས་བ།

རྒྱ་ནག་གཞུང་གཉེར་རྡོ་སྣུམ་ལས་ཁང་གི་དེ་སྔའི་འགོ་ཁྲིད་མཐོ་གྲས་ཝང་ཡོང་ཁྲུན་ལ་ལྐོག་ཟའི་ནག་ཉེས་ཕོག་ནས་བཙོན་བཅུག་ཁྲིམས་ཐག་བཅད་པ།
དེ་ཡང་རྒྱ་ནག་གཞུང་གིས་རྒྱ་ནག་གཞུང་གཉེར་རྡོ་སྣུམ་ལས་ཁང་གི་དེ་སྔའི་འགོ་ཁྲིད་མཐོ་གྲས་ཝང་ཡོང་ཁྲུན་ལ་ལྐོག་ཟའི་ནག་ཉེས་འོག་ལོ་ངོ་ཉི་ཤུའི་བཙོན་བཅུག་ཁྲིམས་ཐག་བཅད་འདུག་ཅིང་། ཝང་ནི་རྒྱ་ནག་རྒྱལ་ནང་གི་བདེ་འཇགས་ལས་དོན་གྱི་འགོ་ཁྲིད་ཟུར་པ་ཚེ་བཙོན་གྱི་ནག་ཉེས་ཕོག་པ་ཀྲོའུ་ཡོན་ཁང་གི་ཉེ་འབྲེལ་ཞིག་ཡིན་པ་རེད།
རྒྱ་ནག་དབུས་ཤིང་ཡང་མི་དམངས་འབྲིང་རིམ་ཁྲིམས་ཁང་གིས་བཀའ་རྩ་བསྒྲགས་གཏམ་ཞིག་སྤེལ་བ་དེའི་ནང་། ཝང་ཡོང་ཁྲུན་ཐོག་ལྐོག་ཟ་དང་འབྱུང་ཁུངས་གཙང་མ་མེད་པའི་ཐོག་ནས་ལྐོང་རྔན་ལེན་པ། དེ་བཞིན་དབང་ཆ་སྒེར་སྤྱོད་བྱས་པ་སོགས་ཀྱི་ནག་ཉེས་འོག་ལོ་ཉི་ཤུའི་བཙོན་དུས་ཉེས་ཆད་བཏང་ལུགས་འཁོད་པ་མ་ཟད། ཝང་གི་ངོས་ནས་རྒྱ་མིའི་སྒོར་མོ་ས་ཡ་གཉིས་སམ་ཨ་སྒོར་གསུམ་འབུམ་ལྷག་གི་ཉེས་ཆད་འགྲུབ་དགོས་ལུགས་འཁོད་ཡོད་འདུག
ཝང་གིས་རྒྱ་ནག་གཞུང་འབྲེལ་རྡོ་སྣུམ་ལས་ཁང་གི་གཙོ་འཛིན་གཞོན་པའི་ལས་འཁུར་ལོ་གཉིས་ཙམ་བླངས་ཡོད་ཅིང་། དེའི་བར་ན་ཁོ་པས་ཁྲིམས་དང་སྒྲིག་གཞི་ཁག་ལ་འགལ་འཛོལ་ཆེན་པོ་བྱས་པའི་གྱོད་གཞིའི་འོག་ཁོ་པའི་ཐོག་ཞིབ་དཔྱོད་བྱེད་འགོ་ཚུགས་ཡོད་པ་རེད།
རྒྱ་ནག་ནང་མིང་འདྲ་མིན་བཏགས་པའི་ཤོག་ཁག་མང་པོ་ཞིག་ཡོད་པའི་ཁོངས་ནས་ཝང་ནི་རྡོ་སྣུམ་ཤོག་ཁག་ཟེར་བའི་ཁོངས་སུ་གཏོགས་ཤིང་། ཝང་ནི་གཟའ་འཁོར་འདིའི་ནང་རྡོ་སྣུམ་ཤོག་ཁག་གི་དཔོན་རིགས་ཟུར་པར་བཙོན་འཇུག་གི་ཉེས་ཆད་འགེལ་ཡུལ་གསུམ་པ་དེ་ཆགས་ཡོད་པ་རེད། གཟའ་ཟླ་བའི་ཉིན་རྒྱ་ནག་གཞུང་གཉེར་ཁེ་གཉེར་ལས་ཁང་ཁག་གི་སྒྲིག་ཁྲིམས་ལས་ཁང་གི་འགོ་ཁྲིད་ ཇིཡང་ཇིཡེ་མིན་དང་སི་ཁྲོན་ཞིང་ཆེན་གྱི་དམར་ཤོག་ཚོགས་པའི་གཙོ་འཛིན་གཞོན་པ་ ལཱི་ཆུན་ཁྲེང་ལ་ལྐོག་ཟའི་ནག་ཉེས་འོག་བཙོན་འཇུག་གི་ཉེས་ཆད་བཏང་ཡོད་པ་རེད།

གསར་འགོད་པ་སྤྱི་ཁྱབ་རྩོམ་སྒྲིག་འགན་འཛིན་སྐལ་ལྡན་བློ་གྲོས།