རྒྱ་ནག་ནང་མི་འབོར་ཞིབ་བཤེར་གྱི་ལས་གཞི་འགོ་འཛུགས་བྱ་རྒྱུ།

༄༅༎རེས་གཟའ་ཟླ་བ་ནས་རྒྱ་ནག་རྒྱལ་ཡོངས་མི་འབོར་ཞིབ་བཤེར་ཐེངས་དྲུག་པ་འགོ་བཙུགས་པ་དང༌། རྒྱ་ནག་རྒྱལ་ཡོངས་མི་འབོར་ཞིབ་བཤེར་གྱི་ལས་གཞི་དེ་ལོ་བཅུ་རེའི་ཐོག་ཐེངས་རེར་བྱེད་སྲོལ་ཡོད་པ་རེད།

དེཡང་འཛམ་གླིང་ནང་གི་མི་འབོར་མང་ཤོས་ཀྱི་རྒྱལ་ཁབ་རྒྱ་ནག་གི་མི་འབོར་གྲངས་བཤེར་ཁ་གསལ་དང་མི་འབོར་གྲངས་ཀ་གསར་པ་ངེས་གཏན་ཡོང་རྒྱུར་དམིགས་ཏེ། ཕྱི་ཟླ་༡༡པའི་ཚེས་༡ནས་འགོ་བཙུགས་པ་བཞིན་ཚེས་༡༠བར་མི་འབོར་གྲངས་བཤེར་བྱ་རྒྱུ་ཡིན་ཞིང༌། མི་འབོར་ཞིབ་བཤེར་གྱི་ལས་མི་ས་ཡ་དྲུག་ལྷག་གིས་ཁྱིམ་ཚང་གི་ཐེམ་དུད་མི་རེ་ངོ་རེར་བསྐྱོད་དེ་རྒྱ་ནག་རྒྱལ་ཡོངས་ཀྱི་ཐེམ་དུད་ས་ཡ་༤༠༠ཡོད་པ་ཚང་གྲངས་བཤེར་བྱེད་རྒྱུ་ཡིན་པ་རེད། དེ་ནས་ཕྱི་ཟླ་༡༡པའི་ཚེས་༡༡ནས་༣༠བར་མི་འབོར་ཞིབ་བཤེར་གཞན་ཞིག་བྱས་ཏེ། མི་འབོར་གྲངས་བཤེར་དངོས་སུ་ཕྱི་ཟླ་༡༢ནས་འགོ་བཙུགས་རྒྱུ་དང༌། གྲངས་འབོར་གྱི་བསྡོམས་རྩིས་ཕྱི་ལོ་༢༠༡༡ལོའི་ཕྱི་ཟླ་བཞི་པའི་ནང་བཏོན་རྒྱུའི་འཆར་གཞི་ཡོད་པ་རེད།