འབར་ཁམས་རྫོངས་སུ་ཆོས་ཕྱོགས་ཀྱི་འདུ་འཛོམས་ལ་དམ་བསྒྲཌ།

༄༅༎བོད་ཀྱི་མདོ་སྨད་འབར་ཁམས་རྫོངས་ནང་བོད་མི་རྣམས་ཆོས་ཕྱོགས་ཀྱི་འདུ་འཛོམས་ཞིག་གནང་རྒྱུར་རྒྱ་གཞུང་གིས་དམ་བསྒྲགས་བྱས་ཡོད་པ་རེད་

དེ་ཡང་ལོ་ལྟར་ཚོགས་བཞིན་པའི་འབར་ཁམས་རྫོངས་ནང་གི་ཚད་མའི་འདུ་ཚོགས་དེ་འདི་ལོའི་རེ་མོས་རྒྱལ་རོང་ཀིར་ཏི་མཚོ་བདུན་དགོན་པར་ཚོགས་གནང་ན་དགེ་འདུན་པ་རྣམས་འཛིན་བཟུང་དང་དེ་མིན་དགོན་པ་སྒོ་རྒྱབ་རྒྱུའི་བཀོད་རྒྱ་རྒྱ་གཞུང་གི་འབྲེལ་ཡོད་ཚན་པས་ཉེན་བརྡ་བཏང་ཡོད་པ་རེད་

འབར་ཁམས་རྫོངས་ཀྱིས་གོང་ཞུས་ཆོས་ཕྱོགས་ཀྱི་འདུ་ཚོགས་དེ་གནང་མ་ཆོག་པའི་རྒྱུ་མཚན་དེ་འདི་ལོ་ཕྱི་ཟླ་བརྒྱད་པའི་ནང་བཀོད་འདོམས་བྱས་པའི་ཆོས་ཕྱོགས་ཀྱི་ཚན་པ་ཁག་གིས་ལག་བསྟར་བྱེད་དགོས་པའི་སྒྲིག་གཞིའི་འབྲུ་དོན་ལ་གཞི་བཞག་ནས་བཀོད་འདོམས་བྱས་པའི་རྒྱུ་མཚན་འབྲང་ཡོད་པ་རེད་

གནས་ཚུལ་ནང་བཀོད་དོན་ལ་གཞིགས་ན་འདི་ལོའི་ཚད་མའི་འདུ་ཚོགས་གནང་ཡུལ་རྒྱལ་རོང་ཀིར་ཏི་འཚོ་འདུན་དགོན་པའི་གཡས་གཡོན་དུ་སྲུང་བྱའི་བསྐོར་སྲུང་བ་གང་མང་འགྲེམས་འཇོག་དང་དམ་བསྒྲགས་ཀྱི་ལས་དོན་ཤུགས་ཆེ་སྤེལ་བཞིན་ཡོད་པའི་གནས་ཚུལ་བཀོད་ཡོད་པ་རེད་            མདོ་སྨད་འབར་ཁམས་རྫོངས་ཀྱི་ཚད་མའི་འདུ་ཚོགས་དེ་ལོ་ལྟར་བོད་ཟླ་བཅུ་གཅིག་པའི་ནང་ཚོགས་གནང་སྲོལ་ཡོད་པ་དང་དེ་ཡང་མངའ་ཁུལ་གྱི་ཀིར་ཏི་དགོན་པ་བཞི་རེ་མོས་ཐོག་གནང་གི་ཡོད་ཅིང་དགོན་པ་ཁག་ནི་སྟག་ཚང་ལྷ་མོ་ཀིར་ཏི་དགོན་པ་དང་རྔ་པ་ཀིར་ཏི་ མཚོ་བདུན་ཀིར་ཏི་དང་ཧོར་ཚང་ཀིར་ཏི་བཅས་ཡིན་པ་རེད་ གོང་ཞུས་ཚད་མའི་འདུ་ཚོགས་དེ་ཕྱི་ལོ་ཉིས་སྟོང་བདུན་ལོར་འགོ་བཙུགས་གནང་བ་ཞིག་ཡིན་པ་དང་དེར་མདོ་སྨད་ཁུལ་གྱི་དགོན་པ་ལྔ་བཅུ་སྐོར་ཞིག་གི་དགེ་འདུན་པ་རྣམས་འདུ་ཚོགས་གནང་སྲོལ་ཡོད་པ་རེད་           མཚོ་བདུན་དགོན་པའི་དབུ་བླ་རྣམས་ཀྱིས་ཚད་མའི་འདུ་ཚོགས་སྐབས་སྲིད་དོན་གྱི་ལས་འགུལ་སོགས་མ་ཡོང་བའི་ཁས་ལེན་གནང་ཡང་དེར་རྒྱ་གཞུང་གི་འབྲེལ་ཡོད་དཔོན་རིགས་རྣམས་ཀྱིས་ངོས་ལེན་རྩ་བ་ནས་བྱས་མེད་པའི་གནས་ཚུལ་ཐོན་འདུག