ཀམ་པོ་ཌིཡ་གཞུང་གིས་ལྦི་གུར་མི་གྲངས་༢༢ཕྱིར་འབུད་བྱ་རྒྱུ།

༄༅༎ཀམ་པོ་ཌི་ཡའི་ནང་འབྱོར་ཏེ་ཡུལ་དེའི་ནང་སྲིད་དོན་སྐྱབས་བཅོལ་ཞུ་མཁན་ཝི་གུར་མི་གྲངས་ཉི་ཤུ་རྩ་གཉིས་ཡོད་པ་དེ་དག་ཀམ་པུ་ཌི་ཡ་ནས་ཕལ་ཆེར་རྒྱ་ནག་ཏུ་ཕྱིར་སློག་གཏང་རྒྱུ་ཡིན་པ་གཟའ་སྤེན་པའི་ཉིན་ཀམ་པོ་ཌི་ཡའི་གཞུང་གི་མགྲིན་ཚབ་པ་ཞིག་གིས་བརྗོད་འདུག
དེ་ཡང་ཡུལ་དེའི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ཀོཡེ་ཀུང་གིས་ཝི་གུར་མི་གྲངས་ཉི་ཤུ་ཐམ་པ་ཀམ་པོ་ཌི་ཡའི་ནང་ཁྲིམས་འགལ་གྱི་ཐོག་ནས་འཛུལ་ཡོད་པ་བརྗོད་པ་དང་། མི་གཉིས་གར་སོང་ཆར་མེད་དུ་སོང་ཡོད་པ་འགྲེལ་བརྗོད་བྱས་འདུག
ཨ་མི་རི་ཀ་དང་འཛམ་གླིང་མཉམ་འབྲེལ་རྒྱལ་ཚོགས་ནས་ཀམ་པོ་ཌི་ཡའི་གཞུང་གིས་ཝི་གུར་མི་རིགས་དེ་དག་རྒྱ་ནག་ཏུ་ཕྱིར་སློག་གཏང་ཐབས་ཀྱི་ལས་དོན་འགོག་ཐབས་བྱེད་བཞིན་ཡོད་པ་མ་ཟད།མཉམ་འབྲེལ་རྒྱལ་ཚོགས་ཀྱི་སྐྱབས་བཅོལ་ལས་དོན་ལྷན་ཁང་གི་མགྲིན་ཚབ་མ་ཞིག་གིས་ཀམ་པོ་ཌི་ཡའི་གཞུང་ནས་ཝི་གུར་མི་རིགས་དེ་དག་ལ་སྲིད་དོན་སྐྱབས་བཅོལ་གྱི་གནས་བབས་སྤྲོད་འོས་མཆིས་མིན་ཐད་ཀྱི་ཞིབ་འཇུག་ཀྱི་ལས་དོན་ཡོངས་སུ་ཟིན་མེད་པ་གསལ་བཤད་གནང་ཡོད་པ་རེད།
འོན་ཀྱང་ཀམ་པོ་ཌི་ཡའི་ཐོག་རྒྱ་ནག་གིས་གནོན་ཤུགས་ཆེན་པོ་སྤྲོད་བཞིན་ཡོད་ཅིང་།རྒྱ་ནག་གཞུང་གིས་ཝི་གུར་མི་རིགས་དེ་དག་ཁྲིམས་འགལ་ནག་ཉེས་ཅན་པ་ཡིན་པ་དང་།ཁོང་ཚོར་གསང་བའི་ཆོས་ལུགས་སྒྲིག་འཛུག་ཁག་གཅིག་གིས་རོགས་བྱས་ཏེཀམ་པོ་ཌི་ཡའི་ནང་ཁྲིམས་འགལ་གྱི་ཐོག་ནས་སླེབས་ཚུལ་བརྗོད་བཞིན་ཡོད་པ་རེད།ཀམ་པོ་ཌི་ཡའི་གཞུང་ནས་ཁོང་ཚོ་ཕྱིར་སློག་གཏང་རྒྱུའི་ཐག་གཅོད་དེ་གཟའ་ཉི་མའི་ཉིན་རྒྱ་ནག་གི་སྲིད་འཛིན་གཞོན་པ་ཤི་ཇི་པིང་ཀམ་པོ་ཌི་ཡར་མ་འབྱོར་སྔོན་བྱས་དགོས་ཆགས་པ་ཞིག་ཡིན་པ་གནད་དོན་དབྱེ་ཞིབ་པ་ཚོས་འགྲེལ་བརྗོད་བྱེད་བཞིན་ཡོད་པ་རེད།
ཀམ་པོ་ཌི་ཡའི་ནང་སྲིད་ལས་ཁུངས་ཀྱི་མགྲིན་ཚབ་པ་དམག་སྤྱི་ཆེའུ་སོཔ་ཧིཀ་གྱིས་ཝི་གུར་མི་རིགས་དེ་དག་གཟའ་འཁོར་འདིའི་ནང་ཚུད་ཕྱིར་འབུད་གཏངརྒྱུ་ཡིན་པ་བརྗོད་པ་དང་སྦྲགས།ཁོང་ཚོ་ས་གནས་གང་ཞིག་ཏུ་ཕྱིར་འབུད་གཏང་མིན་བརྗོད་མ་ཐུབ་ཀྱང ཕལ་ཆེར་ཁོང་ཚོ་ཡོང་ས་རྒྱ་ནག་རང་དུ་ཕྱིར་སློག་གཏང་སྲིད་པ་རེད་ཅེས་བརྗོད་འདུག
ད་བར་ཝི་གུར་མི་རིགས་དེ་དག་ཀམ་པོ་ཌི་ཡའི་གཞུང་དང་མཉམ་འབྲེལ་རྒྱལ་ཚོགས་ཀྱི་ཟུང་འབྲེལ་བལྟ་རྟོག་འོག་གནས་ཡོད་ཀྱང་།ད་ཆ་ཁོང་ཚོ་ཀམ་པོ་ཌི་ཡའི་གཞུང་ཁོ་ནའི་བལྟ་རྟོག་ཡོད་འདུག