ཨོསི་ཀྲོ་ལི་ཡས་བོད་དོན་ཐོག་ལས་འགུར་ཆེ་རུ་བཞེས་པའི་རེ་སྐུལ།

༄༅༎ཨོསི་ཀྲོ་ལི་ཡའི་གྲོས་ཚོགས་ནང་བོད་དོན་ཐོག་ལ་རྒྱབ་སྐྱོར་ཤུགས་ཆེ་གནང་མཁན་སྐུ་ཞབས་སྦོབ་སྦ་རའོན་མཆོག་གིས་བོད་ནང་གི་བོད་མི་ཚོར་རྒྱ་ནག་གཞུང་གིས་སྡུག་རྩུབ་མནར་གཅོད་བཏང་བའི་སྲིད་བྱུས་དེ་མཚམས་འཇོག་བྱ་ཐབས་སླད་དུ་ཨོསི་ཀྲོ་ལི་ཡའི་གཞུང་གིས་རྒྱ་ནག་གཞུང་གི་ཐོག་ལ་གནོན་ཤུགས་སྤྲོད་རྒྱུའི་ལས་འགུལ་དེ་ནུས་ཤུགས་ཆེ་རུ་གཏང་དགོས་ཀྱི་རེད་ཅེས་ཨོསི་ཀྲོ་ལི་ཡའི་སྲིད་བློན་ཀེ་ལྦིན་ར་ཌེ་མཆོག་ལ་རེ་སྐུལ་ཞུས་ཡོད་པ་རེད། ཨོསི་ཀྲོ་ལི་ཡའི་སྲིད་བློན་ཀེ་ལྦིན་ར་ཌེ་མཆོག་དང་རྒྱ་ནག་གི་བློན་ཆེན་བགྲེས་པ་ཀྲའོ་ཡོང་རྐང་རྣམ་གཉིས་དབར་ཚོང་འབྲེལ་ཐད་བདུན་ཕྲག་འདིའི་ནང་གྲོས་མོལ་གནང་གཏན་འཁེལ་ཡོད་པ་རེད། བོད་ལ་མིང་དོན་མཚུངས་པའི་རང་སྲིང་རང་སྐྱོང་གི་ཆབ་སྲིད་གནས་བབ་འཐོབ་རྒྱུའི་དམིགས་ཡུལ་གྲུབ་པའི་སླད་དུ་ཨོསི་ཀྲོ་ལི་ཡའི་གཞུང་གིས་ཨ་མི་རི་ཀའི་སྲིད་འཛིན་གསར་པ་སྐུ་ཞབས་སྦ་རག་ཨོ་སྦ་མ་མཆོག་དང་ལྷན་དུ་སྲིད་དོན་གྱི་ལས་འགུལ་མཉམ་རྩོམ་གནང་དགོས་ཀྱི་རེད་ཅེས་དང་བོད་ཀྱི་རྩ་དོན་ཐད་བཙན་བྱོལ་ནང་གནས་བཞིན་པའི་བོད་མི་རྣམས་དང་རྒྱ་ནག་གི་འགོ་ཁྲིད་ཚོའི་དབར་ཁ་ཞེ་གཉིས་མེད་ཀྱི་ལམ་ནས་འབྲེལ་མོལ་གནང་ཐབས་དང་ཤིན་ཏུ་འཇིགས་སྣང་སྐྱེ་རུང་བའི་དྲག་གནོན་འོག་ཏུ་བཞག་པའི་བོད་མི་རྣམས་ཀྱི་རང་དབང་དོན་དུ་ཨོསི་ཀྲོ་ལི་ཡ་དང་ཨ་མི་རི་ཀའི་གཞུང་གིས་འཕྱར་གྲུ་མཉམ་འདེགས་པ་ངང་ནུས་ཤུགས་ལྡན་པའི་ཆབ་སྲིད་ཀྱི་ལས་འགུལ་གསར་པ་ཞིག་ཕྱག་ལེན་བསྟར་དགོས་ཀྱི་རེད་ཅེས་ཨོསོ་ཀྲོ་ལི་ཡའི་གྲོས་ཚོགས་འཐུས་མི་སྐུ་ཞབས་སྦོབ་སྦ་རའོན་མཆོག་གིས་ནན་བརྗོད་གནང་ཡོད་པ་རེད༎