རྒྱ་ནག་གི་དབུས་ཧེན་ནན་ཞིང་ཆེན་ནང་འབར་གས་བྱུང་སྐོར།

༄༅༎རེས་གཟའ་པ་སངས་སྔ་དྲོའི་ཆུ་ཚོད་བཅུ་པ་ཙམ་ལ་རྒྱ་ནག་གི་དབུས་ཧེན་ནན་ཞིང་ཆེན་གྱི་ནན་དབྱངས་གྲོང་ཁྱེར་ནང་གི་ཐོག་རྩེགས་ཅན་གྱི་མི་དམངས་ཀྱི་སྡོད་ཁྱིམ་གྱི་ཐོག་རྩེགས་དང་པོའི་ཁང་མིག་ནང་འབར་གས་བྱུང་སྟེ་མི་གཉིས་རྐྱེན་ལམ་དུ་ཕྱིན་པ་དང་མི་གཅིག་རྨས་སྐྱོན་ཕོག་པའི་སྐོར་རྒྱ་ནག་གཞུང་འབྲེལ་ཤིང་ཧཱ་གསར་ཤོག་ཐོག་དེ་རིང་གསལ་བསྒྲགས་བྱས་ཡོད་པ་རེད།

ཐོག་མར་འབར་གས་ཀྱི་དོན་རྐྱེན་དེ་ཐོན་མ་ཐག་རྒྱ་ནག་གི་འབར་རྫས་རྟོགས་ཞིབ་ཆེད་ལས་པས་དེ་ནི་གློག་གི་རྒྱུ་རྐྱེན་ལ་བརྟེན་ནས་འབར་གས་བྱུང་བ་ཡིན་པ་འགྲེལ་བརྗོད་བྱས་པ་དང་ད་དུང་ས་གནས་ཉེན་རྟོག་དཔོ་རིགས་ལི་ཏ་ལྭའེ་ཟེར་བས་འབར་གས་བྱུང་ཡུལ་གྱི་སྡོད་ཁྱིམ་ནས་ཀི་ལོ་མི་ཊར་ཉི་ཤུ་ཙམ་གྱི་མཚམས་སུ་ཡོད་པའི་དམའ་རིམ་སློབ་ཆུང་ཞིག་ཡོད་པ་དེའི་ནང་གི་སློབ་ཕྲུག་ལ་རྨས་སྐྱོན་གང་ཡང་བྱུང་མེད་པའི་སྐོར་བཤད་ཡོད་ཅིང་ཡིན་ནའང་ཧོང་ཀོང་ནང་རྟེན་གཞི་བྱས་པའི་འགྲོ་བ་མིའི་ཐོབ་ཐང་དང་དམངས་གཙོ་ཁྱབ་སྤེལ་ཁང་གིས་གསལ་བསྒྲགས་སྤེལ་བའི་ནང་སྡོད་ཁྱིམ་འབར་གས་བྱུང་བའི་དོན་རྐྱེན་ནང་འབར་གས་བྱུང་ཡུལ་གྱི་ཉེ་ཁྲིད་དུ་ཡོད་པའི་སློབ་གྲྭ་ཞིག་གི་སློབ་ཕྲུག་འགའ་ཤས་གཙོས་གྲོང་མི་མི་གྲངས་བརྒྱ་ལྷག་རྨས་སྐྱོན་ཕོག་ཡོད་པའི་སྐོར་དང་འབར་གས་ཀྱི་དོན་རྐྱེན་དེ་ནི་གློག་གི་རྒྱུ་རྐྱེན་མ་ཡིན་པ་དེ་ནི་འབར་རྫས་ཤིག་ཡིན་པ་གསུངས་ཡོད་པ་རེད། ཡིན་ནའང་ཧོང་ཀོང་གི་འགྲོ་བ་མིའི་ཐོབ་ཐང་ཚོགས་པ་དེས་གནས་ཚུལ་དེ་རྣམས་ཀྱི་འབྱུང་ཁུངས་དང་ངོ་སྤྲོད་ལུང་འདྲེན་བྱེད་ཡུལ་གང་ཞིག་ཡིན་མིན་སྐོར་གསུངས་མེད་པ་དང་ཤིང་ཧཱ་གསར་ཤོག་ཐོག་ལའང་ད་ལྟ་བར་འབར་གས་ཀྱི་དོན་རྐྱེན་དེའི་འབྱུང་རྐྱེན་ག་རེ་ཡིན་མིན་སྐོར་བཤད་མེད་པ་རེད། ནན་དབྱངས་གྲོང་ཁྱེར་སྨན་ཁང་ཞིག་གི་སྨན་ཞབས་པ་མཚན་གསུངས་འདོ་མེད་པ་ཞིག་གིས་ཨེ་པི་གསར་འགོད་པར་དམའ་རིམ་སློབ་ཆུང་དེའི་སློབ་ཕྲུག་ལྔ་དང་དགེ་རྒན་གཅིག་ལ་རྨས་སྐྱོན་ཕོག་ཡོད་པ་དང་ཡིན་ནའང་ཁོང་ཚོའི་རྨས་སྐྱོན་ཚབས་ཆེན་པོ་མེད་པ་འགྲེལ་བརྗོད་བྱས་ཡོད་པ་རེད༎