ཨ་རིའི་སྲིད་འཛིན་སྐུ་གཞོན་རྒྱ་ནག་ཏུ་འཚམས་གཟིགས།

༄༅༎ཨ་རིའི་སྲིད་འཛིན་གཞོན་པ་ཇོ་སྦའེ་ཌེན་དེ་རིང་རྒྱ་ནག་ནང་རྒྱལ་དོན་འཚམས་གཟིགས་ཀྱི་ཆེད་ཕེབས་ཐོན་གནང་གི་འདུག གནས་ཚུལ་ཐོན་གསལ་ལ་གཞིགས་ན། ཨ་རིའི་སྲིད་འཛིན་གཞོན་པ་རྒྱ་ནག་ནང་ཉིན་གྲངས་ལྔའི་རིང་བཞུགས་ཞག་གནང་རྒྱུུན་རིང༌། ཡུལ་དེའི་སྲིད་འཛིན་ཧུའུ་ཇིན་ཐའོ་དང་སྲིད་འཛིན་གཞོན་པ་ཤི་ཅིན་ཕིང་རྣམ་གཉིས་མཇལ་འཕྲད་ཀྱིས་ཡུལ་གྲུ་གཉིས་ཀྱི་ཆབ་སྲིད་དང་དཔལ་འབྱོར་གྱི་འབྲེལ་ལམ་སྤྱི་དང༌། ལྷག་པར་དུ་རྒྱ་ནག་མི་མང་ཤོག་སྒོར་གྱི་འཛའ་ཐང་ལ་ཁྲོམ་རའི་འགྲོ་རྒྱུགས་དང་མཐུན་པའི་འགྱུར་བགྲོས་དགོས་པའི་གནད་དོན་སོགས་ཀྱི་སྐོར་བཀའ་བསྡུར་གནང་འཆར་ཡོད་པ་དང༌། ཡང་ད་ལྟའི་ཆར་རྒྱ་ནག་གི་སྲིད་འཛིན་གཞོན་པ་ཤི་ཅིན་ཕིང་གི་དགོངས་པ་བཞེས་ཕྱོགས་སྐོར་ཕྱི་ཕྱོགས་སུ་ཤེས་རྟོགས་དེ་ཙམ་མེད་པར་བརྟེན། སྲིད་འཛིན་གཞོན་པ་རྣམ་གཉིས་དབར་ཕན་ཚུན་དགོངས་ཚུལ་བརྗེ་རེས་དང༌། རྒྱུས་མངའ་ཆེ་ཙམ་ཡོང་ཐུབ་པའི་ཆེད། ཁོང་རྣམ་གཉིས་ལྷན་རྒྱས་རྒྱ་ནག་གི་ལྷོ་ནུབ་གྲོང་ཁྱེར་ཁྲིན་རྡུ་དང༌། དེའི་གཡས་གཡོན་གྱི་གྲོང་གསེབ་ཁག་ཏུ་གཟིགས་སྐོར་གནང་རྒྱུ་ཡིན་འདུག རྒྱ་ནག་ནང་ཉིན་ལྔའི་རྒྱལ་དོན་འཚམས་གཟིགས་གྲུབ་པའི་རྗེས། ཨ་རིའི་སྲིད་འཛིན་གཞོན་པ་ཇོ་སྦའེ་ཌེན་ཉི་ཧོང་དང༌། སོག་ཡུལ་དུ་ཕེབས་རྒྱུའི་འཆར་གཞི་ཡོད་པའི་གནས་ཚུལ་ཐོན་འདུག