འབྲུག་རྒྱལ་ཡོངས་སུ་གོམ་བགྲོད་ཀྱི་ཉིན་མོ་གཏན་འབེབས།

༄༅༎འབྲུག་ཡུལ་ནང་འདི་ཚེས་ ༥ ནས་བཟུང་རེས་གཟའ་མིག་དམར་’འཆར་ཅན། གོམ་བགྲོད་ཉིན་མོ་ཞེས་པ་ཞིག་འགོ་འཛུགས་བྱ་རྒྱུ་ཡིན་འདུག དེ་ཡང་འབྲུག་གི་ཀུན་གསལ་གསར་ཤོག་ཐོག་གནས་ཚུལ་སྤེལ་བར་གཞིགས་ན། འདི་ཚེས་ ༥ ཉིན་ རྒྱལ་སྤྱིའི་ཁོར་ཡུག་ཉིན་མོ་སྲུང་བརྩི་དང་སྟབས་བསྟུན་ནས། འབྲུག་ནང་རེས་གཟའ་མིག་དམར་འཆར་ཅན་གཞུང་གི་འགྲུལ་བསྐྱེལ་སྣུམ་འཁོར་དང༌། གླ་སླས་ཀྲེག་སི། ནད་པ་འོར་འདྲེན་སོགས་ཛ་དྲག་ཞབས་ཞུའི་སྣུམ་འཁོར་དང༌། རྐང་འཁོར་བཅས་པ་མ་གཏོགས་སྒེར་གྱི་མོ་ཀྲའི་རིགས་གྲོང་ཁྱེར་ཆེ་ཁག་གི་གཞུང་ལམ་ཐོག་འགྲོ་བསྐྱོད་མི་ཆོག་པ་བཟོ་རྒྱུ་ཡིན་འདུག་པ་དང༌། སྒེར་གྱི་མོ་ཀྲ་གཏོང་མི་ཆོག་པའི་དུས་ཚོད་དེ་སྔ་དྲོའི་ཆུ་ཚོད་བརྒྱད་པ་ནས་དགོང་དྲོའི་ཆུ་ཚོད་དྲུག་པ་བར་ལག་བསྟར་བྱ་རྒྱུ་ཡིན་པ་མ་ཟད། ཉིན་དེར་ཕྱོགས་ཕན་ཚུན་དུ་བསྐྱོད་མཁན་མང་ཚོགས་རྣམས་ཀྱིས་རབ་བྱུང་ན་གོམ་བགྲོད་དང༌། དེ་མིན་རྐང་འཁོར་བེད་སྤྱོད་གཏོང་བ་ལས། མོ་ཀྲའི་ནང་བསྐྱོད་མི་དགོས་པའི་གཙོ་དོན་གང་ཡོང་དགོས་པའི་སྐུལ་དེད་བྱ་རྒྱུའི་འཆར་གཞི་ཡོད་འདུག་ཅིང༌། གོམ་བགྲོད་ཀྱི་ཉིན་མོ་སྲུང་བརྩི་བྱེད་དགོས་པ་ནི། རྒྱལ་ཁབ་ནང་ཁོར་ཡུག་སྦག་གཙོག་ཉུང་དུ་གཏོང་རྒྱུར་དམིགས་པ་ཞིག་ཡིན་པའི་འགྲེལ་བརྗོད་བྱས་འདུག

འབྲུག་ཡུལ་ནི། བོད་ཀྱི་ལྷོ་ཕྱོགས་སུ་ཆགས་པའི་རྒྱལ་ཁབ་ཅིག་ཡིན་ཅིང༌། ཡུལ་དེའི་ནང་རྒྱལ་ཡོངས་བདེ་སྐྱིད་ཅེས་པའི་སྲིད་བྱུས་ཤིག་ལག་བསྟར་བྱེད་ཀྱི་ཡོད་པ་དང༌། སྲིད་བྱུས་དེའི་ཐོག་ནས། ཕྱི་དངོས་པོ་ཡར་རྒྱས་བཏང་བའི་མཉམ་དུ། མང་ཚོགས་ཀྱི་སེམས་ཀྱི་བདེ་བ་དང༌། ཁོར་ཡུག། ནང་ཆོས་དང་འབྲེལ་བའི་རྒྱལ་ཁབ་ཀྱི་ཐུན་མོང་མིན་པའི་རིགས་གཞུང་སྲུང་སྐྱོབ་བྱ་རྒྱུ་ཡང་གལ་གནད་ཆེན་པོ་བརྩི་བཞིན་ཡོད་པའི་འགྲེལ་བརྗོད་བྱས་འདུག།