རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་རྒྱ་གར་གཞུང་ལ་༧གོང་ས་མཆོག་ལ་རྒྱ་གར་གྱི་སྤྱི་དམངས་གཟེངས་རྟགས་མཐོ་ཤོས་འབུལ་དགོས་པའི་སྐུལ་མ་ཞུས་འདུག

ཉེ་ལམ་རྒྱ་གར་གྲོས་ཚོགས་ཀྱི་ཆབ་སྲིད་ཚོགས་པ་སྣེ་མང་འདུཔའི་གྲོས་ཚོགས་ཀྱི་འཐུས་མིའི་བོད་དོན་རྒྱབ་སྐྱོར་ཚོགས་པ་(All Party Indian Parliamentary Forum for Tibet)་དང་། རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པ་(Core Group for Tibetan Cause-India)་གཉིས་ཀྱི་ཚོགས་མི་རྣམ་པ་རྒྱལ་ས་ལྡི་ལིར་ལྷན་འཛོམས་ཐོག བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་རྒྱ་གར་གྱི་སྤྱི་དམངས་གཟེངས་རྟགས་མཐོ་ཤོས་(Bharat Ratna)་འབུལ་དགོས་པ་གྲོས་ཆོད་བཞག་པ་དང་། སྤྱི་ཟླ་༨པའི་འགོ་སྟོད་དུ་རྒྱ་གར་དབུས་གཞུང་ལ་གྲོས་ཆོད་དེ་ཕུལ་ཟིན་འདུག་པ་མ་ཟད། ད་དུང་གྲོས་ཆོད་དེའི་ནང་༧གོང་ས་སྐྱབས་མགོན་ཆེན་པོ་མཆོག་རྒྱ་གར་དབུས་ཀྱི་གྲོས་ཚོགས་ཚོགས་ཁང་ནང་གྲོས་ཚོགས་གོང་འོག་གི་འཐུས་མི་ཚང་འཛོམས་ཐོག་བཀའ་སློབ་ཆེད་གདན་ཞུའི་མཛད་འཆར་སྒྲིག་དགོས་པའི་བསམ་འཆར་ཡང་བཀོད་འདུག
རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་དང་རྒྱ་གར་གྲོས་ཚོགས་འོག་མའི་འཐུས་མི་སྐུ་ཞབས་(Tapir Gao)་ལགས་ཀྱིས། ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་ན། ༧གོང་ས་ཏཱ་ལའི་བླ་མ་མཆོག་ནི། འཛམ་གླིང་སྟེང་ཆེས་བསྟོད་ཞུ་ཡུལ་རླབས་ཆེན་གྱི་དབུ་ཁྲིད་ཡིན་པ་ཟད། རྒྱ་གར་གཞུང་གིས་ཁོང་ལ་(Bharat Ratna)་གཟེངས་རྟགས་ཕུལ་བ་ཡིན་ན། དེ་རྒྱ་གར་གྱི་གཟི་བརྗིད་ཡིན་པ་མ་ཟད། འཛམ་གླིང་ཁྱོན་ཡོངས་ལ་རེ་བ་དང་བཟང་ཕྱོགས་ཀྱི་བརྡ་ལན་ཞིག་ཀྱང་ཕུལ་ཐུབ་པར་བརྟེན། ཞི་བདེའི་དེད་དཔོན་ཆེན་པོ་ཁོང་ལ་གཟེངས་རྟགས་དེ་མགྱོགས་མྱུར་འབུལ་བའི་རེ་བ་ཡོད་ཅེས་འགྲེལ་བརྗོད་གནང་བྱུང་།
རྒྱ་གར་གྲོས་ཚོགས་འོག་མའི་འཐུས་མི་སྐུ་ཞབས་(Tapir Gao)་ལགས་ནི། བོད་དང་རྒྱ་གར་གྱི་ས་མཚམས་འཁེལ་ཡུལ་རྒྱ་གར་བྱང་ཤར་ཨ་རུ་ན་ཅལ་མངའ་སྡེའི་ནང་ཆགས་པའི་(BJP)་ཆབ་སྲིད་ཚོགས་པའི་ཚོགས་གཙོ་ཡིན་པར་མ་ཟད། རྒྱ་ནག་གིས་བོད་ནང་བཙན་འཛུལ་བྱས་པར་བྱས་པར་མཐའ་ཅིག་ཏུ་རྒྱ་ནག་གཞུང་ལ་དགག་པ་རྒྱག་མཁན་གྲས་ཤིག་ཀྱང་ཡིན་པ་རེད།
ཉེ་ཆར་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ལྷན་ཚོགས་ཐོག ཨ་མི་ཀས་༢༠༢༠ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་ཡིག་གཏན་འབེབས་གནང་བ་བཞིན། རྒྱ་གར་གྲོས་ཚོགས་ནང་དུ་ཡང་འདི་ལྟ་བུའི་ཁྲིམས་འཆར་བཏོན་དགོས་པའི་སྐོར་དགོངས་ཚུལ་གླེང་སློང་གནང་འདུག་པ་མ་ཟད། ལྷག་ཏུ་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་མ་འོངས་པའི་ཡང་སྲིད་ཀྱི་གནད་དོན་ཐད་བོད་མི་ཁོ་ན་མ་གཏོགས་རྒྱ་ནག་གཞུང་ལ་ཐེ་བྱུས་བྱེད་རྒྱུའི་དབང་ཆ་རྩ་བ་ནས་མེད་པའི་སྐོར་ཡང་གྲོས་བསྡུར་བྱས་འདུག
ཡང་ཉེ་ལམ་བསྐོང་ཚོགས་གནང་བའི་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་འདུའི་ཐོག་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་(Tibetan Rehabilitation Policy 2014)་གཞིར་བཟུང་། རྒྱ་གར་གྲོས་ཚོགས་འཐུས་མི་རྣམ་པ་ངེས་པར་དུ་བཙན་བྱོལ་བོད་མིའི་གཞིས་ཆགས་ཁག་ཏུ་འཚམས་གཟིགས་ཀྱིས། བོད་མིའི་འཚོ་བའི་གནས་སྟངས་རྒྱུས་ལོན་གནང་རྒྱུ་དང་། སྲིད་བྱུས་དེ་གཞིར་བཟུང་ས་གནས་བོད་མི་ཚོར་ཆུ་དང་གློག དེ་བཞིན་སྡོད་གནས་སོགས་ཀྱི་མཐུན་རྐྱེན་ཡོད་མེད་རྟོགས་ཞིབ་གནང་དགོས་པ་སོགས་ཀྱི་ཐད་གོ་བསྡུར་གནང་འདུག
གཞན་ཡང་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་གུས་བཀུར་ཞུ་མཁན་རྒྱ་གར་གྱི་གནད་ཡོད་མི་ཁག་ཅིག་དང་། དེ་མིན་གཞི་རིམ་མང་ཚོགས་ཀྱི་ཁྲོད་ནས་རྒྱ་གར་༧གོང་ས་མཆོག་ལ་རྒྱ་གར་གྱི་སྤྱི་དམངས་གཟེངས་རྟགས་མཐོ་ཤོས་(Bhara Ratna)་འབུལ་དགོས་པའི་ཞུ་གཏུག་གི་དྭངས་བླང་ལས་འགུལ་ཞིག་འགྲོ་བཞིན་ཡོད་ཅིང་། མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་གཞོན་ཟུར་པ་དང་། རྒྱ་གར་གྱི་གྲོས་ཚོགས་འོག་མའི་འཐུས་མི་འབུམ་རམས་པ་(Shashi Tharoor)་ལགས་ཀྱིས་ཀྱང་། ༧གོང་ས་ཏཱ་ལའི་བླ་མ་མཆོག་གིས་འདས་པའི་ལོ་ངོ་༦༣ལྷག་རིང་རྒྱ་གར་ནང་བཞུགས་ནས་རྒྱ་གར་གཙོས་འཛམ་གླིང་མི་མང་གི་བདེ་རྩར་ཕན་པའི་རླབས་ཆེན་གྱི་མཛད་རྗེས་ལ་ཆེ་བསྟོད་ཞུ་རྒྱུ་གལ་ཆེན་ཡིན་པ་གསུངས་ཏེ་༧གོང་ས་མཆོག་ལ་གཟེངས་རྟགས་དེ་འབུལ་དགོས་རྒྱུར་རྒྱབ་སྐྱོར་གནང་ཡོད་པ་རེད།
སྔ་ལོ་རྒྱ་གར་གྲོས་ཚོགས་ཀྱི་འཐུས་མིའི་བོད་དོན་རྒྱབ་སྐྱོར་ཚོགས་པའི་རྒྱུན་ལས་ལྷན་ཚོགས་ཀྱི་ཚོགས་འདུ་ཐེངས་དང་པོ་དེ་བསྐོང་ཚོགས་གནང་ཞིང་། ལྡི་ལིར་ཡོད་པའི་རྒྱ་ནག་གཞུང་ཚབ་ཁང་གིས་རྒྱ་གར་གྱི་གྲོས་ཚོགས་ཀྱི་འཐུས་མི་ཚོས་བོད་རང་བཙན་ལ་རྒྱབ་སྐྱོར་གྱི་ལས་དོན་སྤེལ་རྒྱུ་མཚམས་འཇོག་དགོས་ལུགས་བརྗོད་དེ་ཚོགས་འདུ་དེར་སྐྱོན་བརྗོད་བྱས་ཡོད་པ་རེད།
རྒྱ་གར་གྲོས་ཚོགས་ཀྱི་འཐུས་མིའི་བོད་དོན་རྒྱབ་སྐྱོར་ཚོགས་པའི་རྒྱུན་ལས་ལྷན་ཚོགས་ཀྱི་ཚོགས་གཙོ་ནི་ཧི་མ་ཅཱལ་མངའ་སྡེ་ནས་ཡིན་པ་རྒྱ་གར་གྲོས་ཚོགས་གོང་མའི་འཐུས་མི་སྐུ་ཞབས་སུ་ཇིཏ་ཀུ་མར་མཆོག་ཡིན་པ་རེད།

གསར་འགོད་པ། བློ་བཟང་དགེ་ལེགས།
རྩོམ་སྒྲིག་པ། དཔལ་ལྡན་རྒྱལ།
དྲ་ཐོག་རྩོམ་སྒྲིག་པ། སྐལ་ལྡན་བློ་གྲོས།
དྲ་ཐོག་སྤེལ་མཁན། ཀླུ་འབུམ།