གནམ་གཤིས་འགྱུར་ལྡོག་གི་དཀའ་ངལ་སེལ་རྒྱུའི་འབོད་སྐུལ།

༄༅༎འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྐུ་ཞབས་སྦན་ཀི་མུན་མཆོག་གིས་རྒྱལ་སྤྱིའི་སྤྱི་ཚོགས་ཀྱིས་གནམ་གཤིས་འགྱུར་ལྡོག་གི་དཀའ་ངལ་སེལ་ཐབས་གདོང་ལེན་གནང་བཞིན་པའི་ནང་རྒྱ་ནག་ཕྱོགས་ནས་ལས་དོན་དེའི་ནང་སྣེ་ཁྲིད་འགན་འཁུར་ཆེན་པོ་ལེན་དགོས་པའི་འབོད་སྐུལ་གནང་ཡོད་པ་རེད།

དེ་ཡང་སྐུ་ཞབས་སྦན་ཀི་མུན་མཆོག་གིས་དེ་རིང་གསུངས་དོན་ལ་འདི་ལོའི་རྒྱལ་སྤྱིའི་གནམ་གཤིས་འགྱུར་ལྡོག་གི་དཀའ་ངལ་སེལ་ཐབས་ཀྱི་ལས་དོན་གྱི་སྒྲོམ་གཞི་གསར་པ་དེ་ལམ་ལྷོང་ཡོང་རྒྱུར་ངེས་པར་དུ་རྒྱ་ནག་ཕྱོགས་ནས་འགན་འཁུར་རྐང་ལེན་དགོས་པ་དང་གལ་ཏེ་རྒྱ་ནག་ཕྱོགས་ནས་འགན་འཁུར་མ་ལེན་པ་ཡིན་ཚེ་ལས་དོན་དེར་གྲུབ་འབྲས་སོན་ཐུབ་རྒྱུ་མིན་པ་གསུངས་ཡོད་ཅིང་གང་ལྟར་རིང་མིན་ཕྱི་ཟླ་བཅུ་གཉིས་པའི་ནང་ཌེན་མཀ་ཀྱི་རྒྱལ་ས་ཁོ་པེན་ཧ་གེན་དུ་ཚོགས་རྒྱིུའ་འཛམ་གླིང་མཉམ་འབྲེལ་རྒྱལ་ཚོགས་ཀྱི་ལྷན་ཚོགས་ཐོག་ལ་འཛམ་གླིང་གི་གནམ་གཤིས་འགྱུར་ལྡོག་གི་དཀའ་ངལ་སེལ་ཐབས་ཀྱི་ཐབས་ལམ་འཚོལ་གྲུབ་གནང་རྒྱུ་དང་ལྷག་པར་དུ་འཛམ་གླིང་གི་གནམ་གཤིས་འགྱུར་ལྡོག་གི་དགཀའ་ངལ་དེ་ནི་གཙོ་བོ་མོ་ཊ་དང་བཟོ་གྲྭའི་དུག་རླངས་ཡིན་པ་ངོས་འཛིན་བྱེད་པ་ལྟར་མོ་ཊའི་དུག་རླངས་མེད་པ་བཟོ་ཐབས་འབད་བརྩོན་གནང་རྒྱུ་ཡིན་པ་རེད། ཡིན་ནའང་སྤྱི་ཁྱབ་དྲུང་ཆེ་སྦན་ཀི་མུན་མཆོག་གིས་བར་ལམ་རྒྱ་ནག་ཕྱོགས་ནས་དུག་རླངས་ཉུང་དུ་གཏོང་ཐབས་ལས་དོན་ཡར་རྒྱས་བཏང་སྟེ་རྡོ་སོལ་སོགས་ཀྱིས་ཆུ་ཚ་པོ་བཟོ་མི་དགོས་པར་ཉི་མའི་འོད་ལ་བསྟེན་པའི་ཆུ་དང་གློག་གི་ནུས་ཤུགས་མཁོ་འདོན་བྱེད་ཐབས་དང་རླུང་གི་ནུས་ཤུགས་ཀྱི་ཆ་རྐྱེན་སྐྲུན་ཐུབ་ཏེ་ལམ་ལྷོང་བྱུང་ཡོད་ནའང་ད་དུང་རྒྱ་ནག་ཕྱོགས་ནས་དུག་རླངས་ཆེས་མང་བའི་རྡོ་སོལ་བེད་སྤྱོད་ཤུགས་ཆེན་པོ་གཏོང་བཞིན་པ་དེ་དག་མུ་མཐུད་ཉུང་དུ་གཏོང་ཐབས་འབད་བརྩོན་བྱ་དགོས་པ་དང་ལྷག་པར་དུ་མོ་ཊའི་དུག་རླངས་ཀྱང་ཉུང་དུ་གཏོང་ཐབས་བྱས་པ་བརྒྱུད་རྒྱལ་སྤྱིའི་གནམ་གཤིས་འགྱུར་ལྡོག་གི་དཀའ་ངལ་སེལ་ཐབས་ཀྱི་ལས་དོན་ནང་ངེས་པར་དུ་སྣེ་ཁྲིད་ཀྱི་འགན་འཁུར་གཙོ་བོ་ལེན་དགོས་ཀྱི་རེད་ཅེས་གསུངས་ཡོད་པ་རེད།