ཨོ་སེ་ཀྲོ་ལི་ཡའི་སྲིད་བློན་ལ་བོད་དོན་གླེང་སློང་དགོས་པའི་ཞུ་སྐུལ།

༄༅༎བཙན་བྱོལ་བོད་གཞུང་གི་དྲ་རྒྱའི་ནང་གནས་ཚུལ་སྤེལ་བར་གཞིགས་ན། ཨོ་སེ་ཀྲེ་ལི་ཡིའི་བོད་དོན་རྒྱབ་སྐྱོར་ཚོགས་པ་(Australia Tibet Council)ཉེ་ཆར་སྲིད་བློན་ལྕམ་ཇུ་ལི་ཡ་གི་ལདྲ་མཆོག་རྒྱ་ནག་ལ་འཚམས་འདྲི་གཟིགས་བསྐོར་ཕེབས་པའི་སྐབས་ཞུ་སྙན་ཞིག་ཕུལ་ཡོད་པ་དེའི་ནང་། རྩ་བའི་ཨོ་སེ་ཀྲེ་ལི་ཡ་དང་རྒྱ་ནག་ཡུལ་གཉིས་དབར་ཚོང་འབྲེལ་དང་དཔལ་འབྱོར་གྱི་འབྲེལ་ལམ་ཡག་ཏུ་གཏོང་ཐབས་བྱེད་རྒྱུ་གལ་འགངས་ཆེན་པོ་ཡིན་པ་ང་ཚོས་ངོས་འཛིན་བྱེད་ཀྱི་ཡོད། ཡིན་ནའང་སྐུ་ཉིད་སྲིད་བློན་གནང་བ་ནས་བཟུང་རྒྱ་ནག་ལ་ཕེབས་པ་ཐོག་མ་ཡིན་དུས་ཡུལ་གཉིས་དབར་འགྲོ་བ་མིའི་ཐོབ་ཐང་གི་གནད་དོན་ཐོག་ལའང་བཀའ་བསྡུར་གནང་རྒྱུ་གལ་ཆེན་པོ་ཞིག་ཡིན་པའི་བརྡ་ལན་གསལ་པོ་སྤྲོད་གནང་དགོས་ཞེས་རྒྱ་ནག་གཞུང་ནས་ཉེ་ཆར་ནས་བཟུང་བོད་དང་རྒྱ་ནག་ནང་གི་རྩོམ་པ་པོ་དང་། སྒྱུ་རྩལ་བ། ཁོར་ཡུག་སྲུང་སྐྱོབ་དོན་གཉེར་བ་བཅས་ཀྱི་ཐོག་དམ་བསྒྲགས་ཇེ་ཤུགས་ཆེ་རུ་བཏང་ནས་དོ་དམ་བཀག་ཉར་བྱེད་པའི་གནས་ཚུལ་རྣམས་ལུང་གྲངས་གནང་ཡོད་པ་རེད།

ལྷག་པར་དུ་ཞུ་སྙན་དེའི་ནང་། བོད་ནང་རྒྱ་ནག་གཞུང་ནས་ཆབ་སྲིད་དང་ཆོས་ཕྱོགས་ཀྱི་ལས་དོན་བྱེད་སྒོ་ཁག་གི་ཐོག་དམ་བསྒྲགས་བྱས་དང་བྱེད་བཞིན་ཡོད་པ་མ་ཟད་བོད་མིའི་སྐད་ཡིག་དང་རིག་གཞུང་ཚུན་ཆད་ངོ་བོ་རྩ་མེད་བཟོ་རྒྱུའི་སྲིད་བྱུས་འཛིན་བཞིན་པ་དེ་དག་ཐོག་གླེང་སློང་དང་། ཕྱོགས་གཉིས་ཀྱི་དཀའ་རྙོག་སེལ་ཐབས་སུ་དམིགས་ནས་གྲོས་མོལ་བསྐྱར་གསོ་ཡོང་ཐབས་ཀྱི་འབོད་སྐུལ་གནང་དགོས་ལུགས་ཀྱང་ཞུས་ཡོད་པ་རེད། ཡང་ཞུ་སྙན་དེའི་ནང་། ཉེ་ཆར་ཨོ་སེ་ཀྲེ་ལི་ཡའི་གྲོས་ཚོགས་འཐུས་མིའི་སྐུ་ཚབ་བོད་ནང་ཕེབས་པའི་སྙན་ཐོའི་ནང་བཀོད་གནང་ཡོད་པ་ལྟར་བོད་ནང་རྒྱ་རིགས་ཕོན་ཆེ་གཞིས་སྤོས་བྱེད་བཞིན་པ་དེས་བོད་རིགས་དང་རྒྱ་རིགས་གཉིས་དབར་གང་ས་ཅིའི་ཐད་ནས་དབྱེ་འབྱེད་ཀྱི་ཐོབ་ཐང་འདྲ་མཉམ་ཞིག་ཡོང་གི་མེད་པ་དང་། རྒྱ་ནག་གཞུང་ནས་གསལ་བསྒྲགས་བྱེད་བཞིན་པའི་དཔལ་འབྱོར་འཛུགས་སྐྲུན་གྱི་ལས་གཞི་དང་། མཐུན་འགྱུར་རོགས་རམ་རྣམས་བོད་མི་ཚོར་ཁེ་ཕན་དགོས་ངེས་ཤིག་ཐོབ་ཀྱི་མེད་པའི་གཟིགས་ཚུལ་རྣམས་བསྐྱར་བཟློས་ཞུས་ནས་དེ་དག་གི་ཐོག་ལའང་རྒྱ་ནག་གཞུང་གི་དཔོན་རིགས་མཇལ་འཕྲད་གནང་བའི་སྐབས་གླེང་མོལ་གནང་དགོས་ལུགས་ཞུས་ཡོད་འདུག