བོད་ནང་མུ་མཐུད་དམ་བསྒྲགས་ཤུགས་ཆེ་བྱེད་བཞིན་པ།

༄༅༎བོད་ནང་ད་དུང་ཡང་མུ་མཐུད་དམ་བསྒྲགས་ཤུགས་ཆེ་བྱེད་བཞིན་ཡོད་པའི་སྐོར་རྒྱལ་སྤྱིའི་ཉེས་ཡང་ཚོགས་པས་དེ་རིང་རེས་གཟའ་ཕུར་བུའི་ཉིན་གསལ་སྟོན་གནང་བཞག

འདི་ལོ་ཕྱི་ཟླ་གསུམ་པའི་ནང་བོད་ཀྱི་རྒྱལ་ས་ལྷ་ས་གཙོ་བོར་གྱུར་བའི་བོད་ས་ཡོངས་སུ་རྒྱ་ནག་གཞུང་ལ་ཞི་བའི་ངོ་རྒོལ་གྱི་ལས་འགུལ་ཁྲོད་རྒྱ་ནག་གཞུང་གིས་དམ་བསྒྲགས་ཤུགས་ཆེ་བྱས་ནས་བོད་མི་ཆིག་སྟོང་ལྷག་ཙམ་འཛིན་བཟུང་བཙོན་འཇུག་བྱས་པ་རྣམས་ད་དུང་ཡང་ནག་ཉེས་ཇི་ཡིན་ཐག་གཅོད་མ་བྱས་པར་མུ་མཐུད་འཛིོན་བཟུང་བཀག་ཉར་བྱེད་བཞིན་ཡོད་པ་རེད་ཅེས་རྒྱལ་སྤྱིའི་ཉེས་ཡང་ཚོགས་པས་དེ་རིང་རེས་གཟའ་ཕུར་བུའི་ཉིན་བཏོན་གནང་བའི་སྙན་ཐོའི་ནང་བཀོད་གནང་འདུག

ཡང་སྙན་ཐོ་དེའི་ནང་མུ་མཐུད་འཁོར་པར་ལྟར་ན་ གོང་ཞུས་འཛིན་བཟུང་བྱས་པའི་བོད་མི་ཁག་ལ་ཁྲིམས་རྩོད་པ་དང་ནང་མིས་ཞུ་གཏུགས་གནང་ཡང་རྒྱ་ནག་གཞུང་ཕྱོགས་ནས་དངས་ལེན་བྱེད་ཀྱི་མེད་པ་རེད་ཅེས་བཀོད་འདུག

ཡང་དབྱིན་ཇིའི་རྒྱལ་ས་ལོན་ཌོན་ནང་ཡོད་པའི་རྒྱལ་སྤྱིའི་ཉེས་ཡང་ཚོགས་པའི་ཨེ་ཤེ་ཡའི་ཞི་བདེ་རྒྱ་མཚོའི་འགན་འཛིན་སཱེམ་ཛ་རི་ཕཱི་ཡིས་ རྒྱ་ནག་གཞུང་གིས་བོད་མི་མང་པོ་འཛིན་བཟུང་བྱེད་དགོས་པའི་རྒྱུ་མཚན་དང་ཁོང་ཚོའི་ནག་ཉེས་ཁག་གསལ་སྟོན་མ་བྱས་པར་གང་བྱུང་གིས་བཙོན་འཇུག་བྱས་པ་རེད་ཅེས་དང་བོད་མི་དེ་རྣམས་ལ་ཁྲིམས་ཐོག་ནས་ཉེས་པ་བཅད་པ་ཡིན་ནའི་རེད་ཡང་ན་མགྱོགས་མྱུར་གློད་བཀྲོལ་བྱེད་དགོས་ཀྱི་རེད་ཅེས་ཁོང་གིས་ཞལ་པར་བརྒྱུད་རོའུ་ཀྲར་གསར་འགྱུར་ལས་ཁང་དུ་གསལ་སྟོན་གནང་བཞག

དེ་བཞིན་ཡང་རྒྱ་ནག་ཕྱི་སྲིད་ལས་ཁང་གི་མགྲིན་ཚབ་པ་དབྱང་ཡུས་ལ་གསར་འགྱུར་བརྒྱུད་ལམ་ཁག་ནས་བཅའ་འདྲི་བྱས་པའི་སྐབས་ཁོ་མོས་རྒྱལ་སྤྱིའི་ཉེས་ཡང་ཚོགས་པས་སྟོན་པའི་སྙན་ཐོ་མཐོང་མ་བྱུང་ཡིན་ནའི་ང་ཚོས་གསལ་པོ་ཤེས་ཡས་ལ་གོང་ཞུས་ཚོགས་པ་དེ་ག་དུས་ཡིན་ནའང་རྒྱ་ནག་གཞུང་ལ་ངོ་རྒོལ་བྱེད་མཁན་ཕྱོགས་རིས་ཡོད་པའི་ཚོགས་པ་ཞིག་ཡིན་པ་དང་ཚོགས་པ་དེས་ག་དུས་ཡིན་ནའང་རྒྱ་ནག་གཞུང་ལ་རྒོལ་རྡུང་གཏོང་རྒྱུའི་འགན་སྲུང་མེད་པའི་སྙན་ཐོ་ཤ་སྟགས་འགྲེམས་སྤེལ་བྱེད་ཀྱི་རེད་ཅེས་གསར་འགྱུར་བརྒྱུད་ལམ་ཁག་ཏུ་ལན་འདེབས་བྱས་ཡོད་པ་རེད་།