རྒྱ་ནག་གཞུང་གིས་བལ་ཡུལ་ཉེན་རྟོག་པར་དངུལ་སྤྲད་སྐོར།

༄༅༎རྒྱ་ནག་གཞུང་གིས་བལ་ཡུལ་གྱི་ཉེན་རྟོག་པར་མ་དངུལ་སྤྲད་ནས་བལ་ཡུལ་བརྒྱུད་སྐྱབས་བཅོལ་དུ་ཡོང་མཁན་བོད་མི་ཚོ་རྒྱ་ནག་གི་ས་མཚམས་དམག་མིར་རྩིས་སྤྲོད་དགོས་ལུགས་་བཤད་ཡོད་པ་ལྦི་ཀི་ལིཀ་སི་wikileaksདྲ་རྒྱས་གནས་ཚུལ་ཕྱིར་བཏོན་བྱས་ཡོད་འདུག  

ཉེ་བའི་ཆར་ལྦི་ཀི་ལིཀ་སི་ཞེས་པའི་དྲ་རྒྱས་ཨ་རིའི་གཞུང་ཚབ་ཀྱི་དཔོན་རིགས་ཚོའི་དྲ་རྒྱའི་ཐོག་གི་ཡིག་འགྲུལ་གྱི་གསང་བའི་གནས་ཚུལ་ཕྱིར་བསྒྲགས་རིམ་པ་བྱས་ཡོད་པ་ནས་བལ་ཡུལ་ནང་ཡོད་པའི་ཨ་རའི་གློག་འཕྲིན་ཐོག་གི་གནས་ཚུལ་ཕྱིར་གྱར་བྱས་པའི་ནང་རྒྱ་ནག་གཞུང་གིས་བལ་ཡུལ་གྱི་ས་མཚམས་ཉེན་རྟོག་དམག་མིར་དངུལ་སྤྲད་ནས་བལ་ཡུལ་བརྒྱུད་སྐྱབས་བཅོལ་དུ་ཡོང་མཁན་བོད་མི་ཚོ་བཀག་ཉར་གྱིས་རྒྱ་ནག་གི་ས་སྲུང་ཉེན་རྟོག་པར་རྩིས་སྤྲོད་དགོས་པའི་གནས་ཚུལ་རྒྱ་གར་གྱི་རྒྱལ་ས་ལྡི་ལིའི་ནང་ཡོད་པའི་གཞུང་ཚབ་ཁང་གི་མིང་འབོད་བྱས་མེད་པའི་དཔོན་རིགས་ཤིག་ལ་ད་ལོ་ཕྱི་ཟླ་གཉིས་པའི་ནང་གློག་འཕྲིན་ཡིག་འགྲུལ་ཐོག་འཁོད་ཡོད་པ་རེད་ 

ཨ་རིའི་གཞུང་ཚབ་ཀྱི་འབྲེལ་ཡོད་མི་སྣ་ཞིག་གིས་གཟའ་ཉི་མའི་ཉིན་གློག་འཕྲིན་གནས་ཚུལ་ཕྱིར་གྱར་བྱས་པའི་སྐོར་འགྲེལ་བརྗོད་གནང་དོན་ལྟར་ན་ གནས་ཚུལ་དེའི་ནང་པེ་ཅིན་གཞུང་གིས་བལ་ཡུལ་ས་སྲུང་ཉེན་རྟོག་པས་བལ་ཡུལ་གྱི་ས་མཚམས་བརྒྱུད་ནས་བྲོས་བྱོལ་དུ་སྐྱོད་མཁན་གྱི་བོད་མི་ཚོར་དམ་བསྒྲགས་བཀག་སྡོམ་བྱེད་ཤུགས་ཆེ་རུ་གཏོང་དགོས་པའི་རེ་འདུན་བཏོན་ཡོད་པ་གསུངས་འདུག ཡིན་ནའི་གོང་ཞུས་ལྦི་ཀི་ལིཀ་སི་དྲ་རྒྱས་ཨ་རིའི་གཞུང་ཚབ་དཔོན་རིགས་ཀྱི་གློག་འཕྲིན་ཡི་གེ་ཕྱིར་བསྒྲགས་བྱས་པའི་ནང་རྒྱ་ནག་གཞུང་གིས་བལ་ཡུལ་གྱི་ཉེན་རྟོག་པར་དངུལ་སྤྲད་ནས་བོད་མི་བྲོས་བྱོལ་དུ་ཡོང་མཁན་ཚོ་རྒྱ་ནག་གི་ས་མཚམས་ཉེན་རྟོག་པར་རྩིས་སྤྲོད་དགོས་པའི་གནས་ཚུལ་དེ་རིགས་ནི་གཞི་རྩ་གང་ཡང་མེད་པའི་འཆལ་གཏམ་ཡིན་ལུགས་བལ་ཡུལ་ཉེན་རྟོག་ལས་ཁང་གི་མགྲིན་ཚབ་པས་འགྲེལ་བརྗོད་བྱས་ཡོད་པ་རེད་ བལ་ཡུལ་ཉེན་རྟོག་ལས་ཁང་གི་མགྲིན་ཚབ་པ་དེས་བརྗོད་ན་ བལ་ཡུལ་ཉེན་རྟོག་པས་འཇུ་བཟུང་བྱས་པའི་བོད་མི་བྲོས་བྱོལ་བ་དེ་དག་བལ་ཡུལ་ཕྱི་མི་གཞིས་ཆགས་ལས་ཁུངས་སུ་རྩིས་སྤྲོད་བྱེད་ཀྱི་ཡོད་པ་ལས་རྒྱ་ནག་གི་ས་མཚམས་དམག་མིར་རྩིས་སྤྲོད་བྱེད་ཀྱི་མེད་ལུགས་ཕ་རན་སི་གསར་འགྱུར་བརྒྱུད་ལམ་ལ་འགྲེལ་བརྗོད་བྱས་འདུག