ཨིན་ཇིའི་གསར་ལས་ཁང་དུ་བོད་སྐད་འཛུགས་ཐབས།

༄༅༎ཨིན་ཇིའི་གྲོས་ཚོགས་ཀྱི་བོད་དོན་རྒྱབ་སྐྱོར་བ་ཚོས་དབྱིན་ཇིའི་སྐད་གྲགས་ཆེ་བའི་གསར་འགྱུར་ལས་ཁང་སྦི་སྦི་སི་(BBC)ནང་བོད་སྐད་བརྙན་འཕྲིན་སྡེ་ཚན་གསར་པ་ཞིག་འཛུགས་རྒྱུའི་འབད་བརྩོན་གནང་རྒྱུའི་འཆར་གཞི་ཡོད་པ་རེད།
དེ་ཡང་ཨིན་ཇིའི་གྲོས་ཚོགས་ཀྱི་བོད་དོན་རྒྱབ་སྐྱོར་བ་འཐུས་མི་ཁག་ཅིག་ད་རེས་ཕྱི་ཟླ་བཅུ་པའི་ཚེས་༣ ནས་༧ བར་ཉིན་གྲངས་ལྔའི་རིང་བཙན་བྱོལ་བོད་མིའི་སྒྲིག་འཛུགས་ཀྱི་ལྟི་གནས་བཞུགས་སྒར་རྡ་རམ་ས་ལར་འཚམས་འདྲིར་ཕེབས་ཏེ། བོད་མི་དམངས་སྤྱི་འཐུས་གྲོས་ཚོགས་སྐབས་༡༥ པའི་ཚོགས་དུས་གཉིས་པའི་ཐོག་གཟིགས་ཞིབ་ཏུ་ཕེབས་པ་དང༌། བཙན་བྱོལ་བོད་མིའི་སྲིད་སྐྱོང་མཆོག་དབུས་པའི་གནད་ཡོད་མཛད་གཙོ་རྣམ་པ་དང་མཇལ་འཕྲད་ཞུས་ཡོད་པ་མ་ཟད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་ཁ་ཞུས་ཡོད་པ་རེད། དེ་ནས་ཕྱི་ཟླ་བཅུ་པའི་ཚེས་བདུན་འཚམས་འདྲི་ཉིན་མཐའ་མའི་སྐབས་སྐུ་ཚབ་འཐུས་མི་ཚོས་བོད་མི་དམངས་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་མཉམ་ཞུགས་ཀྱིས་གསར་འགོད་ལྷན་ཚོགས་ཤིག་སྐོང་ཚོགས་གནང་ཡོད་པ་རེད། ཕྱི་ཚེས་༧ ཉིན་བོད་བང་ཆེན་དྲ་རྒྱའི་ཐོག་སྤེལ་བའི་གནས་ཚུལ་ནང། སྐབས་དེར་གསར་འགོད་ལྷན་ཚོགས་དེའི་ཐོག་ཨིན་ཡུལ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་མཆོག་ནས་གཏམ་བཤད་སྤེལ་བའི་ནང༌། ད་རེས་ཕྱི་ཚེས་༤ ཉིན་ཁོང་རྣམས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་ཁ་ཞུས་པའི་སྐབས། བོད་ནང་གི་བོད་པའི་སློབ་ཕྲུག་ཨིན་ཇིའི་མཐོ་སློབ་ཁང་ནང་སློབ་གཉེར་བྱ་རྒྱུར་རྒྱ་རིགས་སློབ་གཉེར་བྱེད་མཁན་རྣམས་དང་གཅིག་མཚུངས་ཀྱི་མཐུན་འགྱུར་སྦྱར་ཐབས་ཞུ་རྒྱུ་དང༌། རྒྱ་ནག་མི་དམངས་དང་འབྲེལ་བ་བྱས་ཏེ་འདས་ཟིན་པའི་བོད་ཀྱི་གནས་སྟངས་རྣམས་རྒྱ་ནག་མི་དམངས་ཚོར་གོ་རྟོགས་སྤེལ་རྒྱུའི་ལས་དོན་སྤེལ་རྒྱུའི་གནད་དོན་གཙོ་བོ་དེ་གཉིས་ཐོག་བཀའ་བསྡུར་ཞུ་རྒྱུའི་གོ་སྐབས་བྱུང་བའི་སྐོར་གསུང་ཡོད་པ་དང་ཆབས་ཅིག་ཨིན་ཇིའི་BBC གསར་འགྱུར་ལས་ཁང་དེ་ནི་འཛམ་གླིང་ནང་སྐད་གྲགས་ཅན་ཞིག་ཏུ་ངོས་འཛིན་བྱེད་པ་བཞིན་གསར་འགྱུར་ལས་ཁང་དེའི་ནང་བོད་སྐད་བརྙན་འཕྲིན་སྡེ་ཚན་ཞིག་གསར་འཛུགས་ཐུབ་རྒྱུའི་འཆར་གཞི་ཡོད་ཀྱང་ལས་དོན་དེ་ལས་སླ་པོར་གྲུབ་ཐུབ་པའི་བྱ་བ་ཞིག་མིན་ནའང་ཁོང་རྣམ་པ་ཚོའི་ངོས་ནས་གང་ཐུབ་ཀྱི་འབད་བརྩོན་ཞུ་རྒྱུ་ཡིན་ཞེས་གསུང་ཡོད་པའི་བཀོད་ཡོད་པ་རེད། ཨིན་ཡུལ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པ་དང་བོད་མི་དམངས་སྤྱི་འཐུས་ལྷན་ཚོགས་དབར་གྲོས་ཚོགས་ཀྱི་འཐུས་མི་ཕན་ཚུན་འཚམས་འདྲིར་འགྲོ་འོང་གིས་ཉམས་མྱོང་སྤེལ་རེས་ཀྱི་ལས་གཞི་དེ་༢༠༠༦ ནས་འགོ་བཙུགས་ཡོད་པ་རེད།།