རྒྱ་གར་ནུབ་སྦེང་གོལ་མངའ་སྡེའི་འོས་བསྡུ།

༄༅༎དེ་རིང་རྒྱ་གར་ཤར་ཕྱོགས་ནུབ་སྦེང་གོལ་མངའ་སྡེའི་ནང་འོས་ཤོག་བསྡུ་ལེན་གནང་ཡོད་པ་ལྟར། ཐེངས་འདིའི་འོས་བསྡུའི་ནང་རྒྱ་གར་དབུས་མེ་འཁོར་བློན་ཆེན་ལྕམ་མམ་ཏ་སྦེ་ནར་ཇི་ཡིས་ ད་ཕན་ལོ་༣༤རིང་མངའ་སྡེའི་སྲིད་དབང་འཛིན་མཁན་དམར་ཤོག་ཚོགས་པར་ཕམ་ཉེས་གཏོང་རྒྱུའི་རེ་བ་ཆེན་པོ་ཡོད་པ་རེད།

ལྕམ་མམ་ཏ་སྦེ་ནར་ཇི་ཡི་ཆབ་སྲིད་ཚོགས་པ་ཏྲི་ན་མུལ་ཚོགས་པ་དེ་བཞིན་རྒྱ་གར་གཞུང་འཛིན་ཀོང་རེ་སི་ཚོགས་པའི་མཐུན་ཕྱོགས་ཡིན་པ་དང༌། ཁོང་ལ་ད་རེས་འོས་བསྡུའི་རྒྱལ་ཁ་ཐོབ་པ་ཡིན་ན་གཞུང་འཛིན་ཀོངྒ་རེསི་ཚོགས་པའི་ནུས་ཤུགས་ཆེ་རུ་འགྲོ་རྒྱུར་ཕན་ཐོགས་ཡོད་པ་ཞིག་རེད། ལྕམ་མམ་ཏ་སྦེ་ནར་ཇི་ཡིས་ནུབ་སྦེང་གོལ་མངའ་སྡེའི་མེ་འཁོར་ལས་གཞི་ཡར་རྒྱས་གཏོང་རྒྱུའི་འཆར་གཞི་འགྲེལ་བརྗོད་གནང་བ་དང་སྦྲགས། ཁོང་ལ་རྒྱབ་སྐྱོར་ཞུ་མཁན་མང་ཚོགས་ལ། ནུབ་སྦེང་གོལ་མངའ་སྡེ་དེ་བཞིན་སུད་སི་ནང་ལྟར་བཟོས་གནང་རྒྱུའི་ཁས་ལེན་གནང་བཞག། མམ་ཏ་སྦེ་ནར་ཇི་ལ་ད་རེས་འོས་བསྡུའི་རྒྱལ་ཁ་ཐོབ་གནང་བ་ཡིན་ན། ཁོང་གི་ཚོགས་པར་རྒྱལ་ཡོངས་གྲོས་ཚོགས་ནང་འཐུས་མིའི་གདན་གྲངས་༡༩ཡོད་པ་དེའི་ཐོག་སྲིད་བློན་མན་མོ་ཧན་སིངྒ་མཆོག་གིས་དབུ་འཁྲིད་པའི་གཞུང་གིས་རྒྱབ་བརྟེན་གནང་དགོས་ཐུག་རྒྱུ་ཡིན་པ་མ་ཟད། ལྕམ་སྦེ་ནར་ཇི་ཡང་མན་མོ་ཧན་སིངྒ་མཆོག་གི་གཞུང་ཐོག་ཤུགས་རྐྱེན་ཐེབས་ཐུབ་པའི་མངའ་སྡེའི་སྲིད་དོན་པ་ནུས་ཤུགས་ཆེ་བ་ཞིག་ཆགས་གནང་རྒྱུ་ཡིན་པ་རེད། འོས་བསྡུའི་གྲུབ་འབྲས་དེ་བཞིན་རིང་མིན་ཕྱི་ཟླ་༥ཚེས་༡༣ཉིན་གསལ་བསྒྲགས་གནང་རྒྱུ་ཡིན་པ་རེད།