མི་ཚེའི་མདུན་ལམ།

༄༅།    །རེས་གཟའ་ཟླ་བ་ཕྱི་ཚེས་ ༢༩ ཉིན་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་གོ་སྒྲིག་ཐོག    བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེ་མཆོག་གིས་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་མི་ཚེའི་འདུན་ལམ་དང་ཤེས་ཡོན། ཞེས་པའི་བརྗོད་གཞིའི་ཐོག་གསུང་བཤད་གནང་འདུག
དེ་ཡང་དབུས་བོད་མིའི་སྒྲིག་འཛུགས་ཀྱི་དྲ་གནས་ཐོག་སྤེལ་བའི་གནས་ཚུལ་ལྟར་ན།    བཀའ་བློན་ཁྲི་ཟུར་མཆོག་གིས་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་དགེ་ལས་སློབ་ཕྲུག་ཡོངས་ལ་གསུང་བཤད་གནང་སྐབས།    མི་ཚེའི་མདུན་ལམ་ཞེས་པ་དེ་འཚོ་བ་སྐྱེལ་བ་གཅིག་པུ་མིན་སྐོར་ངོ་སྤྲོད་དང་འབྲེལ།    མི་ཚེའི་མདུན་ལམ་དེ་འཚོ་བ་སྐྱེལ་བ་གཅིག་པུའི་དོན་དག་ཅིག་ཡིན་ན། བོད་ཀྱི་གཏམ་དཔེར། ཁ་གཅིག་ལག་པ་གཉིས་ཀྱིས་གསོ་མ་ཐུབ་པ་ཡོད་མ་རེད། ཟེར་བའི་བཤད་སྟངས་ཤིག་ཡོད་རེད། བོད་ལ་སྐལ་བཟང་དུས་བཟང་གི་སྐབས་ཡིན་ན། ལྟོགས་ཤི་ཐེབས་མཁན་ཕལ་ཆེར་བྱུང་མྱོང་ཡོད་མ་རེད་ཅེས་གསུངས་འདུག
མཁས་དབང་ཟམ་གདོང་རིན་པོ་ཆེ་མཆོག་གིས་ད་དུང་།    ང་རང་ཚོ་མི་ཡིན་པ་ཙམ་གྱིས་མ་ཚད་མདོ་དང་བསྟན་བཅོས་ནས་བཤད་པའི་དལ་བ་བརྒྱད་དང་འབྱོར་བ་བཅུ་ཚང་བའི་མི་ལུས་རེད། དེར་བརྟེན་དེ་དག་ཆུ་ཟོས་སུ་བཏང་ན་ཡ་མཚན་པོ་རེད། རྟོག་དཔྱོད་བྱེད་མཁན་གྱི་གང་ཟག་ཅིག་ཡིན་ཕྱིན་ཆད། ཐག་གཅོད་ག་འདྲ་ཞིག་བྱས་ན་ཡང་དགོས་པ་དང་རྒྱུ་མཚན་ལ་བརྟེན་ནས་བྱུང་བ་ཞིག་མ་གཏོགས། དགོས་པ་མེད་པར་བྱས་པ་ཡིན་ན།        རྟོག་དཔྱོད་ལྡན་པའི་གང་ཟག་ཆགས་ཀྱི་མེད། མི་ཚེ་སྐྱེལ་སྟངས་ལ་བསམ་བློ་གཏོང་དགོས་པ་དེ།    མིའི་འགྲོ་བ་དེ་སྤྱི་ཚོགས་ལ་བརྟེན་པའི་སྲོག་ཆགས་ཤིག་རེད་མ་གཏོགས། བསེ་རུ་ལྟ་བུ་ཁེར་རྐྱང་དུ་འཚོ་ཐུབ་མཁན་གྱི་སྲོག་ཆགས་ཤིག་མ་རེད། གང་ལྟར་མི་ཚེའི་མདུན་ལམ་ལ་བསམ་བློ་གཏོང་སྐབས་འཇིག་རྟེན་གྱི་གནས་བབ་དེ་ཤེས་དགོས་པ་ཞིག་རེད་ཅེས་བཀའ་གནང་འདུག།