༸གོང་ས་མཆོག་གང་མགྱོགས་སྨན་ཁང་ནས་ཕྱིར་ཕེབས་རྒྱུ།

༄༅༎བོད་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རེས་གཟའ་པ་སངས་ཉིན་མཁྲིས་རྡོ་གཤག་བཅོས་གྲུབ་ཏེ་ཉིན་གྲངས་གསུམ་ཕེབས་ཀྱི་ཡོད་པ་དང་སྐུ་ཁམས་ཀྱི་གནས་སྟངས་ཧ་ཅང་གི་ཡག་པོ་ཡོད་པར་བརྟེན་གང་མགྱོགས་སྨན་ཁང་ནས་ཕེབས་ཐོན་གནང་གི་ཡོད་པ་རེད།

༸གོང་ས་༸སྐྱབས་མགོན་ཆེན་པོ་མཆོག་ཁ་སྔོན་ཕྱི་ཟླ་བརྒྱད་པའི་ནང་སྐུ་ཁམས་བདེ་མིན་གྱིས་རྒྱ་གར་གྱི་གྲོང་ཁྱེར་མུམ་སྦའེ་སྨན་ཁང་དུ་སྐུ་གཟུགས་འཕྲོད་བཞེས་ཀྱི་བརྟག་དཔྱད་གནང་བའི་རྗས་ཟླ་བ་འདིའི་ཕྱི་ཚེས་བཅུ་ཉིན་རྒྱ་གར་གྱི་རྒྱལ་ས་ལྡི་ལིའི་གང་ག་རམ་སྨན་ཁང་དུ་འཁྲིས་རྡོ་གཤག་བཅོས་གནང་ཡོད་ཅིང་རེས་གཟའ་སྤེན་པའི་ཉིན་སྨན་ཁང་དེས་ནས་༸གོང་ས་མཆོག་གི་སྐུ་ཁམས་ཡག་པོ་ཡོད་པ་དང་ཉིན་མ་གཅིག་གཉིས་ནང་ལ་སྨན་ཁང་ནས་ཕེབས་ཐོན་གནང་རྒྱུ་ཡིན་པ་གསུངས་ཡོད་པ་མ་ཟད་སྐུ་སྒེར་ཡིག་ཚང་གི་མགྲིན་ཚབ་པ་སྟག་ལྷ་བསྟན་འཛིན་ལགས་ཀྱིས་ཕེ་རན་སི་གསར་འགོད་པར་༸གོང་ས་མཆོག་གཤག་བཅོས་གནང་བ་དང་སྐྱེས་མགྱོགས་པོ་ཡང་བཞིན་པ་དང་ཕལ་ཆེར་རེས་གཟའ་ཟླ་བ་འམ་ཡང་ན་མིག་དམར་ཉིན་སྨན་ཁང་ནས་ཕེབས་ཐོན་གནང་སྟེ་གཟའ་འཁོར་གཅིག་རིང་མུ་མཐུད་སྐུ་ཁམས་བརྟག་དཔྱད་ཀྱི་ཆེད་དུ་གྲོང་ཁྱེར་ལྡི་ལིའི་ནང་བཞུགས་ཞག་གནང་རྒྱུ་ཡིན་ཞིང་དེ་རྗེས་བཞུགས་སྒར་རྡ་རམ་ས་ལར་ཆིབས་བསྒྱུར་གནང་སྟེ་སྔོན་གྱི་མཛད་འཆར་ལྟར་ཟླ་བ་འདིའི་ཟླ་མཇུག་ཙམ་ལ་ཉི་ཧོང་དུ་ཆིབས་བསྒྱུར་བསྐྱང་རྒྱུ་མ་ཟད་ཆོས་འབྲེལ་གྱི་མཛད་འཆར་ཁག་དབུ་བཙུགས་གནང་རྒྱུའི་འཆར་གཞི་ཡོད་པ་དང་ཡིན་ནའང་ད་ལྟའི་ཆར་༸གོང་ས་མཆོག་སྐུ་ངལ་གསོ་རྒྱུ་གལ་འགངས་ཆེན་པོ་ཡིན་པ་གསུངས་ཡོད་པ་རེད༎