བལ་ཡུལ་གྱིས་ཇོ་མོ་གླང་མའི་སྟེང་རི་འཛེགས་པ་བཏང་བ།

༄༅༎བལ་ཡུལ་གཞུང་གིས་རྒྱ་ནག་གི་ ཨོ་ལིམ་པིཀ རྩེད་འགྲན་གྱི་དཔལ་འབར་བོད་ཀྱི་ཇོ་མོ་གླང་མའི་རི་རྩེར་འཁྱེར་བའི་བྱེད་སྒོ་རེས་གཟའ་ཕུར་བུའི་ཉིན་ཚར་བའི་རྗེས་ཕྱི་རྒྱལ་རི་འཛེགས་པ་རྣམས་ཇོ་མོ་གླང་མའི་རེ་འཛེགས་ཀྱི་སྒོ་མོ་འབྱེད་ཡོད་པ་རེད། བར་ལམ་རྒྱ་ནག་གི་ ཨོ་ལིམ་པིཀ་རྩེད་འགྲན་གྱི་དཔལ་བར་རྒྱལ་སྤྱིའི་ནང་བསྐོར་བསྐྱོད་བྱས་པའི་སྐབས་བོད་མི་དང་

བོད་དོན་རྒྱབ་སྐྱོར་གནང་མཁན། འགྲོ་བ་མིའི་ཐོབ་ཐང་ཚོགས་པ་སོགས་ཀྱིས་ངོ་རྒོལ་ལས་འགུལ་སྤེལ་བ་བཞིན་རྒྱ་ནག་གཞུང་གིས་བོད་ཀྱི་ཇོ་མོ་གླང་མའི་རི་

རྩེར་དཔལ་འབར་འཁྱེར་བའི་སྐབས། ངོ་རྒོལ་གྱི་ལས་འགུལ་རིགས་འགོག་ཐབས་ཀྱི་ཆེད་དུ་བལ་ཡུལ་གཞུང་ལ་གནོན་ཤུགས་སྤྲད་དེ་བལ་ཡུལ་ཕྱོགས་ནས་ཇོ་མོ་གླང་མའི་རི་འཛེགས་ཀྱི་འགྲོ་ལམ་རྣམས་ཉིན་གྲངས་དགུའི་རིང་བཀག་འགོག་བྱས་ཏེ། ད་ཆ་རྒྱ་ནག་གི་ ཨོ་ལིམ་པིཀ དཔལ་འབར་ཇོ་མོ་གླང་མའི་རི་རྩེར་འཁྱེར་བའི་བྱེད་སྒོ་ཚར་བ་ལྟར་ད་རིང་བལ་ཡུལ་གྱི་ཡུལ་སྐོར་སྤྲོ་འཆམ་བློན་ཆེན་ དྷི་ནེཤ་ ཨདྷི་ཀ་རི་ ཡིས་ད་བར་བལ་ཡུ

ལ་ཕྱོགས་ནས་ཇོ་མོ་གླང་མའི་རི་འཛེགས་བྱ་རྒྱུར་བསྒུག་སྡོད་བྱས་མཁན་གྱི་རི་འཛེགས་པར་རྣམས་རི་འཛེགས་ཀྱི་ཐོན་བསྐྱོད་བྱ་རྒྱུར་སྒོ་མོ་འབྱེད་ཡོད་པའི་སྐོར་གསུངས་ཡོད་རེད། ཇོ་མོ་གླང་མའི་རི་འཛེགས་པ་བརྒྱ་ཕྲག་འགའ་ཤས་ཕྱི་ཟླ་ལྔ་པའི་ཚེས་ ༡ ནས་རི་གཤམ་གྱི་འབབ་ཚུགས་སུ་རྒྱ་ནག་གི་ ཨོ་ལིམ་པིཀ་ རྩེད་འགྲན་གྱི་དཔལ་འབར་རི་རྩེར་འཁྱེར་རྒྱུའི་བྱེད་སྒོ་ཚར་རྒྱུར་བསྒུགས་སྡོད་བྱས་ཏེ། རི་འཛེགས་ཀྱི་གནམ་དུས་སུ་ཡག་ཤོས་ཀྱི་དུས་ཚོད་ཡོལ་འགྲོ་རྒྱུའི་བློ་འཚབ་བྱུང་ཡོད་པ་རེད། སྤྱིར་བཏང་བལ་ཡུལ་གཞུང་གིས་ལོ་ལྟར་བཞིན་ཇོ་མོ་གླང་མའི་རི་འཛེགས་ཀྱི་གནམ་དུས་ཡག་ཤོས་དཔྱིད་ཀའི་དུས་ཚོད་དེའི་སྐབས་རི་

འཛེགས་པ་ ༢༩༠ རུ་ཁག ༣༢ ལ་ཆ་བགོས་བྱས་ཏེ་རི་འཛེགས་ཆོག་པའི་ཆོག་མཆན་སྤྲོད་སྲོལ་ཡོད་པ་དང་། ད་ལོའི་རི་འཛེགས་རྣམས་ད་རིང་གཞི་ནས་རི་གཤམ་གྱི་འབབ་ཚུགས་ནས་ཐོན་བསྐྱོད་བྱེད་ཀྱིས་ཡོད་ནའང་། རི་འཛེགས་ཀྱི་གནམ་དུས་ཡག་ཤོས་དེ་བཞིན་ཉིན་ཤས་རྗེས་ཡོལ་འགྲོ་གི་ཡོད་པར་བརྟེན་རི་རྩེར་བར་སླེབས་ཐུབ་མིན་གྱི་བློ་དོགས་བྱེད་ཀྱི་ཡོད་པ་རེད༎