རྒྱ་ནག་གཞུང་གིས་མདོ་སྨད་རྨ་ལྷོ་ཁུལ་དུ་དམ་བསྒྲགས།

དེ་ཡང་གནས་ཚུལ་ལྟར་ན། ས་གནས་རྒྱ་གཞུང་གི་འཛིན་སྐྱོང་དཔོན་རིགས་ཚོས་རོང་བོ་དགོན་ཆེན་ཡོད་སའི་རེབ་གོང་ས་གནས་ནང་ཕྱི་རྒྱལ་མི་རིགས་འཛུལ་བསྐྱོད་བྱེད་མ་ཐུབ་པ་བཟོ་ཕྱིར་མི་མང་འཛོམས་སའི་ས་ཁུལ་ཁག་ཚང་མར་རྒྱ་མིའི་ཉེན་རྟོག་པ་མང་དུ་བཏང་ནས་དཔུང་དམག་གིས་སྐོར་གཡེང་བྱེད་ཤུགས་ཆེ་རུ་བཏང་ཡོད་པ་དང་། དེ་ནི་ཉེ་ཆར་ཕྱི་རྒྱལ་གསར་འགོད་པ་གཉིས་ཁུལ་དེའི་ནང་འཛུལ་ཐུབ་ཡོད་པས་ཡིན་འདུག

Huffington Post གསར་ཤོག་གིས་ལུང་འདྲེན་བྱས་པའི་ནང༌། རྒྱ་ནག་གི་འཛིན་སྐྱོང་དཔོན་རིགས་ཚོས་བོད་ནང་རང་ལུས་མེར་བསྲེགས་ཀྱི་དོན་རྐྱེན་བསྐྱར་དུ་མི་ཡོང་བའི་དོན་དུ་ མེ་རྫས་རིགས་ལ་དམ་དྲག་དང༌། ས་གནས་བོད་མིའི་ཐོག་མྱུལ་ཞིབ། རང་ལུས་མེར་བསྲེགས་བཏང་བའི་དོན་རྐྱེན་ལ་སྐྱོན་བརྗོད་བྱེད་མཁན་དྲིལ་བསྒྲགས་ཚོགས་ཆུང་བཀོད་སྒྲིག་བྱེད་བཞིན་ཡོད་པ་རེད། དེ་དང་ཕྱོགས་མཚུངས་རྒྱ་མིའི་འཛིན་སྐྱོང་མི་སྣས་ས་གནས་བོད་མི་ཚོས་ཕྱི་ཕྱོགས་ཀྱི་གསར་འགྱུར་བལྟ་ཉན་ཐུབ་པའི་སྲུང་སྐར་སྡེར་མ་ཁག་གཞུང་བཞེས་འཕྲོག་ལེན་བྱ་རྒྱུ་དང༌། གསར་འགྱུར་ཕབ་ལེན་ཐུབ་པའི་འཕྲུལ་ཆས་རིགས་ཚོང་སྒྱུར་བྱེད་མཁན་གྱི་ཚོང་ལས་ཚང་མ་ཞིབ་གཤེར་དེབ་སྐྱེལ་བྱ་རྒྱུ། དགོན་སྡེ་ཁག་གི་ནང་བརྙན་འཕྲིན་༣༠༠༠བརྗེ་ལེན་བྱ་རྒྱུ་སོགས་ཀྱི་འཆར་གཞི་ཡོད་པ་རེད།

ཡང་དེ་བཞིན་རེ་ཊར་གསར་ལས་ཁང་གིས་སྤེལ་བའི་གནས་ཚུལ་ནང༌། རྒྱ་གཞུང་གི་དཔོན་རིགས་ཚོས་བོད་ཀྱི་དགོན་སྡེ་ཁག་༣༠༠ནང་ནས་བརྙན་འཕྲིན་ཚང་མ་གཞུང་བཞེས་འཕྲོག་ལེན་བྱས་པ་དང༌། རྒྱ་ནག་གཞུང་ལ་སྐྱོན་བརྗོད་ཀྱི་ལས་རིམ་རྒྱང་སྲིང་བྱེད་མཁན་སྲུང་སྐར་སྡེར་མ་ཚང་མ་བཀོག་ལེན་བྱས་ཡོད་ཅིང༌། ཧོང་ནན་ཞིང་ཆེན་ནང་སྤྱི་ཚོགས་བདེ་འཇགས་དམ་འཛིན་བྱ་རྒྱུའི་དུས་ཚོད་འགག་རྩ་ཅན་དེའི་སྐབས་སུ་བདེ་འཇགས་སྲུང་སྐྱོབ་ཀྱི་ལས་དོན་ནུས་ཤུགས་ཆེ་རུ་གཏོང་དགོས་རྒྱུ་དང༌། ལྷག་པར་དུ་རང་ལུས་མེར་བསྲེགས་ཀྱི་དོན་རྐྱེན་མེད་པ་བཟོ་རྒྱུའི་དམག་འཐབ་ཤུགས་ཆེ་རུ་གཏོང་དགོས་ཀྱི་རེད་ཅེས་རྒྱ་གཞུང་གིས་བརྗོད་འདུག།

ཟླ་བ་སྔོན་མར་རྒྱ་ནག་གི་འབྲེལ་ཡོད་ཚན་པས་རྨ་ལྷོ་ཁུལ་དུ་རང་ལུས་མེར་བསྲེགས་ཀྱི་དོན་རྐྱེན་སྐོར་གཞུང་ལ་བརྡ་ལན་སྤྲོད་མཁན་བྱུང་ཚེ་དངུལ་གྱི་བྱ་དགའ་སྤྲོད་རྒྱུའི་གསལ་བསྒྲགས་ཀྱང་བྱས་ཡོད་པ་རེད།