ཕྱི་མི་ཚོས་མིང་བཀོད་དྲ་རྒྱ་བརྒྱུད་བྱེད་ཐུབ་པའི་མཐུན་རྐྱེན།

༄༅༎རྒྱ་གར་བྱང་ཕྱོགས་བཞུགས་སྒར་རྡ་རམ་ས་ལ་ཆགས་ཡུལ་ཀངག་ར་རྫོངས་ཀྱི་ཕྱི་མི་དེབ་སྐྱེལ་ལས་ཁུངས་ཀྱི་ལས་དོན་མང་དག་ཅིག་དྲ་རྒྱའི་བརྒྱུད་ལམ་ནས་བྱེད་ཐུབ་པ་བཟོས་ཡོད་འདུག
བཞུགས་སྒར་རྡ་རམ་ས་ལར་ལོ་ལྟར་ཕྱི་རྒྱལ་ཡུལ་སྐོར་སྤྲོ་འཆམ་པ་སྟོང་ཕྲག་མང་པོ་སླེབས་བཞིན་ཡོད་ཅིང་།སྔ་ལོ་ཕྱི་ཟླ་བཅུ་གཅིག་པའི་ནང་རྒྱ་གར་གྱི་དཔལ་འབྱོར་ལྟེ་གནས་ཀྱི་གྲོང་ཁྱེར་མུམ་བྷཡི་ནང་འཇིགས་བསྐུལ་དྲག་སྤྱོད་པས་གཏོར་རྒོལ་ཚབས་ཆེ་བཏང་པའི་དོན་རྐྱེན་བྱུང་རྗེས།ཕྱི་མི་རྒྱ་གར་དུ་ཡོང་མཁན་ཚང་མས་དུས་ཐོག་ས་གནས་ཉེན་རྟོག་ལས་ཁུངས་ཀྱི་ཁྱབ་ཡོངས་ཕྱི་མི་དེབ་སྐྱེལ་ལས་ཁུངས་སུ་མིང་བཀོད་དེབ་སྐྱེལ་བྱེད་དགོས་པ་བཟོས་ཡོད་པ་དང་།རྡ་རམ་ས་ལར་ཡོང་མཁན་གྱི་ཕྱི་མི་ཡུལ་བསྐོར་སྤྲོ་འཆམ་པ་ཚོས་དྲ་རྒྱའི་ཐོག་ནས་མིང་བཀོད་དེབ་སྐྱེལ་ཐུབ་པ་བཟོས་ཡོད་འདུག
ཀངག་ར་རྫོང་གི་ཉེན་རྟོག་པའི་སྤྱི་ཁྱབ་ཨ་ཏུལ་ཕུལ་ཛི་ལི་ཡིས་རྡ་རམ་ས་ལར་ཡོང་མཁན་གྱི་ཕྱི་རྒྱལ་ཡུལ་སྐོར་སྤྲོ་འཆམ་པ་མང་པོ་ཞིག་སྒེར་པའི་ཁྱིམ་ཚང་ཁག་གི་ནང་གནས་ཚང་གཡར་ཏེ་བསྡད་ཀྱི་ཡོད་སྟབས།ས་གནས་ཉེན་རྟོག་ལས་ཁུངས་སུ་མིང་བཀོད་དེབ་སྐྱེལ་བྱེད་ཀྱི་མེད་པ་གསུངས་པ་དང་།ད་ཆ་དྲ་རྒྱའི་ལམ་ནས་དེབ་སྐྱེལ་བྱ་རྒྱུའི་མཐུན་རྐྱེན་སྦྱར་བ་དེས་མིང་བཀོད་དེབ་སྐྱེལ་བྱ་མཁན་མང་དུ་འགྲོ་རྒྱུ་དང་།དེའི་ཐོག་ནས་ཉེན་རྟོག་པ་ཚོར་ལ་ཡང་དགོས་ངེས་ཀྱི་གནས་ཚུལ་ཐོབ་རྒྱུའི་རེ་བ་གནང་གི་ཡོད་ཅེས་གསུངས་འདུག
དྲ་རྒྱ་དེའི་ཐོག་རྒྱ་གར་ནང་གནས་སྡོད་བོད་མི་སྐྱབས་བཅོལ་བ་ཚོས་ཀྱང་མིང་བཀོད་དེབ་སྐྱེལ་བྱ་ཕྱོགས་ཀྱི་སློབ་སྟོན་གནས་ཚུལ་ཡང་ཡོད་པ་དང་།ཀངག་ར་རྫོང་གི་ཉེན་རྟོག་སྤྱི་ཁྱབ་པས་གསུངས་ན།རྫོང་དེའི་ནང་གནས་སྡོད་བྱ་མཁན་བོད་མི་བརྒྱ་ཅ་དགུ་བཅུ་གོ་དགུ་ཙམ་གྱི་ཉེན་རྟོག་ལས་ཁུངས་དང་དེ་མིན་གྱི་འབྲེལ་ཡོད་ལས་ཁུངས་ཁག་ལ་དེབ་སྐྱེལ་ཚུལ་མཐུན་བྱས་ཡོད་པ་ཡང་འགྲེལ་བརྗོད་གནང་འདུག།