རང་ལུས་མེར་བསྲེགས་པ་ཚོར་དྲན་རྟེན་གྱི་རྡོ་བརྐོས།

རྒྱ་མི་རིགས་བོད་དོན་རྒྱབ་སྐྱོར་བས་བོད་ནང་རང་ལུས་མེར་བསྲེགས་མཁན་ཚོར་དྲན་རྟེན་གྱི་རྡོ་བརྐོས་ཤིག་བཟོ་སྐྲུན་གནང་ཡོད་འདུག
དེ་ཡང་Australiaའི་ནང་གནས་སྡོད་བྱེད་མཁན་རྒྱ་མི་རིགས་Chen Wei Mingལགས་ཀྱིས་བོད་ནང་དུ་རང་ལུས་མེར་བསྲེགས་བཏང་མཁན་ཚོར་དྲན་རྟེན་གྱི་རྡོ་བརྐོས་ཤིག་བཟོ་བསྐྲུན་བྱས་ཡོད་པ་དང་། དེའི་འགྲོ་སོང་གཏོང་མཁན་རྒྱ་མི་རིགས་ལྕམ་Qi Jia Zhenཡིན་ཞིང་། ཚེས་༡༠ཉིན་བཞུགས་སྒར་རྡ་རམ་ས་ལའི་འགྲེམས་སྟོན་ཁང་དུ་རྡོ་བརྐོས་དངོས་སུ་བཤམས་སྟོན་བྱས་པའི་མཛད་སྒོ་ཞིག་ཚོགས་པའི་ཐོག་Qi Jia Zhen ཡིས། རྡོ་བརྐོས་དེ་བཟོ་བསྐྲུན་བྱེད་དགོས་པའི་དམིགས་ཡུལ་ནི། རྒྱ་ནག་མི་དམངས་ཀྱིས་བོད་དོན་ཆེད་དུ་རང་ལུས་མེར་བསྲེགས་བཏང་མཁན་བོད་མི་འདས་སོན་ཡོངས་ལ་གདུང་སེམས་མཉམ་བསྐྱེད་དང་གུས་བཀུར་གྱི་མཚོན་དོན་ཞིག་ཡིན་པ་དང། བོད་ནང་དུ་བོད་མི་ཚོས་ངོ་རྒོལ་གྱི་ལས་འགུལ་མཚམས་མི་ཆད་པར་སྤེལ་བ་དང། རང་ལུས་མེ་བསྲེགས་ཀྱི་དོན་རྐྱེན་བསྟུད་མར་ཐོན་བཞིན་པའི་འབྱུང་རྐྱེན་ནི། རྒྱ་ནག་གཞུང་གིས་སྤྱི་ལོ་༡༩༤༩ནང་བོད་དུ་བཙན་འཛུལ་བྱས་པ་ནས་བཟུང་བོད་མི་རིགས་དང། ཁོང་ཚོའི་རིག་གཞུང། ཆོས་ལུགས་ཐོག་ལ་དྲག་གནོན་མུ་མཐུད་བྱས་པའི་མཇུག་འབྲས་ཤིག་ཡིན་པ་དང། བོད་ནང་དུ་རང་ལུས་མེར་བསྲེགས་བཏང་མཁན་ཚོས་བོད་མི་ཚོར་རང་དབང་དགོས་པའི་དགོས་འདུན་བཏོན་པ་ལས་ཁོང་ཚོས་མི་གཞན་ལ་འཚེ་བའི་བྱ་བ་གང་ཡང་བྱས་མེད་པའི་བརྟེན་ང་ཚོ་རྒྱ་མི་རིགས་ཚོས་ཀྱང་བོད་ཀྱི་རིག་གཞུང་དང་བོད་མི་རིགས་ཀྱི་བྱམས་བརྩེའི་སྤྱོད་བཟང་ལ་མིག་དཔེ་བལྟས་ནས་བསླབ་བྱ་ལེན་དགོས་པའི་གཏམ་བཤད་གནང་ཡོད་པ་རེད། བཙན་བྱོལ་དབུས་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་ལགས་ཀྱིས་རྡོ་བརྐོས་དེ་བཤམ་སྟོན་གྱི་རས་དར་ཕྱེ་བ་མ་ཟད། ཁོང་གིས་བོད་མི་ཚོས་བོད་དོན་བདེན་མཐའ་སེལ་ཐབས་སུ་འཚེ་མེད་ཞི་བའི་ཐོག་ནས་ལས་འགུལ་སྤེལ་རྒྱུ་དང། བོད་རྒྱ་དཀའ་རྙོག་སེལ་ཐབས་ལ་གཉིས་ཕན་དབུ་མའི་ལམ་གྱི་སྲིད་ཇུས་རྒྱུན་འཁྱོངས་གནང་གི་ཡོད་པའི་སྐོར་བསྐྱར་དུ་ནན་བརྗོད་གནང་བའི་ཁར་རྒྱ་མི་རིགས་ཚོས་བོད་དོན་ཐོག་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུ་བའི་གཏམ་བཤད་གནང་ཡོད་པ་རེད།
གསར་འགོད་པ་ཉི་མ་གཡུ་སྒྲོན།