འབར་མས་རྒྱལ་སྤྱིའི་རོཊ་རམ་ལ་དགའ་བསུ་ཞུས་པ།

༄༅༎ཉེ་ཆར་འབར་མའི་ནང་དྲག་ཆར་རླུང་འཚུབ་ཀྱིས་བྱུང་བའི་གནོད་འཚེའི་ཕོག་པར་བརྟེན་ནས། པར་ཤན་མཚོ་ཁུག་ནས་ཉེན་སྐྱོབ་རོགས་རམ་གནང་མཁན་གྱི་གནམ་གྲུ་ཞིག་འབར་མའི་ས་ཐོག་ཏུ་འབྱོར་ཡོད་ཀྱང་འབར་མའི་རྒྱལ་ཁབ་ཀྱིས་ཕྱིར་ལོག་བཏང་བ་མ་ཟད། ད་རིང་འབར་མའི་ཕྱི་སྲིད་བློན་ཆེན་གྱིས་ཁོང་གི་རྒྱལ་ཁབ་ལ་རྒྱལ་སྤྱིིའི་རོགས་རམ་གནང་རྒྱུར་དགའ་བསུ་ཡོད་ཀྱང་ཕྱི་རྒྱལ་གྱི་རོགས་

རམ་ལས་བྱེད་པ་འབར་མའི་ནང་ཡོང་རྒྱུར་དགའ་བསུ་མེད་ཅེས་གསུངས་ཡོད་པ་རེད། དེ་ཡང་འབར་མའི་ཕྱི་སྲིད་བློན་ཆེན་གྱིས་གཞུང་གི་གསར་ཤོག་ཅིག་གི་ཐོག་གསལ་བསྒྲགས་སྤེལ་བའི་ནང༌། ད་ལྟའི་དུས་སྐབས་དེར་འབར་མའི་རྒྱལ་ཁབ་ཀྱིས་ཕྱི་རྒྱལ་གྱི་ཉེན་སྐྱོབ་རུ་ཁག་དང་དྲིལ་བསྒྲགས་རུ་ཁག་འབར་མའི་ནང་ཕེབས་རྒྱུར་དགའ་བསུ་ཞུ་བའི་དུས་ཚོད་ཞིག་མིན་པ་དང༌། ཡིན་ནའང་ད་ལྟའི་དུས་སྐབས་དེ་ནི་འབར་མའི་ས་ཁུལ་ཁག་ནང་དྲག་ཆར་རླུང་འཚུབ་ཀྱི་གནོད་འཚེ་ཕོག་པའི་མི་དམངས་ཚོར་ཟ་འབྲུ་དང་སྨན་བཅོས་སོགས་དངོས་ཟོག་གི་ཛ་དྲག་རོགས་རམ་དགོས་གལ་ཆེ་བའི་དུས་ཚོད་ཅིག་ཡིན་པའི་སྐོར་གསུངས་ཡོད་པ་རེད། པར་ཤན་མཚོ་ཁུག་གི་རོགས་རམ་གནམ་གྲུ་དེ་ནི་རྒྱལ་སྤྱིའི་རོགས་རམ་གནམ་གྲུ་ ༡༢ ནང་ནས་གཅིག་ཡིན་ཞིང་། རེས་གཟའ་ཕུར་བུའི་ཉིན་འབར་མའི་དེ་སྔའི་རྒྱལ་ས་རྙིང་པར་བབས་ཡོད་ཀྱང་འབར་མའི་དྲག་པོའི་གཞུང་གིས་ཕྱིར་ལོག་བྱས་ཏེ། རྒྱལ་སྤྱིའི་སྤྱི་ཚོགས་ཀྱིས་འབར་མའི་དྲག་པའི་གཞུང་ལ་འབྱུང་བའི་གོད་ཆགས་ཚབས་ཆེ་དེས་རྐྱེན་པས་མི་དམངས་བཀྲེས་ལྟོག་གི་མནར་བཞིན་པ་དང་། ནད་ཡམས་ཀྱི་དཀའ་སྡུག་མྱོང་བཞིན་པ་རྣམས་འཚོ་གནས་ཐུབ་ཐབས་ཀྱི་ཆེད་དུ་རྒྱལ་སྤྱིའི་ཆེད་ལས་མི་སྣ་རོགས་རམ་ཆེད་དུ་འབར་མའི་ནང་འགྲོ་བསྐྱོད་བྱེད་དུ་བཅུག་དགོས་པའི་གནོན་ཤུགས་སྤྲད་པ་ངོས་ལེན་བྱེད་ཀྱི་མེད་པ་རེད།།