བོད་ཨ་མཆོག་གྲོང་འཚོའི་ནང་རང་ལུས་མེ་སྲེག

༄༅༎དེ་རིང་ཕྱི་ལོ་ ༢༠༡༣ ཟླ  ༡ ཚེས་ ༡༢ ཉིན། བོད་མདོ་སྨད་ཀན་ལྷོ་གསང་ཆུ་རྫོང་གི་ཨ་མཆོག་གྲོང་འཚོའི་ནང་རང་ལོ་ ༢༢ ལ་སོན་པའི་བོད་རིགས་ན་གཞོན་ཚེ་རིང་བཀྲ་ཤིས་ཞུ་བ་ཞིག་གིས། རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་སྟེ་སྐུ་གྲོངས་ཡོད་འདུག ཁོང་ནི་རང་ལུས་མེ་སྲེག་བཏང་སྟེ་རྒྱ་གཞུང་ལ་ངོ་རྒོལ་གནང་མཁན་༩༦པ་དེ་ཡིན་པ་རེད།
ཚེ་རིང་བཀྲ་ཤིས་ལགས་ཀྱི་ཕ་མིང་ལ་གདུགས་དཀར་སྐྱབས་དང་མ་མིང་ལ་ཚེ་རིང་སྒྲོལ་མ། བཟའ་ཟླའི་མིང་ལ་ཡུམ་མཚོ་སྐྱིད་དང་ཁོང་ལ་སྲིང་མོ་རྟ་མགྲིན་འཚོ་དང་ཚེ་དར་སྐྱིད་བཅས་གཉིས་ཡོད་པ་རེད།
བོད་ནས་བོད་མི་ཁག་གིས་འདི་ག་རླུང་འཕྲིན་ཁང་དུ་གནས་ཚུལ་ངོ་སྤྲོད་གནང་བ་ལྟར་ན། རང་ལུས་མེ་སྲེག་བཏང་ཡུལ་དུ་ས་གནས་མི་མང་འདུ་འཛོམས་ཀྱིས་ཁོང་གི་སྐུ་ཕུང་རང་ཁྱིམ་དུ་གདན་འདྲེན་ཞུ་བཞིན་ཡོད་པ་མ་ཟད། ཨ་མཆོག་དགོན་པའི་དགེ་འདུན་པ་མང་པོ་ཕབས་ཏེ་བསྔོ་སྨོན་གནང་བཞིན་ཡོད་པ་དང༌། དེ་བཞིན་དེ་རིང་ས་གནས་སུ་དོན་རྐྱེན་བྱུང་རྗེས་ཁ་པར་བརྒྱུད་ལམ་ཡོངས་རྫོགས་བཀག་འགོག་བྱས་ཡོད་པའི་སྐོར་གནས་ཚུལ་ངོ་སྤྲོད་གནང་འདུག

བོད་ནས་བོད་མི་ཁག་གིས་འབྲེལ་ཡོད་གནས་ཚུལ་ངོ་སྤྲོད་གནང་བར་གསན་རོགས་ཞུ།

སྒྲ་ལྡན་གསར་འགྱུར།