နောက်တိုးအတည်ပြုလူနာစာရင်းမှာ ပြည်ပပြန်များ ပါဝင်နေ

မြန်မာနိုင်ငံမှာ အခုနောက်ပိုင်း ကိုရိုနာဗိုင်းရပ်စ်ပိုးတွေ့လူနာတွေဟာ ပြည်ပကနေ ဒီရက်ပိုင်းအတွင်း ပြန်လည် ဝင်ရောက်လာတဲ့ မြန်မာနိုင်ငံသားတွေ ဖြစ်နေပါတယ်။ ကျန်းမာရေးဝန်ကြီးဌာနကတော့ပြည်ပက ပြန်လာသူ အားလုံးကို အသွားအလာစောင့်ကြည့်နေတယ်လို့ ပြောပါတယ်။

မေလ ၂၀ ရက် မနေ့ညက ဗိုင်းရပ်စ်ပိုးတွေ့ရှိသူ ခြောက်ဦးရှိတယ်လို့ ကျန်းမာရေးနဲ့ အားကစားဝန်ကြီးဌာနက သတင်းထုတ်ပြန်ထားပါတယ်။ သူတို့အားလုံးဟာ ယူအေအီးနိုင်ငံက ပြန်လာသူတွေ ဖြစ်ပြီး ရန်ကုန်တိုင်း၊ အင်းစိန်မြို့ နယ်မှာ အသွားအလာကန့်သတ်ထားသူတွေ ဖြစ်တယ်လို့ ဆိုပါတယ်။

သီးခြားနေထိုင်စေတဲ့ ပြည်ပပြန်တွေထဲက ဒီ ခြောက်ဦးရဲ့ ဆေးစစ်ချက်မှာ ပိုးတွေ့တယ်ဆိုတဲ့ အဖြေထွက် လာတာလို့ အင်းစိန်မြို့နယ် တိုင်းဒေသကြီး လွှတ်တော် ကိုယ်စားလှယ် ဦးဝေဖြိုးဟန်က ပြောပါတယ်။

"အားလုံး အစ အဆုံးကတော့ တိုင်းဒေသကြီးအစိုးရနဲ့ တိုင်းဒေသကြီး ကျန်းမာရေးဦးစီးဌာနက ဦးစီးပြီး လုပ်တဲ့ကိစ္စပဲဗျ။ ညကတွေ့တဲ့ ခြောက်ယောက်ကတော့ City Golf Resort ဟိုတယ်ကနေ ဟိုတယ် Quarantine ထားတဲ့ဆီကနေ တွေ့တာပေါ့”

မေလ ၁၇ ရက်နေ့ နောက်ပိုင်းကနေ မေလ ၂၁ ရက်နေ့အထိ ပြည်ပက ပြန်လာပြီး ပိုးတွေ့ရှိတဲ့ လူနာ ၁၆ ဦး အထိရှိပြီး မလေးရှားနဲ့ ယူအေအီးနိုင်ငံတွေက ပြန်လည်ဝင်ရောက်လာသူတွေ ဖြစ်ပါတယ်။

ပြန်လည်ဝင်ရောက်လာသူတွေကို လေဆိပ်မှာတင်  ချက်ချင်းဆေးစစ်နေတယ်လို့ ကျန်းမာရေးနဲ့ အားကစား ဝန်ကြီးဌာန ပြောရေးဆိုခွင့်ရှိသူ ဒေါက်တာ သန်းနိုင်စိုးက ပြောပါတယ်။

“ကျွန်တော်တို့က နှာခေါင်းနဲ့ အာခေါင်တို့ဖတ်တွေ ယူထားလိုက်တာပေါ့။ တချို့ကြတော့ လေဆိပ်မှာ တန်းပြီးယူလို့မရတာတွေရှိတယ်။ တချို့ကြတော့ နိုင်ငံခြားပြန်တွေကို တိုင်းဒေသကြီး ပြည်နယ်အစိုးရတွေရဲ့ အစီအစဉ်တွေနဲ့ လာပြီးကြိုကြတယ်။ ထိတာတော့ ဘယ်သူနဲ့မှ မထိတွေ့ဘူး။ ဟိုရောက်တဲ့အခါ Quarantine စင်တာထဲကိုဝင်တယ်။ ဝင်တဲ့အခါကြမှ သူတို့ရဲ့ တို့ဖတ်နမူနာတွေ ယူပြီး ပြန်ပို့တာ။ သေချာတာက ဒီရက် ပိုင်း နိုင်ငံခြားပြန်တွေ အကုန်လုံးက စစ်ဆေးမှုတွေ အကုန်ရရှိတယ်”

ပြည်ပမှာ အခက်အခဲကြုံနေရတဲ့ မြန်မာနိုင်ငံသားတွေကို  ကယ်ဆယ်ရေး လေယာဉ်တွေ ပြန်လည်ခေါ်ဆောင်ဖို့ ကြိုးပမ်းနေတယ်လို့  နိုင်ငံခြားရေးဝန်ကြီးဌာန ကောင်စစ်ရေးရာနဲ့ ဥပဒေရေးရာဦးစီးဌာန ညွန်ကြားရေးမှူးချုပ် ဦးအောင်ကျော်ဇံက RFA ကို ဒီကနေ့ ပြောပါတယ်။

ပြည်ပပြန်တွေ မိသားစုဆီ မသွားခင်  ရန်ကုန်မှာ သီးခြားစီ ယာယီနေထိုင်ကြရမယ့် နေရာထိုင်ခင်း အနေအထား ပေါ် မူတည်ပြီး ခရီးစဉ်တွေကို စီစဉ်နေကြတာဖြစ်တယ်လို့ သူက ဆက်ပြောပါတယ်။

အခုလို ကယ်ဆယ်ရေးလေယာဉ်တွေနဲ့ ပြည်ပနိုင်ငံတွေကနေ ပြန်လည်ခေါ်ဆောင်လာသူ ၂၂၀၀ ကျော်ရှိပြီး ကျန်းမာရေးဝန်ကြီးဌာနရဲ့ လမ်းညွန်ချက်တွေအညီ ဗိုင်းရပ်ပိုးစစ်ဆေးမှုတွေကိုလည်း အဓိက ကြပ်မတ် လုပ်ဆောင်သွားမယ်လို့ ညွန်ကြားရေးမှူးချုပ် ဦးအောင်ကျော်ဇံက ပြောပါတယ်။

မေလ ၂၀ ရက် မနေ့ညပိုင်းက မလေးရှားနိုင်ငံမှာ ပြန်ဖို့ အခက်ကြုံနေရသူ ၁၀၇ ဦးကို ကယ်ဆယ်ရေးလေယာဉ်နဲ့ သွားရောက် ခေါ်ဆောင်ခဲ့ပြီး  ၂၁ ရက် အသွားအလာ စောင့်ကြည့်မယ် လို့ နိုင်ငံခြားရေးဝန်ကြီးဌာနက သတင်း ထုတ်ပြန်ထားပါတယ်။

မေလ ၁၉ ရက်နေ့ကလည်း အိန္ဒိယနိုင်ငံကနေ ၉၅ ဦးကို  ပြန်လည်ခေါ်ဆောင်ခဲ့ပြီး ၂၁ ရက် အသွားအလာ စောင့်ကြည့်ထားတယ်လို့ နိုင်ငံခြားဝန်ကြီးဌာနက သတင်းထုတ်ပြန်ထားပါတယ်။

ရန်ကုန်မြို့က ဒေါက်တာဥက္ကာကြည်ဝင်းကတော့ ကာကွယ်မှုပိုင်းမှာ မပေါ့ဆကြဖို့လိုတယ်လို့ ပြောပါတယ်။

“ပြန်လာမယ့် ကိုယ့်ပြည်သူတွေကလည်း နိုင်ငံရေးအရရော၊ တခြားအခြေအနေတွေအရရော လက်မခံ လို့မရတဲ့ အခြေအနေဆိုတော့ လက်ခံရမှာပေါ့။ လူများများ ဝင်လာရင်တော့ အန္တရာယ်ပိုများတာပေါ့။ ကျွန်တော်တို့ နိုင်ငံထဲမှာကလည်း ကူးစက်ပြီးသားလူတွေကလည်း ရှိပြီးသားလေ။ အရင်ကလောက်တော့ လူတွေက စိုးရိမ်တကြီးမဖြစ်ကြတော့ဘူး။ သို့ပေမယ့် ကာကွယ်မှုကိုလည်း မပေါ့ကြဖို့ အရေးကြီးပါတယ်။ အခုတော်တော်များများက လိုက်နာကြတယ်လို့ ထင်ပါတယ်။”

မြန်မာနိုင်ငံမှာ မေလ ၂၁ ရက်နေ့ မနက်ပိုင်းအထိ ကိုရိုနာဗိုင်းရပ်စ်ပိုးတွေ့အတည်ပြုလူနာ ၁၉၉ ဦးရှိပြီး မေလ ၂၀ ရက်နေ့အထိ စောင့်ကြည့်လူနာသစ် ၆၆ ဦးရှိတယ်လို့ ကျန်းမာရေးဌာနက ထုတ်ပြန်ထားပါတယ်။

ရောဂါပိုးကင်းစင်လာသူ ၁၀၈ ဦးရှိပြီး အဲဒီထဲက ၉၈ ဦးကို ဆေးရုံဆင်းခွင့်ပြုခဲ့သလို သတ်မှတ်နေရာတွေမှာ အသွားအလာ ဆက်လက်စောင့်ကြည့်နေတယ်လို့ ဖော်ပြထားပါတယ်။

မြန်မာနိုင်ငံမှာ အတည်ပြုလူတွေထဲက သေဆုံးခဲ့သူ ခြောက်ဦးရှိပါတယ်။