ပြည်မြို့မှာ ကျင်းပမယ့် တမန်တော်နေ့ အခမ်းအနား ဖျက်သိမ်း

"သူတို့ကလာပြီးတော့ အထွေထွေအုပ်ချုပ်ရေးကို ဒီပွဲကျင်းပခြင်းကို ကန့်ကွက်တယ်ပြောတော့ မနေ့က ညှိကြနှိုင်းကြရင်းနဲ့ ပထမတော့ နာရီဝက်ကျင်းပမယ်၊ မုခ်ဦးတွေကိုလည်း အစ္စလာမ်အဖွဲ့ကနေပြီးတော့ မဆောက်တော့ဘူးဆိုပြီးတော့ သဘောတူချက်ရထားတယ်၊ သူတို့ပြန်သွားကြတယ်ပေါ့နော်၊ ဒါပေမဲ့ ညနေ ၆ နာရီကျော်ကျော် လောက်မှာပေါ့နော်၊ ဒီနာရီဝက်ကျင်းပတာကိုလည်း ခွင့်မပြုဘူးဆိုပြီးတော့ ထပ်ပြီးတော့ အကြောင်းပြန်တယ်ပေါ့၊ ကျနော်တို့ ဒီကိုယ်စားလှယ်တွေနဲ့ အုပ်ချုပ်ရေးနဲ့ သံဃာ့နာယက နဲ့ ညှိနှိုင်းတိုင်ပင်ပြီးတော့ အဲဒီမျိုးချစ်ကိုယ်တော် ၃ ပါးကို ဆရာတော်ကြီးတွေက ခေါ်ယူညှိနှိုင်း တယ်ခင်ဗျ၊ သူတို့ကတော့ အစ္စလာမ်အဖွဲ့ကလည်း ကျင်းပစရာရှိတာကျင်းပ၊ သူတို့ဘက်ကလည်း လုပ်စရာရှိတာလုပ်မယ်ဆိုတဲ့ သဘောမျိုးပြောတယ်ဗျ၊ အဲဒါနဲ့ နောက်ဆုံးတော့ ကျနော်တို့မြို့ပေါ် တစ်စုံတရာဖြစ်မှာ မလိုလားတဲ့အတွက် အစ္စလာမ်အဖွဲ့အစည်းက အလျှော့ပေး လိုက်တယ်ပေ့ါ"

' တမန်တော်နေ့' အခမ်းအနား ကျင်းပဖို့ မနက် ၉ နာရီကနေ ညနေ ၄ နာရီအထိ ခွင့်ပြုမိန့်ရထားတာ ဖြစ်ပါတယ်။

အခမ်းအနားကို ကန့်ကွက်တဲ့ ရန်ကုန်အခြေစိုက် မျိုးချစ်မြန်မာပရဟိတအဖွဲ့က ဘာသာရေးကို အကြောင်းပြပြီး နိုင်ငံရေးလုပ်မှာ စိုးရိမ်တာကြောင့် ကန့်ကွက်တာဖြစ်တယ်လို့ ညှိနှိုင်းပွဲမှာ ပြောကြောင်း ဦးသက်ဝင်းလှိုင် က ပြောပါတယ်။

ဒီနေ့မနက်ပိုင်းမှာလည်း အခမ်းအနားကျင်းပဖို့ ပြင်ဆင်ထားတဲ့ ပြည်မြို့စည်တော်မင်္ဂလာရပ်ကွက်က ဗလီရှေ့မှာ လူအင်အား ၃၀၀ နီးပါးက လာရောက်စောင့် ကြည့်နေကြတယ်လို့လည်း ဒေသခံတွေက ပြောပါတယ်။

အလားတူ ပြီးခဲ့တဲ့ ဇန်နဝါရီလ ၈ ရက်နေ့က ရန်ကုန်မြို့မှာ ကျင်းပတဲ့ တမာန်တော်နေ့ အထိမ်းအမှတ် ဓမ္မသဘင်အခမ်းအနားကို အမျိုးသားရေးတက်ကြွ လှုပ်ရှားသူ လူပုဂ္ဂိုလ်တွေနဲ့ မျိုးချစ်ရဟန်း သံဃာတော်တွေ စုပေါင်းထားတဲ့ ညွန့်ပေါင်းအဖွဲ့က တက်ရောက်ခွင့် တောင်းဆိုရာမှာ နှစ်ဖက်အချေအတင်ဖြစ် ခဲ့ပြီးနောက် မိနစ် ၃၀ ကျင်းပခွင့် သဘောတူညီမှုနဲ့ အခမ်းအနားကို ညွန့်ပေါင်းအဖွဲ့က ကိုယ်စားလှယ်တွေ တက်ရောက်ခဲ့ကြပါတယ်။