ICJ မှာ အမှုရင်ဆိုင်တဲ့ ဒေါ်အောင်ဆန်းစုကြည်ကို ထောက်ခံပွဲတွေကျင်းပ

Photo: Nay Myo Htun/RFA

ဒီနေ့ထောက်ခံပွဲကိုလာရောက်ခဲ့တဲ့ ဒါရိုက်တာကြည်ဖြူသျှင်က ဂမ်ဘီယာနိုင်ငံရဲ့ တရားစွဲဆိုမှုနဲ့ ပတ်သက်ပြီး သွားရောက်ဖြေရှင်းတဲ့ အခြေအနေတွေကို မြန်မာနိုင်ငံသားတွေအနေနဲ့ နိုင်ငံရေးကို သေချာသိအောင်လုပ်ဖို့ လိုအပ်ကြောင်း ပြောပါတယ်။

ဒါ့အပြင် နိုင်ငံတော်အတိုင်ပင်ခံပုဂ္ဂိုလ်ရဲ့ လုံခြုံရေးနဲ့ ကျန်းမာရေးကိုလည်း စိုးရိမ်ကြောင်း ပြောပါတယ်။

မြန်မာနိုင်ငံကို ဂမ်ဘီယာနိုင်ငံက တရားစွဲဆိုထားတာကို ICJ တရားရုံးမှာ ဒီနေ့စတင်ကြားနာနေပြီဖြစ်ပြီး နိုင်ငံတော်အတိုင်ပင်ခံပုဂ္ဂိုလ်လည်း တရားရုံးကို ရောက်ရှိနေပြီဖြစ်ပါတယ်။ လာရောက်ထောက်ခံသူတွေထဲမှာ စွပ်စွဲချက်တွေ၊ နိုင်ငံတွေကို မသိပေမယ့် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သာ ထောက်ခံတာဖြစ်တယ် လို့ ပြောကြပါတယ်။

ဒေါ်အောင်ဆန်းစုကြည်သွားရောက်ဖြေရှင်းတာကို တပ်မတော်သားဟောင်းတစ်ဦးအနေနဲ့ ကြိုဆိုပေမယ့် အမှန်တကယ် ပြစ်မှုကျူးလွန်သူတွေက ခေါင်းရှောင်နေတယ်လို့ ဒီနေ့ထောက်ခံပွဲ ရောက်လာတဲ့ ဦးဇော်ဟိန်းက ပြောပါတယ်။

ပြည်သူအများစုက နိုင်ငံတော်အတိုင်ပင်ခံပုဂ္ဂိုလ်ရဲ့ ရပ်တည်ချက်အပေါ် ထောက်ခံမှုတွေ ရှိနေကြပါတယ်။

ဒီနေ့ထောက်ခံပွဲ အခမ်းအနား ကျင်းပနေချိန်မှာပဲ အဲဒီနေရာအနီးမှာ လူငယ်အချို့က လူမျိုးတုံးသတ်ဖြတ်မှုကို မလိုလားဘူးဆိုတဲ့လှုပ်ရှားမှု ပြုလုပ်တာကိုတွေ့ခဲ့ရပြီး အမှန်တကယ် လူမျိုးတုံးသတ်ဖြတ်မှု ကျူးလွန်တာ မရှိဘူးဆိုတဲ့ ငြင်းဆိုချက်ကို မထောက်ခံကြောင်း လက်ကမ်းစာစောင်တွေဝေငှခဲ့ပါတယ်။

လှုပ်ရှားမှု ပြုလုပ်ရာမှာပါဝင်ခဲ့တဲ့ လူ့ဘောင်သစ်လူငယ် အဖွဲ့က ကိုဇင်လင်းက ထောက်ခံပွဲတွေပြုလုပ်တာနဲ့ ပတ်သက်ပြီး အခုလိုပြောပါတယ်။

ဒါ့အပြင် မန္တလေးတိုင်းဒေသကြီးမှာလည်း ဒေါ်အောင်ဆန်းစုကြည် ထောက်ခံကြိုဆိုပွဲတွေကို ပြုလုပ်ခဲ့ပါတယ်။ မန္တလေးမြို့က ထောက်ခံပွဲမှာ အစိုးရဝန်ထမ်းတွေလည်း ပူးပေါင်းပါဝင်တာကို တွေ့ရပါတယ်။

ရခိုင်ပြည်နယ်မှာ တပ်မတော်က လူမျိုးတုံးသတ်ဖြတ်မှုတွေ ကျူးလွန်တယ်ဆိုတဲ့ စွပ်စွဲချက်တွေနဲ့ ဂမ်ဘီယာ နိုင်ငံရဲ့ တရားစွဲဆိုမှုတွေနဲ့ ပတ်သက်ပြီး ဒီနေ့မှာ နယ်သာလန်နိုင်ငံ သည်ဟိတ်မြို့မှာ ပထမဆုံးကြားနာနေပြီး ဒီဇင်ဘာ ၁၁၊ ၁၂ ရက်တွေမှာလည်း ဆက်လက်ကြားနာစစ်ဆေးသွားမှာ ဖြစ်ပါတယ်။