အင်တာနက်မှ VOIP တယ်လီဖုန်း ဆက်သွယ်မှုကို တားမြစ်

အဲဒီ ညွှန်ကြားစာမှာ အင်တာနက်ကနေတဆင့် VOIP ခေါ်ဆိုမှုများ မပြုလုပ်ကြရန် ကြိုတင် အသိပေး အကြောင်းကြားခြင်းလို့ ဖော်ပြထားပါတယ်။ မြန်မာ့ဆက်သွယ်ရေး လုပ်ငန်းက ညွှန်ကြားလာတဲ့အတွက် အခုလို ကြိုတင် အကြောင်းကြားတာလို့ စာထဲမှာ ဖော်ပြထားပါတယ်။ ဒီကြေညာစာကို မြန်မာအင်ဖိုတက်ခ် ကော်ပိုရေးရှင်းရဲ့ လက်ထောက် ညွှန်ကြားရေးမှူး ဦးစိန်ဝင်း က လက်မှတ် ရေးထိုးထားပြီး၊ ၂၀၁၁ ခုနှစ် မတ်လ ၁၀ ရက် နေ့စွဲနဲ့ ထုတ်ပြန်ထားတာပါ။

မြန်မာအင်ဖိုတက်ခ်က အခုလို ပိတ်ပင်တဲ့ ညွှန်ကြားချက်ကို တိတိကျကျ ကျင့်သုံးမယ်ဆိုရင် ပြည်သူတွေကြားမှာ အခက်အခဲ တော်တော် ဖြစ်သွားမယ်လို့ ရန်ကုန်မြို့ခံတဦးက RFA ကို ပြောပါတယ်။

“အဲလိုဆိုရင်တော့ အင်တာနက်ဆိုင်တွေရဲ့ စီးပွားရေးက အရမ်းကို ထိခိုက်သွားမှာပဲ။ ဘာဖြစ်လို့လဲဆိုတော့ အင်တာနက်ဆိုင်တွေက အဲဒါတွေနဲ့ပဲ လုပ်နေရတာ။ Account အရောင်းအဝယ် ဆိုတာလေ စင်ကာပူကနေ ဒီ Pfingo တို့ ဘာတို့တွေကို အရောင်းအဝယ်တွေလေ၊ ၈ နာရီတို့၊ ၁၀ နာရီတို့ ကျွန်မက အဲဒါကို account အတွက် ပတ်စ်ဝတ်ဒ်နဲ့ သွင်းထားပြီးတော့ ကိုယ်က ကုမ္ပဏီရဲ့ ကြားခံပြီး ရောင်းပေးလိုက်ပြီးတော့ ကျွန်မက အဲဒါနဲ့ တကမ္ဘာလုံးကို ဖုန်းခေါ်ဖို့ Pfingo account နဲ့။”

ကမ္ဘာတဝန်း အင်တာနက် သုံးစွဲသူတွေဟာ ကိုယ့်ကွန်ပျူတာကနေ အသိမိတ်ဆွေရဲ့ ကွန်ပျူတာကို skype, gtalk, Pfingo, VZO စတဲ့ အင်တာနက် ဝန်ဆောင်မှုစနစ်တွေကတဆင့် တယောက်မျက်နှာ တယောက်ကြည့်ပြီး စကားပြောနိုင်သလို၊ တယ်လီဖုန်းဆီကိုလည်း ခေါ်ဆိုနိုင်ပါတယ်။

မြန်မာနိုင်ငံမှာ အင်တာနက်ကနေတဆင့် တယ်လီဖုန်းခေါ်တဲ့အခါမှာ အမေရိကားကို ခေါ်ရင် တမိနစ်ကို ၁၅၀ ကျပ်၊ စင်ကာပူနိုင်ငံက ဖုန်းကိုခေါ်ရင် ၅၀ ၊ စသဖြင့် ပြည်သူတွေအနေနဲ့ အဝေးရောက် မိသားစုတွေဆီ ဈေးသက်သက်သာသာ ခေါ်နိုင်တဲ့ အခြေအနေ ဖြစ်တာလို့ သိရပါတယ်။ အင်တာနက် ကဖေးဆိုင် ဖွင့်ထားသူတွေကလဲ ဒီကိစ္စနဲ့ပဲ၊ ဆိုင်လုပ်ငန်း ဝင်ငွေရနေကြတာလို့ ဆိုပါတယ်။