တိုင်းရင်းသားလိုချင်တဲ့ ငြိမ်းချမ်းရေး၊ အစိုးရ မဖေါ်ဆောင်နိုင်

အစိုးရက ဦးဆောင်ကျင်းပနေတဲ့ ငြိမ်းချမ်းရေးဆွေးနွေး ပွဲတွေကနေ တိုင်းရင်းသားတွေ လိုလားတဲ့ ငြိမ်းချမ်းရေး ကို ဖော်ဆောင်နိုင်မှာ မဟုတ်ကြောင်း ရှမ်းတိုင်းရင်း သားများ ဒီမိုကရေစီအဖွဲ့ချုပ် SNLD ဥက္ကဌ ဦးခွန်ထွန်းဦး က ပြောပါတယ်။

ရန်ကုန်မြို့ ဗဟန်းမြို့နယ် တော်ဝင်နှင်းဆီခန်းမမှာ ဒီကနေ့ကျင်းပတဲ့ ညီညွတ်သော တိုင်းရင်းသားလူမျိုးများ မဟာမိတ်အဖွဲ့ UNA ရဲ့ ပထမအကြိမ် ညီလာခံမှာ ရှမ်းတိုင်းရင်းသားများ ဒီမိုကရေစီအဖွဲ့ချုပ် SNLD ဥက္ကဌ ဦးခွန်ထွန်းဦးက ပြောကြားခဲ့ပါတယ်။

UNA ညီလာခံကို ဒီနေ့နဲ့ မနက်ဖြန် ၂ ရက်ကြာကျင်းပ မှာဖြစ်ပြီး ၂၀၀၈ ဖဲ့ွစည်းပုံ အခြေခံဥပဒေ ပြင်ဆင်ရေး ၊ ပြည်တွင်းငြိမ်းချမ်းရေးနဲ့ ဖက်ဒရယ်ပြည်ထောင်စု တည်ဆောက်ရေးတို့ကို အဓိကထား ဆွေးနွေးကြ မှာဖြစ်ပါတယ်။

ဒါ့အပြင် UNA အဖွဲ့ဝင် တိုင်းရင်းသားနိုင်ငံရေးပါတီတွေနဲ့ အမျိုးသားဒီမိုကရေစီအဖွဲ့ချုပ်အကြား ပူးတွဲဆောင်ရွက်နိုင်မယ့်ကိစ္စတွေကိုလည်း အခုညီလာခံမှာ ထည့်သွင်းဆွေးနွေးသွားမယ်လို့ သိရပါတယ်။

ညီလာခံကို UNA အဖွဲ့ဝင်တွေဖြစ်တဲ့ ဇိုမီးဒီမိုကရေစီအဖွဲ့ချုပ်၊ မွန်အမျိုးသားများပါတီ၊ ကချင်အမျိုးသားများ ဒီမိုကရေစီကွန်ဂရက်၊ ကရင်အမျိုးသားပါတီ၊ ရခိုင်အမျိုးသားပါတီ၊ ရှမ်းပြည်ကိုးကန့် ဒီမိုကရက်တစ်ပါတီနဲ့ ကယန်းအမျိုးသားပါတီတို့က ကိုယ်စားလှယ်တွေ တက်ရောက်ကြပါတယ်။