နောက် ၁၂ နာရီအတွင်း မုန်တိုင်း ပိုအားကောင်းလာနိုင်

"ဒီမုန်တိုင်းရဲ့ အဝန်းဝိုင်းထဲမှာကျတာက ရခိုင်ပြည်နယ်မြောက်ပိုင်းဒေသတွေမို့လို့ စစ်တွေတို့၊ ဘူးသီးတောင်တို့ မောင်တောတို့ ဒီဒေသတွေက သတိထားရမယ့်နေရာတွေပါ၊ မုန်တိုင်းကြောင့် ရွာတဲ့မိုးကြောင့် မိုးကြီးတာမို့လို့ စောနကပြောတဲ့ မြေပြိုမှုတွေဟာ ရခိုင်မြောက်ပိုင်းမှာရှိတဲ့ တောင်ကုန်းတောင်တန်းဒေသတွေရယ်၊ ချင်းပြည် နယ်၊ နောက်ပြီး စစ်ကိုင်းတိုင်းဒေသကြီးအတွင်းမှာရှိတဲ့ တောင်ကုန်းတောင်တန်းတွေရယ်၊ အဓိကကတော့ သက်နုတောင်တန်းတွေမှာ မြေပြိုမှု အန္တရာယ်တွေအတွက်ကို စိုးရိမ်ရပါတယ်"

အဲဒီ ဆိုင်ကလုန်းမုန်တိုင်း မိုရာဟာ နောက် ၁၂ နာရီအတွင်း ဘင်္ဂလားဒေ့ရှ်ကမ်းခြေ၊ စစ်တကောင်းမြို့နားကို ဖြတ်ကျော်ဝင်ရောက်မယ်လို့လည်း ထုတ်ပြန်ချက်မှာ ပါရှိပါတယ်။

မုန်တိုင်းကြောင့် ရခိုင်ပြည်နယ်မှာ လေတိုက်နှုန်းဟာ တစ်နာရီကို ၄၅ မိုင်ကနေ ၅၅ မိုင်အထိရှိနိုင်ပြီး ကမ်းလွန် ပင်လယ်မှာလည်း လှိုင်းအမြင့်ဟာ ၁၅ ပေကနေ ပေ ၂၀ အထိ ရှိနိုင်တယ်လို့ မိုးလေဝသနှင့် ဇလဗေဒပညာရှင် ဦးထွန်းလွင် ကလည်း ခန့်မှန်းထားပါတယ်။

ဒါ့အပြင် မုန်တိုင်းရဲ့အရှိန်ကြောင့် နေပြည်တော်၊ စစ်ကိုင်း၊ မန္တလေး၊ မကွေး၊ ပဲခူး၊ ရန်ကုန်၊ ဧရာဝတီ၊ တနင်္သာရီ၊ ကချင်၊ ချင်း၊ ရခိုင်၊ ကရင်၊ မွန်၊ ရှမ်းနဲ့ ကယားပြည်နယ်တွေမှာ မိုးထစ်ချုန်းရွာပြီး ဒေသအလိုက် မိုးကြီးတာ၊ နေရာ ကွက်ပြီး မိုးကြီးတာနဲ့ လေပြင်းတိုက်တာတွေ ဖြစ်ပေါ်နိုင်ပါတယ်။

မုန်တိုင်းကြောင့် မြန်မာ့ကမ်းရိုးတန်းတစ်လျှောက်နဲ့ ကမ်းလွန်ပင်လယ်တွေမှာ မိုးသက်လေပြင်းတွေကျပြီး လှိုင်းကြီးနိုင်တယ်လို့လည်း မိုးဇလရဲ့ ထုတ်ပြန်ချက်မှာ ပါရှိပါတယ်။