စစ်တွေမှာ WY ဆေးပြား ၆ သိန်းကျော် ဖမ်းမိ

ရခိုင်ပြည်နယ် စစ်တွေမြို့ ရေချမ်းပြင်ဆိပ်ကမ်းမှာ ကာလတန်ဖိုးငွေ ကျပ်သိန်းပေါင်း ထောင့်နှစ်ရာကျော် တန်ဖိုးရှိတဲ့ WY စိတ်ကြွဆေးပြား ခြောက်သိန်းကျော်ကို ရေချမ်းပြင် ရဲကင်းစခန်းက မနေ့က ဖမ်းဆီးရမိခဲ့ပါတယ်။

ဘိလပ်မြေအိတ်တွေထဲမှာထည့်ပြီး ကားနဲ့သယ်ယူလာရာမှာ ဖမ်းဆီးရမိခဲ့တာလို့ ရေချမ်းပြင် ရဲကင်းစခန်းမှူး ရဲအုပ်ကျော်စိုးဦး က ပြောပါတယ်။

"ဘိလပ်မြေအိတ်တွေနဲ့ရောပြီးတော့ ဘိလပ်မြေအိတ်တွေထဲမှာထည့်ထားတာ ဆေးပြားတွေ၊ ဆေးပြားအားလုံး ခြောက်သိန်းလေးသောင်းကိုးထောင်၊ သိန်းပေါင်း တစ်ထောင့်နှစ်ရာနှစ်ဆယ့်ကိုးသိန်း တော့ကျော်တယ်၊ အဲဒီကားက အခု ကျနော်တို့ ရေချမ်းပြင်ဆိပ်ကမ်းကနေ ဇက်နဲ့ အငူမော်ဘက်ကိုပို့မှာ"

WY စိတ်ကြွဆေးပြားတွေ သယ်ယူလာတဲ့ မော်တော်ယာဉ်ဟာ ရေချမ်းပြင်ဆိပ်ကမ်းကနေတစ်ဆင့် ရသေ့တောင်မြို့နယ် အငူမော်ဆိပ်ကမ်းကိုဖြတ်ပြီး မောင်တောမြို့ဘက်ကို ဦးတည်သွားမှာ ဖြစ်တယ်လို့ သိရပါတယ်။

မနေ့က စိတ်ကြွဆေးပြားတွေနဲ့အတူ ပိုင်ရှင်ဖြစ်သူအပါအဝင် ကားပေါ်မှာပါလာတဲ့လူ ၃ ဦးကို ရဲကဖမ်းဆီးထားပြီး ယာဉ်မောင်းကတော့ ထွက်ပြေးလွတ်မြောက်နေတယ်လို့ ရေချမ်းပြင်ရဲကင်းစခန်းမှူးက ပြောပါတယ်။

မတ်လ ၂၂ ရက်နေ့ကလည်း အငူမော်စစ်ဆေးရေးဂိတ်မှာ WY စိတ်ကြွဆေးပြားပေါင်း ရှစ်သိန်းကျော်ကို ဖမ်းဆီး ရမိခဲ့သလို မတ်လ ၂၃ ရက်နေ့ကလည်း မောင်တောမြို့နယ်အနီး ပင်လယ်ပြင်ထဲက ငါးဖမ်းစက်လှေတစ်စီးပေါ် ကနေ WY စိတ်ကြွဆေးပြား ခုနစ်သိန်းကို ဖမ်းဆီးရမိခဲ့ပါတယ်။