မထသ လိုင်းလျှော့ချဖို့ ရန်ကုန်တိုင်း ဝန်ကြီးချုပ်ပြောကြား

ရန်ကုန်မြို့တွင်းမှာ ပြေးဆွဲနေတဲ့ ယာဉ်လိုင်းပေါင်း ၃၀၀ လောက်ကို လျှော့ချသွားဖို့ ရန်ကုန်တိုင်း ဝန်ကြီးချုပ် ဦးဖြိုးမင်းသိန်း က မော်တော်ယာဉ်လိုင်းပေါင်းစုံ ထိန်းသိမ်းရေးကော်မတီ တာဝန်ရှိသူတွေ ကို ပြောထားပါတယ်။

ပြီးခဲ့တဲ့ မေလ ၂၂ရက်နေ့က တွေ့ဆုံရာမှာ ယာဉ်ကြောကျပ်တည်းမှုကို ဖြေရှင်းနိုင်မယ့် နည်းလမ်းတွေ ကို ဆွေးနွေးစဉ် ဝန်ကြီးချုပ်က သူ့သဘောထား ကို ပြောခဲ့တာဖြစ်ကြောင်း မထသ (မြို့တွင်း) ကော်မတီ ယာယီ ဥက္ကဌ ဦးမင်းဇော် က ပြောပါတယ်။

"ဝန်ကြီးချုပ်က အနာဂတ်မှာတော့ ပိုမိုကောင်းမွန်တဲ့ သယ်ယူပို့ဆောင်ရေးစနစ်ပေါ်ပေါက်ရန်ဆိုတဲ့ ရည်ရွယ်ချက်နဲ့ ဒါလေးပြောခြင်းဖြစ်ပါတယ်၊ ယာဉ်လိုင်းတွေ ၃၅၇ လိုင်းလောက်ရှိတယ်ပေါ့နော်၊ အပြောင်းအလဲတစ်ခုလုပ်တဲ့အခါမှာ လွယ်လွယ်ကူကူနဲ့တော့မရနိုင်ဘူးပေါ့နော်၊ ယာဉ်ပိုင်ရှင်တွေ၊ ယာဉ်လုပ်သားတွေ ကတော့ သူတို့ဘယ်လိုလုပ်ရမလဲဆိုပြီးမေးတာလေးတွေတော့ရှိတာပေါ့နော်"

ဝန်ကြီးချုပ်က လမ်းကြောတူတွေမှာ ယာဉ်လိုင်းတူတာတွေကို ပေါင်းစပ်လိုက်မယ်ဆိုရင် ယာဉ်တွေအပြိုင် အဆိုင် မောင်းနှင်တာတွေ ယာဉ်မတော်တဆ မှု ဖြစ်ပွားနေတာတွေနဲ့ ယာဉ်ကြောပိတ်ဆို့မှု တွေကို ဖြေရှင်းနိုင် မယ်လို့ ယူဆကြောင်း ပြောခဲ့တာလို့ ဦးမင်းဇော်က ပြောပါတယ်။

လတ်တလောမှာ ယာဉ်လိုင်းတွေလျှော့ချဖို့အတွက် မဖြစ်နိုင်သေးကြောင်း မထသ တာဝန်ရှိသူတွေ ဆွေးနွေးနေ ဆဲဖြစ်ကြောင်းလည်း ဦးမင်းဇော် က ပြောပါတယ်။

လက်ရှိ ရန်ကုန်မြို့တွင်းမှာ ယာဉ်အစီးရေ ၅ ထောင် ဝန်းကျင်နဲ့ အငှားယာဉ် ၅ သောင်းကျော် ပြေးဆွဲနေပါတယ်။