ရခိုင်ကော်မရှင်အဖွဲ့ဝင်နှစ်ဦး ဘင်္ဂလားဒေ့ရှ်နယ်စပ်အခြေအနေ ကို သွားရောက်လေ့လာ

"ဒေသတွင်းနိုင်ငံတွေအနေနဲ့ ကျမတို့ ကွင်းဆင်းပြီးတော့ မြေပြင်အနေအထားတွေ သိဖို့လိုတယ်ဆိုတဲ့ ရည်ရွယ်ချက်နဲ့ အစီအစဉ်နဲ့ သွားတာပါ။ အဲဒီတော့ ဟိုဒေသမှာလည်း တွေ့သင့် တွေ့ထိုက်တဲ့သူတွေ အကုန်လုံးနဲ့ တွေ့ဖို့ရယ်၊ မြေပြင်အခြေအနေတွေ ဘယ်လိုဖြစ်နေလဲ၊ ပြောနေတဲ့ စကားတွေ အပေါ်မှာ၊ မီဒီယာ အပေါ်မှာ မှားနေတဲ့ဟာတွေ၊ မှန်နေတဲ့ဟာတွေ ဘယ်လောက်ရှိနေလဲ၊ ဒါတွေကိုလည်း အကုန်လုံး လေ့လာသုံးသပ်ဖို့နော်၊ ဒေသခံလူတွေနဲ့ လည်း တွေ့ဖို့ သွားကြတာပါ။"

ဘင်္ဂလားဒေ့ရှ်နိုင်ငံကို ရောက်ရှိနေတဲ့ ရခိုင်အကြံပေးကော်မရှင်အဖွဲ့ဝင်တွေဟာ မြန်မာ-ဘင်္ဂလားဒေ့ရှ် နယ်စပ်မှာ နေထိုင်နေသူတွေ၊ ဘင်္ဂလားဒေ့ရှ်နိုင်ငံရောက် ရခိုင်တိုင်းရင်းသားတွေ၊ ဘင်္ဂလားဒေ့ရှ် အစိုးရ တာဝန်ရှိသူတွေအပါအဝင် တွေ့ဆုံသင့်သူတွေနဲ့ တွေ့ဆုံသွားမှာ ဖြစ်တယ်လို့ ပြောပါတယ်။

ရခိုင်အကြံပေးကော်မရှင်အနေနဲ့ ဘင်္ဂလားဒေ့ရှ်နိုင်ငံအပြင် အာဆီယံ ဒေသတွင်း နိုင်ငံဖြစ်တဲ့ အင်ဒိုနီးရှားကိုလည်း အဖွဲ့ဝင် နှစ်ဦး စေလွှတ်ခဲ့ပြီး မလေးရှားနိုင်ငံ ကိုလည်း ကော်မရှင်အဖွဲ့ဝင်တွေကို ထပ်ပြီးတော့ စေလွှတ်ဖို့ရှိတယ်လို့ သိရပါတယ်။

ကုလသမဂ္ဂ အတွင်းရေးမှူးချုပ်ဟောင်း ကိုဖီအာနန် ဦးဆောင်တဲ့ ရခိုင်အကြံပေးကော်မရှင်ကို ပြီးခဲ့တဲ့ ၂၀၁၆ ခုနှစ် သြဂုတ်လ ၂၄ ရက်နေ့က ဖွဲ့စည်းခဲ့ တာဖြစ်ပါတယ်။

အဲဒီကော်မရှင်ဟာ သူတို့ရဲ့ လေ့လာတွေ့ရှိချက်တွေကို ဒီနှစ် သြဂုတ်လ ၂၄ ရက်နေ့ နောက်ဆုံးထားပြီး နိုင်ငံတော် အတိုင်ပင်ခံ ပုဂ္ဂိုလ်ကနေတဆင့် အစိုးရ အဖွဲ့ကို တင်ပြရမှာဖြစ်ပါတယ်။