ရခိုင်ပြည်နယ်ဆိုင်ရာ ကော်မ ရှင်တွေ့ဆုံပွဲပြုလုပ်မည်

ကုလသမဂ္ဂအတွင်းရေးမှူးချုပ်ဟောင်း မစ္စတာကိုဖီအာနန် ဦးဆောင်တဲ့ ရခိုင်ပြည်နယ်ဆိုင်ရာ အကြံပေးကော် မရှင်အဖွဲ့ဝင်တွေဟာ တပတ်အတွင်း ရန်ကုန်မြို့မှာ လူထုတွေ့ဆုံပွဲပြုလုပ်ဖို့ ပြင်ဆင်နေပါတယ်။

အဲဒီတွေ့ဆုံပွဲအတွက် ပြင်ဆင်နေတယ်လို့ ရခိုင်ပြည်နယ်ဆိုင်ရာ အကြံပေးကော်မရှင် အဖွဲ့ဝင် ဒေါ်စောခင်တင့် က ပြောပါတယ်။

"ရခိုင်တိုင်းရင်းသားအဖွဲ့အစည်းတွေလည်း လာနိုင်အောင်၊ လူငယ်အဖွဲ့အစည်း တွေလည်း လာနိုင်အောင်၊ အခြားတိုင်းရင်းသားအဖွဲ့အစည်း၊ ပါတီတွေ ဒီလူတွေက အကုန်လုံး သိချင်တယ်ဆိုလို့ရှိရင် ကျွန်မတို့ က ဖြေကြားပေးဖို့ အဆင်သင့်ပါပဲ။ ဒီအတွက်လည်း ဘယ်လိုလုပ်ရင်ကောင်းမလဲဆိုတာကို ကျွန်မတို့ က ဆွေးနွေး နေပါတယ်ရှင့်"

ပထမဆုံးအကြိမ်ပြုလုပ်မယ့် ကော်မရှင်နဲ့ လူထုတွေ့ဆုံပွဲမှာ ကော်မရှင် ဥက္ကဌ မစ္စတာ ကိုဖီအာနန်နဲ့ ကော်မရှင် အဖွဲ့ဝင် နိုင်ငံခြားသား ၂ ဦး ပါဝင်နိုင်မှာ မဟုတ်ပေမယ့် နောက်ပိုင်း ပြုလုပ်မယ့် တွေ့ဆုံပွဲတွေမှာ ပါဝင်နိုင်ဖို့ စီစဉ်ထားတယ်လို့လည်း သိရပါတယ်။

ရခိုင်ပြည်နယ်ဆိုင်ရာ အကြံပေး ကော်မရှင်ကို ပြီးခဲ့တဲ့ သြဂုတ်လ ၂၄ ရက်နေ့က နိုင်ငံတော် အတိုင်ပင်ခံရုံး ဝန်ကြီးဌာနက ဖွဲ့စည်းလိုက်တာ ဖြစ်ပါတယ်။