စလင်းမြို့နယ်မှာ စစ်ကောင်စီ ဂျက်တိုက်လေယာဉ်တစ်စီး ပျက်ကျ

မကွေးတိုင်း၊ မင်းဘူးခရိုင်၊ စလင်းမြို့နယ်၊ ကြူဝန်းကြီးကျေးရွာအနီးမှာ ဖေဖော်ဝါရီလ ၂၉ ရက် ဒီကနေ့ နေ့လယ် ၁၂ နာရီ ၄၅ မိနစ်အချိန်က စစ်ကောင်စီရဲ့ ဂျက်တိုက်လေယာဉ်တစ်စီး ပျက်ကျခဲ့တယ်လို့ ဒေသခံတွေက RFA ကို ပြောပါတယ်။

အဲဒီ ဂျက်တိုက်လေယာဉ်ဟာ MIG - 29 အမျိုးအစားဖြစ်ပြီး လေ့ကျင့်ပျံသန်းရင်း စက်ချွတ်ယွင်းကာ ပျက်ကျခဲ့တာလို့ ပြောပါတယ်။

လေယာဉ်မှူး နှစ်ဦးကတော့ လေထီးနဲ့ ခုန်ထွက်လွတ်မြောက်ခဲ့ပြီး စစ်ကောင်စီက ရဟတ်ယာဉ်နဲ့ ခေါ်ဆောင်သွားတယ်လို့ မင်းဘူးခရိုင် ပကဖ သတင်းပြန်ကြားရေး တာဝန်ခံ ကိုအညာသား ပြောပါတယ်။

"လေယာဉ်ပေါ်က နှစ်ယောက်က လေထီးနဲ့ ခုန်ချလွတ်မြောက်သွားတယ်။ ခုန်ထွက်သွားတဲ့ သူတွေကိုတော့ Mi 17 နဲ့ ၁ နာရီဝန်းကျင်လောက်မှာ လာခေါ်သွားတယ်"

လေယာဉ်မှူး နှစ်ဦးကို လာခေါ်ချိန် စစ်ကောင်စီတပ်သားနဲ့ ရဲတွေကို ပျက်ကျတဲ့လေယာဉ်ရဲ့ အနီးပတ်ဝန်းကျင်တွေမှာ လုံခြုံရေးချထားပြီး လက်ရှိအချိန်မှတော့ အဲဒီနေရာကနေ ပြန်ထွက်ခွာသွားပြီလို့ ပြောပါတယ်။

ဒီလေယာဉ်ပျက်ကျမှုနဲ့ ပတ်သက်ပြီး အသေးစိတ်သိရဖို့ စစ်ကောင်စီရဲ့ မကွေးတိုင်း ပြောခွင့်ရသူ လူမှုရေးရာဝန်ကြီး ဦးမျိုးမြင့်ကို RFA က ဒီကနေ့ နေ့လယ်ပိုင်းမှာ ဖုန်းခေါ်ပေမယ့် လက်ခံဖြေကြားတာ မရှိပါဘူး။

စစ်အာဏာသိမ်းပြီးနောက် စလင်းမြို့နယ်မှာ စစ်ကောင်စီရဲ့ လေယာဉ်ပျက်ကျမှုက ပထမဆုံးအကြိမ်ဖြစ်တယ်လို့ ဒေသခံတွေက ပြောပါတယ်။