ဘန်ဒေါင်းမူကို လိုက်နာ သင့်တယ်လို့ အငြိမ်းစား မြန်မာ သံအမတ်ကြီး ပြော

လွန်ခဲ့တဲ့နှစ်ပေါင်း ၆ဝ က ချမှတ်ခဲ့တဲ့ ဘန်ဒေါင်း မူ ၅ ချက် ခေါ် ငြိမ်းချမ်းစွာအတူ ယှဉ်တွဲနေထိုင်ရေး မူ ၅ ချက်ဟာ နိုင်ငံတကာဆက်ဆံရေးမှာ အရေးကြီးတဲ့ စံချိန်စံညွှန်းတွေဖြစ်ပြီး၊ ဒီကနေ့အထိ နိုင်ငံတကာ အသိုင်းအဝန်းက လိုက်နာသင့်တဲ့မူတွေ ဖြစ်တယ်လို့ အငြိမ်းစား မြန်မာ သံအမတ်ကြီး ဦးစိန်ဝင်းအောင် က ပြောဆိုကြောင်း တရုတ်ပြည်ထုတ် Shanghai Daily သတင်းစာက ဖေါ်ပြပါတယ်။

၁၉၅၄ ခုနှစ် အင်ဒိုနီးရှားနိုင်ငံ၊ တောင်ပိုင်း ဂျာဗားပြည် နယ် မြို့တော် ဘန်ဒေါင်းမှာ ကျင်းပခဲ့တဲ့ညီလာခံ မှာ မြန်မာဝန်ကြီးချုပ် ဦးနု၊ တရုတ် ဝန်ကြီးချုပ် ချူအင်လိုင်း ၊ အိန္ဒိယ ဝန်ကြီးချုပ် နေရူး တို့ ပူးပေါင်း အဆိုပြုခဲ့တဲ့ ငြိမ်းချမ်းစွာအတူ ယှဉ်တွဲနေထိုင်ရေး မူ ၅ ချက် ကို ညီလာခံ က သဘောတူ အတည်ပြုခဲ့ ပါတယ်။

အဲဒီ ဘန်ဒေါင်းမူ ၅ ချက်မှာ နိုင်ငံတွေအနေ နဲ့ တစ်နိုင်ငံချင်း ရဲ့ ပိုင်နက် နယ်နမိတ် နဲ့ အချုပ်အခြာ အာဏာကို အပြန်အလှန် လေးစား အသိအမှတ်ပြုဖို့၊ မကျူးကျော်ဖို့၊ သူတပါးပြည်တွင်းရေး ဝင်မစွက်ဖို့၊ အပြန်အလှန် အကျိုးတူ သာတူညီမျှ ပူးပေါင်းဆောင်ရွက်ကြဖို့၊ ငြိမ်းငြိမ်းချမ်းချမ်း အတူယှဉ်တွဲနေထိုင်ကြဖို့ ဆိုတဲ့ အချက်တွေပါဝင်ပါတယ်။

ဘန်ဒေါင်းမူ ၅ ချက်ကို မြန်မာက စတင်ဦးဆောင် တင်သွင်းခဲ့တာဖြစ်လို့ ဂုဏ်ယူကြောင်း၊ အဲဒီအချက်တွေဟာ ဟာ ဒီကနေ့အထိ အသက်ဝင်နေသေးကြောင်း၊ ဒီမူတွေအတိုင်း လိုက်နာကြမယ် ဆိုရင် ငြိမ်းချမ်းရေး နဲ့ ဖွံ့ဖြိုးတိုး တက်ရေးကို မြှင့်တင်နိုင်မှာဖြစ်ကြောင်း တရုတ် မြန်မာ ချစ်ကြည်ရေးအသင်း ဥက္ကဌ၊ အငြိမ်းစား မြန်မာ သံအမတ်ကြီး ဦးစိန်ဝင်းအောင် က တရုတ် အစိုးရ ဆင်ဝှာသတင်းဌာနက တွေ့ဆုံ မေးမြန်းရာမှာ ပြောကြားခဲ့ ပါတယ်။

ဦးစိန်ဝင်းအောင်ဟာ လာအို နဲ့ တရုတ် သံအမတ်ဟောင်းဖြစ်ပါတယ်။ တရုတ်အစိုးရဟာ အခု လတ်တလောမှာ ပင်လယ်ပြင်ရေပိုင်နက် ကိစ္စ နဲ့ ပတ်သက်ပြီး၊ အာဆီယံ ဒေသတွင်း နိုင်ငံတွေ နဲ့ အငြင်းအခုန် ပြဿနာတွေ ဖြစ် ပွားနေပါတယ်။