ရွေးကောက်ပွဲကော်မရှင်ကို အဖွဲ့ဝင် ၇ ဦးဖြင့် ဖွဲ့စည်းဖို့ လွှတ်တော်အတည်ပြု

မနေ့က တင်သွင်းခဲ့တဲ့ ပြည်ထောင်စု ရွေးကောက်ပွဲ ကော်မရှင်ကို ၇ ဦးနဲ့ ဖွဲ့စည်းဖို့အတည်ပြု လိုက်ပြီး၊ အမည်တွေကိုတော့ သတ်မှတ်ဖော်ပြခြင်း မရှိကြောင်း လွှတ်တော်တက်နေတဲ့ NDF လွှတ်တော် ကိုယ်စားလှယ် ဦးစိုးဝင်းက အခုလို ပြောပြပါတယ်.

“ရွေးကောက်ပွဲ ကော်မရှင်နဲ့ ပတ်သက်ပြီးတော့ နာမယ်စာရင်း မထွက်ပါဘူး။ နာမယ်စာရင်း မထည့်ပေးပါဘူး။ လူဦးရေ စာရင်းပဲ၊ ဥပမာအားဖြင့် အဖွဲ့ဝင် ၇ ဦး၊ ၇ ဦးမှာ ဥက္ကဋ္ဌ တယောက်၊ အဖွဲ့ဝင် ၆ ယောက်ပေါ့ဗျာ။ အတွင်းရေးမှူးကတော့ သီးသန့် ခန့်မှာပါ။”

ဒါ့အပြင် ဒီကနေ့ လွှတ်တော်မှာ ပြည်ထောင်စု တရားသူကြီးအဖွဲ့နဲ့ ပတ်သက်ပြီး အဖွဲ့ဝင် ၇ ဦး ထားရှိဖို့ အဆိုတင်သွင်းကြောင်း သိရပါတယ် လွှတ်တော် ကိုယ်စားလှယ် ဦးစိုးဝင်းကပဲ ပြောပြပါတယ်။

“တကယ်ဆိုတော့ တရားသူကြီး အဖွဲ့က သူက ဥပဒေမှာ ထားနိုင်တာက ၇ ယောက်၊ အနည်းဆုံး ၇ ယောက် အများဆုံး ၁၂ ယောက် ထားနိုင်တယ်။ ၇ ယောက် ကျွန်တော်တို့ အဆိုပြုထားတယ်၊ အဲဒါတခုပါပဲ။ အဲဒါကိုလည်း မနက်ဖြန်ကျမှ ကျွန်တော်တို့ အတည်ပြုမှာပါ။”

တရားသူကြီးအဖွဲ့မှာ ၇ ဦး ထားရှိဖို့ ဒီကနေ့ အဆိုတင်သွင်းထားပြီး မနက်ဖြန်မှာ ဆွေးနွေး အတည်ပြုမှာ ဖြစ်ကြောင်း သိရပါတယ်။

ဒီကနေ့ လွှတ်တော် အစည်းအဝေးကို မနက် ၁၀ နာရီမှာ စတင်ခဲ့ပြီး ကျင်းပချိန် ၁၀ မိနစ်သာ ရှိခဲ့တယ်လို့ သိရပါတယ်။