အင်းတော်တိုက်ပွဲက ဖမ်းမိ စစ်သုံ့ပန်းတွေကို စစ်ဆေး အရေးယူမယ်လို့ NUG ထုတ်ပြန်

စစ်ကိုင်းတိုင်း အင်းတော်မြို့ သိမ်းတိုက်ပွဲအတွင်း စခန့်စွန့်လွှတ် ဆုတ်ခွာထွက်ပြေးသွားတဲ့ တပ်မ ၇၇ တပ်မမှူး ဗိုလ်မှူးချုပ် အောင်သက်ဦး ကို ဖမ်းမိခဲ့ကြောင်း၊ သူ နဲ့ အတူ တပ်သားတွေကို စစ်ဆေးနေပြီး အရေးယူမှုတွေ ဆက်လက်ဆောင်ရွက်သွားမှာဖြစ်ကြောင်း အမျိုးသားညီညွတ်ရေးအစိုးရ NUG က ထုတ်ပြန်ပါတယ်။

လက်ရှိအချိန်မှာ ဖမ်းဆီးရမိထားတဲ့သူတွေကို စစ်သုံ့ပန်းဆိုင်ရာ မူဝါဒနဲ့အညီ ထိန်းသိမ်းထားပြီး စစ်ဆေးနေကြောင်း NUG ဝန်ကြီးချုပ်ရုံး ပြောခွင့်ရသူ ဦးနေဘုန်းလတ်က ပြောပါတယ်။

အင်းတော်မြို့သိမ်းတိုက်ပွဲအတွင်း စစ်ကောင်စီတပ်ဖွဲ့ဘက်က ဟောင်ဝစ်ဇာ (၂) လက်၊ ၁၂၀ မမ (၂) လက် အပါအဝင် လက်နက်ကြီး၊ လက်နက်ငယ် နဲ့ ခဲယမ်းမီးကျောက် အမြောက်အမြား သိမ်းပိုက် ရရှိခဲ့တယ်လို့ NUG ကာကွယ်ရေး ဝန်ကြီးဌာနကလည်း ထုတ်ပြန်ပါတယ်။

အင်းတော်မြို့ကို တော်လှန်ရေးတပ်ဖွဲ့တွေက ၂၀၂၄ ခုနှစ် ဩဂုတ်ကလ စတင်တိုက်ခဲ့တာဖြစ်ပြီး (၈) လကျော်ကြာပြီးနောက် ဧပြီလ ၇ ရက်နေ့က သိမ်းပိုက်နိုင်ခဲ့တာလို့ ဆိုပါတယ်။

ဒီစစ်ဆင်ရေးကို NUG ကာကွယ်ရေးဝန်ကြီးဌာန၊ ကျောင်းသားတပ်မတော် ABSDF တပ်ရင်း ၁၁၊ ၁၄ နဲ့ ကချင်လွတ်လပ်ရေးတပ်မတော် KIA တပ်မဟာ ၉ အထူးစစ်ကြောင်းအပါအဝင် စစ်ကိုင်းတိုင်း၊ မကွေးတိုင်း၊ မန္တလေးတိုင်းက ပြည်သူ့ကာကွယ်ရေးတပ်ရင်း တပ်ဖွဲ့တွေ ဒရုန်းတပ်ဖွဲ့တွေ နဲ့ ကွန်မန်ဒိုတပ်ဖွဲ့တွေ ပူးပေါင်းပါဝင်ခဲ့တယ်လို့ ထုတ်ပြန်ပါတယ်။

ဒီကိစ္စနဲ့ပတ်သက်ပြီး စစ်ကောင်စီပြောခွင့်ရသူ ဗိုလ်ချုပ်ဇော်မင်းထွန်းကို RFA က ဆက်သွယ်ခဲ့ပေမယ့် ဖုန်းမကိုင်ပါဘူး။