ဒေါ်အောင်ဆန်းစုကြည်ကို ကန် အရာရှိတွေ ဝေဖန်

မြန်မာနိုင်ငံဆိုင်ရာ အမေရိကန် သံအမတ်ကြီးဟောင်း Derek Mitchell ဒဲရက် မစ်ချယ် ကလည်း တရားဥပဒေ စိုးမိုးရေးဆိုတာ လုပ်ငန်းစဉ် တခုသက်သက်မျှ မဟုတ်ပါဘူး။ တရားသူကြီးတယောက် စားပွဲမှာ ထိုင်နေရုံ စွဲချက် တင်သူတွေ၊ တရားခံရှေ့နေတွေ၊ ဥပဒေတွေ ရှိနေရုံမျှနဲ့ တရားဥပဒေစိုးမိုးနေပြီ ပြောလို့မရပါဘူး။ တကယ်လို့သာ တရားဥပဒေစိုးမိုးရေးကို အဲဒီလို အဓိပ္ပါယ်ဖွင့်မယ်ဆိုရင် မြန်မာပြည်မှာ တရားဥပေဒစိုးမိုးရေးဟာ စစ်အစိုးရ လက်ထက်ကတည်းက ရှိနေခဲ့တယ်ဆိုပြီး ပြောနိုင်ပါတယ်လို့ မနေ့က ဝေဖန်လိုက်ပါတယ်။

လက်ရှိမှာ National Democratic Institute (NDI) ခေါ် အမေရိကန်ပြည်ထောင်စု အမျိုးသား ဒီမိုကရက်တစ် သိပ္ပံရဲ့ ဥက္ကဌဖြစ်တဲ့ ဒဲရက်က အမှန်တကယ်ပြောရရင် မြန်မာပြည်မှာ တရားဥပဒေစိုးမိုးရေး တင်မကဘဲ တရား မျှတမှုပါ လိုအပ်နေပါတယ်။ ဒေါ်အောင်ဆန်းစုကြည်အနေနဲ့ အဲဒီ စကားကို ပြောချိန်တန်ပါပြီ။ တရားမျှတမှုမရှိရင် ငြိမ်းချမ်းရေးနဲ့ ဒီမိုကရေစီလည်း ရှိမှာမဟုတ်သလို ပြီးခဲ့တဲ့ အနှစ် ၃ဝ လုံးလုံး သူမ လုပ်ကိုင်ခဲ့တာ မှန်သမျှလည်း အလဟဿ အချည်းနှီးဖြစ်ရပါလိမ့်မယ်လို့ RFA ကို ပြောပါတယ်။

တဆက်တည်းမှာပဲ ဒီ ရိုက်တာသတင်းထောက်တွေ အမှုမှာ တကယ်လို့သာ ဒေါ်အောင်ဆန်းစုကြည်အနေနဲ့ ခုခံလျှောက်လဲသူတွေဘက်က အထောက်အထားတွေကို သိချင်တယ်ဆိုရင် အလွယ်ကလေးပါ။ တရားခံတွေရဲ့ ရှေ့နေတွေ၊ ဒါမှမဟုတ် ရိုက်တာသတင်းဌာနနဲ့ တခြားသူတွေကို မေးလိုက်ရုံပါပဲလို့ မြန်မာနိုင်ငံဆိုင်ရာ အမေရိကန် သံအမတ်ကြီးဟောင်း Derek Mitchell ဒဲရက် မစ်ချယ် က ဝေဖန်ပြောကြားခဲ့ပါတယ်။

အမေရိကန် နိုင်ငံခြားရေးဌာန ပြောခွင့်ရသူတဦးကလည်း ရိုက်တာသတင်းထောက်တွေ အပြစ်ပေးခံရတာနဲ့ ပတ်သက်ပြီး ဒေါ်အောင်ဆန်းစုကြည်ရဲ့ ပြောဆိုချက် အများအပြားကို မိမိတို့ သဘောမတူကြောင်း၊ သတင်းထောက်တွေကို အမှုဆင်ဖမ်းဆီးခဲ့တယ် ဆိုတာကို ရဲအရာရှိတဦးကိုယ်တိုင်က ဝန်ခံထွက်ဆိုခဲ့ကြောင်း၊ အခုလို စီရင်ချက်ကြောင့် မြန်မာနိုင်ငံရဲ့ တရားစီရင်ရေးစနစ် မျှတလွတ်လပ်မှု ဘယ်လောက်ရှိသလဲဆိုတာ စိုးရိမ်မိကြောင်းနဲ့ သတင်းထောက်တွေကို အမြန်ဆုံးပြန်လွှတ်ပေးဖို့ တောင်းဆိုကြောင်း ပြောပါတယ်။