ကုလလုံခြုံရေးကောင်စီခေါ်ဖို့ ၇ နိုင်ငံ တောင်းဆို

ဗြိတိန်၊ အမေရိကန်၊ ပြင်သစ်၊ အီဂျစ်၊ ကာဇက်စန်၊ ဆီနီဂေါနဲ့ ဆွီဒင် နိုင်ငံတို့က မြန်မာနိုင်ငံထဲမှာဖြစ်ပေါ်နေတဲ့ အကြမ်းဖက်မှုတွေနဲ့ပတ်သက်ပြီး ကုလသမဂ္ဂလုံခြုံရေးကောင်စီ အစည်းအဝေးခေါ်ဖို့ တောင်းဆိုလိုက်တယ်လို့ မနေ့ကထုတ်ဝေတဲ့ AFP သတင်းတစ်ပုဒ်မှာ ဖော်ပြထားပါတယ်။

အဲဒီ ၇ နိုင်ငံက မြန်မာနိုင်ငံ ရခိုင်ပြည်နယ်ထဲက မွတ်ဆလင်တွေကို စစ်တပ်က ရှင်းလင်းရေးလုပ်နေတာနဲ့ ပတ်သက်ပြီး ဆွေးနွေးဖို့ ကုလသမဂ္ဂ အထွေထွေအတွင်းရေးမှူး အန်တိုနီယို ဂူးတားရက်စ်ကို တောင်းဆိုလိုက် တာပါ။

အဲဒီကိစ္စနဲ့ပတ်သက်ပြီး လုံခြုံရေးကောင်စီ အစည်းအဝေးခေါ်ဖို့ ရက်ကိုညှိနှိုင်းနေတယ်လို့ လုံခြုံရေးကောင်စီ ရဲ့အလှည့်ကျ ဥက္ကဌဖြစ်တဲ့ အီသီယိုပီးယားနိုင်ငံက ပြောပါတယ်။

မြန်မာစစ်တပ်ရဲ့ နယ်မြေရှင်းလင်းရေး ဆောင်ရွက်ချက်တွေကြောင့် ရိုဟင်ဂျာ ၄ သိန်းကျော် ဘင်္ဂလားဒေ့ရှ်နိုင်ငံ ထဲ ထွက်ပြေးနေတယ်လို့ ကုလသမဂ္ဂက ပြောဆိုထားတာပါ။

ပြီးခဲ့တဲ့ သြဂုတ်လ ၂၅ ရက်နေ့က မွတ်ဆလင်စစ်သွေးကြွတွေက ရခိုင်ပြည်နယ်ထဲက ရဲစခန်းတွေကို တိုက်ခိုက်ခဲ့ပြီးတဲ့နောက် မြန်မာစစ်တပ်က ခုလိုနယ်မြေရှင်းလင်းမှု စစ်ဆင်ရေးဆောင်ရွက်ခဲ့တာ ဖြစ်ပါတယ်။

အဲဒီစစ်ဆင်ရေးကို ကုလသမဂ္ဂက လူမျိုးစုရှင်းလင်းရေးလို့သုံးပြီး ပြင်သစ်သမ္မတ အီမန်နြူရယ် မက်ခရွန် ကတော့ လူမျိုးတုံးသတ်ဖြတ်မှုလို့ ပြောဆိုပါတယ်။