ခင်ဦးမြို့ ယောက်သွားအိုင်ရွာက ဒလန်လို့ဆိုသူနှစ်ဦး အသတ်ခံရ

စစ်ကိုင်းတိုင်း၊ ခင်ဦးမြို့နယ် ယောက်သွားအိုင်ရွာက စစ်ကောင်စီ သတင်းပေးလို့ နာမည်ထွက်နေသူနှစ်ဦး အောက်တိုဘာလ ၂၈ ရက် ဒီနေ့ မနက် ၉ နာရီခန့် နေအိမ်မှာပဲ အသတ်ခံလိုက်ရတယ်လို့ ဒေသခံတွေက ပြောပါတယ်။

အသက်ခံရသူတွေဟာ အသက် ၄၈ နှစ်အရွယ် ဦးညိုရင်နဲ့ အသက် ၄၁ နှစ်အရွယ် ဦးဇော်လွင်တို့ဖြစ်တယ်လို့ ဒေသခံတွေက ဆိုပါတယ်။

သူတို့နှစ်ဦးဟာ စစ်ကောင်စီတပ်သားတွေကို သတင်းပေးနေတဲ့ ပျူစောထီးအဖွဲ့ဝင် ဒလန်တွေ ဖြစ်တယ်လို့ ဒေသခံအချို့က ပြောပေမယ့် RFA အနေနဲ့ သီးခြား အတည်ပြုနိုင်ခြင်း မရှိပါဘူး။

ခင်ဦးမြို့မှာရှိတဲ့ တောကြီးမြေဟောက် အဖွဲ့ကတော့ သူတို့ နှစ်ဦးစလုံးဟာ စစ်ကောင်စီရဲ့ လက်ပါးစေအဖြစ် လုပ်ဆောင်နေတာကြောင့် ၄၅ နဲ့ ၄၆ ဦးမြောက် ဒလန်အဖြစ် ရှင်းလင်းခဲ့တာဖြစ်တယ်လို့ ဒီကနေ့မှာပဲ သတင်းထုတ်ပြန်ပါတယ်။

စစ်ကောင်စီ လက်အောက်ခံ အထွေထွေ အုပ်ချုပ်ရေးဦးစီးဌာနက ဝန်ထမ်းတွေနဲ့ မြို့ပေါ်နဲ့ ရွာတွေမှာရှိတဲ့ အုပ်ချုပ်ချုပ်ရေးမှူးတွေ အနေနဲ့ အမြန်ဆုံး နုတ်ထွက်ဖို့ ခင်ဦးမြို့နယ် ပြည်သူ့ကာကွယ်ရေးအဖွဲ့က အောက်တိုဘာလ ၂၈ ရက် ဒီနေ့မှာပဲ သတိပေးချက် ထုတ်ပြန်ထားပါတယ်။