ဟင်္သာတမိုးကြောင့် ရပ်ကွက်တချို့ ရေမြုပ်

မြဝတီနဲ့ အေးမြသာယာရပ်ကွက်နှစ်ခုက လယ်ကွက်ကို သိမ်းပြီး ရပ်ကွက်လုပ်ထားတာ ဖြစ်တဲ့အတွက် ရေကျဖို့ ခက်ခဲကြောင်း၊ ဒုက္ခသည်တွေကို စာသင်ကျောင်းနဲ့ ဇရပ်တွေမှာ ခေတ္တ ထားရှိပြီး လူမှုရေး အဖွဲ့တွေနဲ့ မြို့နယ်အုပ်ချုပ်ရေးမှူးတွေကလည်း နီးစပ်ရာ ထမင်းထုပ် ဝေငှ ကူညီနေတယ်လို့ မြို့ခံတဦးက ပြောပါတယ်။

အဲဒီဆင်ခြေဖုံးရပ်ကွက်တွေမှာ ရေက အနည်းဆုံး ၄ ပေ ဝန်းကျင် အထိ ရှိနေသေးတယ်လို့ ပြောပါတယ်။ မနေ့ကနဲ့ နှိုင်းယှဉ်ရင် မြို့ပေါ်မှာ ရေကျသွားပေမယ့် အထည်အလိပ် ရောင်းတဲ့ ပဒေသာဈေးနဲ့ ဘော်လုံးကွင်းနားက အား-ကာ ဈေးတန်းနှစ်ခုကို ဒီကနေ့အထိ ပိတ်ထားရသေးတယ်လို့ ဆိုပါတယ်။

အခုလို ရေကြီးတာဟာ မြို့ပေါ်မြောင်းတွေကို စည်ပင်သာယာက စနစ်တကျ မဖေါက်ထားတာက တကြောင်းနဲ့ ရှိပြီးသား မြောင်းတွေမှာ အမှိုက်တွေ ပိတ်ဆို့နေပြီး အဲဒီအမှိုက်တွေကိုလည်း စနစ်တကျ မသိမ်းခဲ့တာက တကြောင်းကြောင့် ရေပြန်ထွက်နိုင်မယ့် လမ်းမရှိလို့ ဖြစ်တာဆိုပြီး မြို့ခံတွေက ပြောပါတယ်။